W „Blejše“ lóštnje rejwali
To a tamne (07.06.18)
Znateho krosnowarja po fasadach Alaina Roberta (55) su zajeli, jako tón spyta, bjez kóždeho zawěsćenja na wysokodom w juhokorejskej stolicy Seoulu zalězć. Na 77. poschodźe 555 metrow wysokeho Lotte World Towera bě krosnowanje za chrobłeho Francozu po dwěmaj hodźinomaj skónčene. Z wisatej platformu dowjezechu jeho na třěchu 123poschodoweho twarjenja. Policija jemu wumjetuje, zo njeje wobsedźerja mróčeloškrabaka do swojeje akcije wo dowolnosć prosył.
Z cirkusa ćeknjeny elefant je so po porynsko-pfalcskim Neuwiedźe přechodźował. Při tym so ani awtow ani pěškow njeboješe. Zwěrjo bě měrne, a sobudźěłaćerjo cirkusa móžachu je bjez problemow zaso wróćo wjesć. Prawdźepodobnje bě elefant elektriski płót swojeho wobhrodźenja roztorhał. Jeho puć na swobodźe wšak bě runje kilometer dołhi.
Na prašenja wotmołwjała
Berlin (dpa/SN). Prěni króć za čas swojeho zastojnstwa je zwjazkowa kanclerka Angela Merkel (CDU) dźensa w zwjazkowym sejmje na prašenja zapósłancow wotmołwjała. Dotal njebě so žadyn knježerstwowy šef do tajkeho koła prašenjow a wotmołwow podać trjebał. Woprašowanje je wobstatk koaliciskeho jednanja mjez CDU, CSU a SPD a ma so wotnětka trójce wob lěto přewjesć.
Senat koaliciji přihłosował
Rom (dpa/SN). Senat w Romje je nowemu italskemu knježerstwu dowěru wuprajił. Cyłkownje 171 parlamentownikow je wčera wječor populistisku koaliciju skerje lěwicarskeho hibanja Pjeć hwězdow a prawicarskeje a wukrajnikow wotpokazowaceje Lega podpěrało. 25 senatorow so hłosa wzda, 117 wupraji knježerstwu njedowěru. Do toho bě ministerski prezident Giuseppe Conte wabił, „knježerstwa přewróta“ podpěrać. Dźensa měješe parlament wothłosować. Tam pak matej wobě stronje wjetšinu.
Wuprajenja złahodnjene
Tysacy ludźi su wčera w Čěskej přećiwo amtěrowacemu ...
Žada sej perspektiwy
Drježdźany (dpa/SN). W aktualnej diskusiji wo zakónčenju wudobywanja brunicy sakski ministerski prezident Michael Kretschmer (CDU) na tym wobstawa, potrjechenym kónčinam spěšnje jasne perspektiwy skićić. „Najprjedy perspektiwy, potom kónc wudobywanja“, rjekny wón powěsćerni dpa w Drježdźanach. „To rěka, zo trjebamy nuznje wšudźe spěšny internet a elektrifikaciju železnicy. Planowanje a zwoprawdźenje pak njesměłoj lětdźesatki trać.“
Po planach zwjazkoweho knježerstwa měješe dźensa „komisija za rozrost, strukturnu změnu a dźěło“ dźěłać započeć. Něhdyši ministerski prezident Stanisław Tilich (CDU) je jedyn z předsydow gremija, kotryž ma hač do kónca lěta termin za kónc brunicy postajić.
Inwestuja miliony
Dobre šansy
Lědma chwile za sebje
Hamburg (dpa/SN). Něhdźe 40 procentow dorosćenych w Němskej nima po swójskich informacijach wšědnje wjace hač 45 mjeńšin wólneho časa za sebje. To je wuslědk reprezentatiwneho woprašowanja instituta YouGov w nadawku žonjaceje nowiny Tina. Při tym prašachu so ludźi tež za wěcami, kotrež wšědnje najwjace chwile „zežeru“. Na prěnim městnje widźachu woprašani dźěła w domjacnosći (47 proc.). Slědowachu internet a socialne medije (31 proc.).
Napadne su rozdźěle mjez žonami a mužemi. Za 58 procentow žonow je domjacnosć najwjetši „časožračk“, mužam jeno 36 procentow. Za surfowanje w interneće abo Facebook trjebaja mužojo wjace chwile hač žony (34 porno 28 procentam). Woprašeli běchu so 2 074 žonow a muži nad 18 lětami.
To a tamne (06.06.18)
Wulět z awtom maćerje je so za bratrow w starobje šěsć a wosom lět w Delnjofrankskej runje hišće někak zbožownje skónčił. Hólcaj z Rothfelsa běštaj so rano zahe skradźu z domu zminyłoj, jako mać hišće spaše. Z jeje awtom jědźeštaj cyłkownje dźewjeć kilometrow, mjez sobu so wotměnjejo. Skónčnje zrazyštaj do nabóčneho wobhrodźenja. Tam jeju policija wotewza. Wobaj wostaštaj njezranjenaj, awto maćerje pak dyrbjachu wotwlec dać, w policajskej rozprawje rěka.
Kofej z brokolijom, espreso z brokolijom a cappuccino z brokolijom poskićeja wot najnowšeho w scenowej kofejowni „Commonfolk Coffee“ w awstralskim Melbournje. Za to měšeja zeleninowy próšk do kofeja abo sypaja jón na ješć. Pječa ma łžička próška telko wutkow kaž cyła porcija zeleniny. Reakcije ludźi na nowu kreaciju wšak su tež chětro měšane.
Wuradźuja wo ćěkancach
Luxemburg (dpa/SN). Nutřkowni ministrojo čłonskich statow Europskeje unije su so dźensa w Luxemburgu zetkali, zo bychu wo wjele lět haćenej reformje azyloweje politiki EU wuradźowali. Dokelž njemóžachu so kraje dotal na rozdźělenje ćěkancow po krajach EU dojednać, steji reforma wot lěta 2016 faktisce na blaku. Předewšěm wuchodeuropske kraje kaž Madźarska a Pólska a naposledk tež Awstriska su přećiwo zawjazowacej kwoće. Je to poslednje zetkanje ministrow do wjerška EU kónc junija.
Smjertne wopory wulkana dla
Guatemala-City (dpa/SN). Ličba smjertnych woporow po wudyrjenju wohenjoweho wulkana w Guatemali je na 65 rozrostła. 46 wosobow so nimo toho zrani, kaž katastrofowy škit kraja zdźěla. Něhdźe 3 200 ludźi dyrbjachu ewakuować, po tym zo bě wulkan zawčerawšim, njedźelu, wudyrił. Při tym je znajmjeńša jednu wjes w dalokej měrje zničił. Prezident kraja Jimmy Morales wukaza mjeztym nuzowy staw. Wulkan bě dźensa dale aktiwny, byrnjež w słabšej formje.
SPD žada sej wuběrk
