Drježdźany (SN/MiR). Pjeć serbskich projektowych idejow steješe wčera mjez dźesać kandidatami za publikumowe myto Sakskeho fondsa „Čiń sobu!“ we wobłuku Łužica. W cyłku bě wot 26. septembra­ do 6. oktobra wjace hač 3 000 hłosow po puću interneta wo dobyćerjomaj rozsudźiło. Serbski projekt njeje so nažel přesadźił, za to pak hrajkanišćo a wjacegeneraciski dom w Mikowje (Mücka).

Uta Waschnick, kotraž měješe ideju za Mikowski projekt, rjekny: „Nimamy pola nas žanu móžnosć, zo so ludźo wšelakich generacijow zetkawaja. To móhło so nětko změnić. Ideja bě skerje spontana. Mjeztym so někotři młodźi ludźo za projekt angažuja.“ Kelko aktiwnych to je, njewědźeše Waschnick na naprašowanje rjec. Z pjenježnym mytom 15 000 eurow chcedźa nětko jako prěnje klasiske hrajkanišćo twarić. Wšako tajke za tuchwilu 145 dźěći we wsy dotal hišće nimaja. „Derje wopytane hrajkanišćo móže być zakład sociokulturelneho centruma gmejny a tak zdobom za wjacegeneraciski dom“, Uta Waschnick potwjerdźi.

Karlsruhe (dpa/SN). Frakcija Lěwicy w Němskim zwjazkowym sejmje je ze swojej skóržbu přećiwo zasadźenju Zwjazkoweje wobory přećiwo teroristiskej organizaciji IS zwrěšćiła. Zwjazkowe wustawowe sudnistwo w Karlsruhe je próstwu frakcije dźensa jako nje­woprawnjenu wotpokazało. Kaž sudnicy měnjachu, njejsu prawa zwjazkoweho sejma ze zasadźenjom ranjene. Němska podpěruje mjezynarodnu koaliciju přećiwo Islamskemu statej z wuskušowanskimi lěta­dłami.

Žada sej wotstup Scheuera

Berlin (dpa/SN). Předsyda frakcije Zelenych w zwjazkowym sejmje Anton Hof­reiter žada sej hladajo na diskusiju wo zwrěšćenym nadróžnym popłatku za wosobowe awta wotstup wobchadneho ministra Andreasa Scheuera (CSU). „Z dočasnym wotzamknjenjom zrěčenjow je Scheuer miliony eurow dawkowych pjenjez přisadźił. Wón dyrbjał wotstupić. Hdyž to nječini, wočakuju wot zwjazkoweje kanclerki, zo jeho pušći“, rjekny Hofreiter nowinarjam.

Prěje přeradu na Kurdach

Lipsk (dpa/SN). 30 lět po měrliwej rewoluciji je zwjazkowy prezident Frank-Walter Steinmeier zmužitosć ludźi w bywšej NDR wuzběhnył. „9. oktober 1989 bě wulki dźeń w stawiznach Němskeje“, rjekny wón wčera na swjedźenskim zarjadowanju k jubilejej přewróta w Lipsku. Zdobom Steinmeier na to dopominaše, zo je sej jednota Němskeje wot ludźi wjele žadała, předewšěm na wuchodźe kraja. „Wy sće łamki zmištrować dyrbjeli, kajkež moja generacija na zapadźe ženje znała njeje“, zwjazkowy prezident wu­zběhny. Tutón hoberski wukon „njebu dołhi čas w dosahacej měrje hódnoćeny“. Mnozy na wuchodźe su dźěło zhubili a domiznu wopušćili. „Tele wuludnjenje je hač do dźensnišeho hłuboke slědy zawostajiło.“ Wuskutki zjednoćenja Němskeje su přeco hišće widźomne. Mnozy čuja so wopušćeni, rozdźěl mjez wuchodom a zapadom je dale wulki, runje tak kaž tón mjez městami a wjesnymi kónčinami.

Istanbul (dpa/SN). Turkowske wójsko je ze swojej ofensiwu přećiwo kurdiskim jednotkam na sewjeru Syriskeje minjenu nóc pokročowało. W zdźělence zakitowanskeho ministerstwa w Ankarje bě rěč wo „rjekowskich wojakach“, kotřiž wo wobłuku „operacije žórło měra“ wuchodnje rěki Euphrat wojuja. Turkowski prezident Recep Tayyip Erdoğan bě spočatk ofensiwy wčera připowědźił.

W prěnich hodźinach su turkowscy wojacy po informacijach aktiwistow znajmjeńša 15 ciwilistow morili, mjez nimi dwě dźěsći. Mnozy su na ćěkańcy. Wojerske zasadźenje zbudźa mjezynarodnje raznu kritiku. Knježerstwa a institucije sej žadaja, je hnydom skónčić.

Hišće dźensa chcyše Bjezstrašnostna rada UNO wuradźować. Němska bě w nadawku pjeć čłonskich krajow EU w radźe – nimo Němskeje su to Pólska, Belgiska, Francoska a Wulka Britaniska – wo to prosyła, zo turkowsku ofensiwu na pra­widłownym posedźenju narěča. Jeje zaměr je, kurdisku milicu YPG na sewjeru Syriskeje wuhnać a tam wěstotne pasmo zarjadować. Kurdiscy wojowarjo su we wočach Turkowskeje terorisća.