Berlin (dpa/SN). Zwjazkowa wobora chce w Iraku zasadźenych němskich wojakow nowych napjatosćow po morjenju iranskeho generala Ghassema Soleimanija dla přepołožić, kaž wonkowne a zakitowanske ministerstwo zdźělatej. Přede­wšěm zepěranišći w Bagdadźe a Tadshiju budźetej „nachwilnje wuprózdnjenej“, pisataj zakitowanska ministerka Annegret Kramp-Karrenbauer (CDU) a wonkowny minister Heiko Maas (SPD) w lisće zwjazkowemu sejmej. Wojakow chcedźa do Jordaniskeje a Kuweita přeměstnić. To ma so „w najblišim času“ stać, kaž w spisu dale rěka.

Ministraj potwjerdźataj, zo maja z irakskim­ knježerstwom wo dalewjedźenju zasadźenja w Iraku dale jednać. „Samo­zrozumliwje kóždy suwereny rozsud irakskeho knježerstwa akceptujemy. Smy zasadnje zwólniwi z podpěru w mjezynarodnje koordinowanym wobłuku pokročować“, wonaj pisataj.

Irak je Bjezstrašnostnu radu UNO mjeztym namołwjał, morjenje iranskeho generala jako njeskutk zasudźić.

Tradicionalne zarjadowanje FDP na Třoch kralow w Dźiwadle na hrodźe

Budyšin (CS/SN). Na swojim mjeztym 14. zetkanju na Třoch kralow je hornjołužiska FDP noweho sakskeho předsydu strony Franka Müllera-Rosentritta witać móhła. Wón naslěduje dotalneho předsydu Holgera Zastrowa, kiž bě po poražce liberalnych při wólbach Sakskeho krajneho sejma loni nazymu wotstupił. K rěčnikam njedźelneho zarjadowanja w Budyskim Dźiwadle na hrodźe słušachu nimo krajneho předsydy tež wokrjesny šef FDP Mike Hauschild, jeho zastupnica Judith Münch a předsyda Domowiny Dawid Statnik.

Mike Hauschild wobžarowaše, zo njeje wólbny bój minjeneho lěta k wěcownym temam wjedł, ale zo słužeše w prěnim rjedźe tomu, wólbnemu dobyću zhromadneho politiskeho přećiwnika zadźěwać, štož běchu wólby Zhorjelskeho wyšeho měšćanosty dopokazali.

Podstupim (dpa/SN). Nutřkowny wuběrk Braniborskeho krajneho sejma zaběra so jutře znowa z podawkami w zwisku z prawicarskimi parolemi na jednej z Choćebuskich murjow. To je rěčnik ministerstwa wčera na naprašowanje medijow zdźělił. Nutřkowny minister Michael Stübgen (CDU) chce zapósłancow wo aktualnym stawje informować. Po informacijach rěčnika njeje w mjenowanym padźe dotal žanych nowych dopóznaćow. Přepytowanja policije traja.

Dźewjeć hotowostnych policistow bě so kónc nowembra do demonstracije klimowych aktiwistow před grafitijom na muri ze słowami „Zadźeržće Ende Gelände“ fotografować dało. „Ende Gelände“ je skupina klimowych aktiwistow, namołwjaca stajnje zaso k protestam přećiwo zmilinjenju brunicy.

Po podawku su policistam kazali grafiti přemolować. Při tym zawostajichu woni skrótšenku „DC“ na muri, štož woznamjenja prawicarski slogan „Defend Cottbus“ (Zakitujće Choćebuz). Zastojnicy twjerdźachu, zo bě jim barba wušła. Na to zahajichu disciplinarne jednanja. Třoch policistow su nachwilnje přesadźili.

Čłowječi nop namakali su wobydlerjo domu w delnjosakskim Lüneburgu, jako w zahrodce dźěłachu. Po informacijach policije jedna so z wulkej wěstotu wo čłowječe powostanki. Prawdźepodobnje bě nop hižo dlěši čas w zemi ležał. Ležownosć swójby je w bjezposrědnim susodstwje kěrchowa. Tón bě něhdy wjetši, tak zo sahaše snano hač na ležownosć swójby. To nětko pruwuja.

W nocy k tankowni wulećała je sej wowca w hessenskim Rüsselsheimje. Nahrawanja wěstotneje kamery pokazuja, kak wustróžany muž před njej do předawarnje tankownje ćeknje. Skoćo pak to njemyleše: Wćipne wone tankownju inspicěrowaše a přihladowaše dalšemu kupcej při tankowanju. Wowčer, kiž bě připadnje na městnje, wowcu popadny. Dowjezechu­ ju do zwěrjatownje, hdźež nětko na swojeho wobsedźerja čaka.