Čěska a Italska so wadźitej
Praha/Rom (dpa/SN). W zwadźe politiki Europskeje unije ćěkancow dla so nětko Čěska a Italska rozestajatej. Čěski ministerski prezident Andrej Babiš je zasadnje zwólniwy so z italskim premierom Giuseppu Conte zetkać. „Chcemy swoju jasnu poziciju přednjesć“, rjekny 63lětny wčera w Praze. Minjeny kónc tydźenja bě wón italske žadanje wotpokazał, dźěl wonych 450 ćěkancow přiwzać, kotřiž běchu přez Srjedźne morjo do Italskeje dojěli. „To je puć do hele“, politikar populistiskeje strony ANO rjekny. Na to bě so Conte ze zjawnym listom na swojeho čěskeho kolegu wobroćił a jeho do Roma přeprosył. Italska njeje po puću do hele ale po puću legality a zhromadneje zamołwitosće za migraciski fenomen, w jeho spisu rěka. Bjezstronski knježerstwowy šef nawjeduje koaliciju lěwicarskeho hibanja Pjeć hwězdow a prawicarskeje strony Lega.
Kolesowarske pućniki dwurěčne
Wotmołwa sakskeho knježerstwa na naprašowanje Franziski Schubert
Drježdźany (juny/SN/MkWj). Wot klětušeho budu skónčnje tež pućniki při kolesowarskich šćežkach w serbskim sydlenskim rumje dwurěčne – a to ze serbskimi a němskimi napisami w samsnej wulkosći. To wuchadźa z wotmołwy sakskeho statneho knježerstwa na małe naprašowanje łužiskeje zapósłanče Franziski Schubert (Zeleni). Dotal běchu kolesowarske pućniki „jedne z najwjetšich zbywacych twarnišćow“ na polu dwurěčnosće w zjawnym rumje. Wosebje we łužiskej jězorinje, ale tež na wjele městnach wokoło Budyšina dotal scyła žane serbske wjesne mjena widźeć njejsu, hačrunjež maja po serbskim zakonju wšitke pućniki dwurěčne być. We wotpowědnej směrnicy Swobodneho stata Sakskeje wo kolesowarskich pućnikach pak njebě serbšćina ze žanym słowom naspomnjena. Tuž chcyše zapósłanča Zelenych w juniju po namjeće Serbow wot statneho knježerstwa wědźeć, hač su we wobłuku wobnowjenja kolesowarskich pućnikow po koncepće „SachsenNetz Rad“ tež na dwurěčnosć Łužicy myslili.
Wjele nadźije njeje
Madźarska so zrěčenju spjećuje
Budapest (dpa/SN). Madźarska so na mjezynarodnym zrěčenju UNO nastupajo migraciju po wšěm swěće njewobdźěli. To je tamniši wonkowny minister Péter Szijjártó w Budapesće po wuradźowanju knježerstwa připowědźił. „Zrěčenje znapřećiwja so rozumnosći a zajimam Madźarskeje“, minister Szijjártó rjekny. Zrěčenje po jeho měnjenju migraciji polěkuje a ma ju samo za čłowjeske prawo, štož njeje z wida Madźarskeje akceptabelne. Nimo toho njetrjechi, zo njeje migraciske zrěčenje, wo kotrymž čłonojo UNO tuchwilu jednaja, za jednotliwe kraje zawjazowace, Szijjártó podšmórny. Madźarska so tuž na tuchwilnych jednanjach w marokkoskim Marrakeshu njewobdźěli a budźe na hłownej zhromadźiznje Zjednoćenych narodow přećiwo dokumentej hłosować.
Ze zrěčenjom, na kotrež bě so hłowna zhromadźizna UNO minjeny pjatk dojednała, chce swětowe zjednoćenstwo ramik za wobchadźenje z migraciju tworić. Podpisać chcedźa „Global Compact for Migration“ w decembru w Marokku. Madźarska so raznje spjećuje, dalšich ćěkancow přiwzać.
To a tamne (19.07.18)
Na 2 300 kilometrow dołhi puć do ruskeho Wjelikeho Nowgoroda, 180 kilometrow južnje Pětrohroda, je so kolona konjacych zapřahow wčera w braniborskim Brücku nastajiła. Dlěje hač dwaj měsacaj budźe 18 ćežkich koni z dźewjeć planowymi wozami po puću. Pozastać chcedźa na 70 stacijach. Sobu maja ekstra za akciju zhotowjeny měrowy zwóń, kotryž ma na kóždej staciji zaklinčeć, zo bychu za swobodnu a měrliwu Europu wabili.
Nócneho měšćanostu chcedźa dźensa wječor w Mannheimje wuzwolić. Dohromady dźesać ludźi je so za zastojnstwo přizjewiło. Hłowny nadawk tajkeho měšćanosty je, nócnu klubowu a korčmowu scenu spěchować, bjez toho zo bychu so wobydlerjo postorkowali.
Za socializm z čłowjeskim wobličom
Reformerojo sej před 50 lětami w Čěskosłowakskej socialistiskej republice politiske a hospodarske změny žadali
Wot lěta 1960 wuwiwaše so w Čěskosłowakskej socialistiskej republice (ČSSR) towaršnostna a hospodarska kriza, kotrejež přičina bě centralistiski system wot komunistiskeje strony (KSČ) nawjedowaneho stata a jeho hospodarstwa. Najebać to pak bě po Němskej demokratiskej republice ČSSR hospodarsce a technisce sobu najsylniši socialistiski kraj Europy. Na čole komunistiskeje strony stejachu stalinisća kaž prěni sekretar Antonín Novotný, štož je so jara na wobmjezowanje nutřkowneje a stronskeje demokratije wuskutkowało. Rozestajenja nastupajo narodnostnu politiku mjez Słowakskej a Čěskej so přiwótřichu. Słowakska komunistiska strona njemóžeše samostatnje rozsudźeć, ale bě wot cyłostatneje KSČ wotwisna. Hospodarska kriza docpě 1963 swój wjeršk, a někotři politikarjo a wědomostnicy wuprajichu so za reformy.
Ota Šik sej změny žadał
Wohlleben z jastwa pušćeny
Mnichow (dpa/SN). Wukaz zajeća přećiwo mužej, kiž bě neonacistiskej teroristiskej trójce NSU pistolu wobstarał, je zběhnjeny. Ralf Wohlleben móžeše jastwo w Mnichowje-Stadelheimje dźensa wopušćić, kaž rěčnica jastwa zdźěli. Strach, zo Wohlleben ćeknje, hižo njewobsteji, informuje Mnichowske wyše krajne sudnistwo. 43lětneho Wohllebena běchu dźens tydźenja k dźesać lětam jastwa zasudźili. Minjene nimale sydom lět sedźeše wón w přepytowanskej jatbje.
Popłatk zasadnje w porjadku
Karlsruhe (dpa/SN). Lěta 2013 zawjedźeny rozhłosowy popłatk Zakładny zakoń zasadnje njerani. Ludźo, kotřiž maja dwě bydleni a dyrbja popłatk dwójce płaćić, pak maja přewulke njelěpšiny. To je Zwjazkowe wustawowe sudnistwo dźensa rozsudźiło. Potrjecheni móža próstwu wo wuswobodźenje zapodać. Hewak pak je měsačny popłatk 17,50 eurow na domjacnosć w porjadku, sudnicy měnja. Popłatk dyrbja wšitcy mějićeljo bydlenja płaćić, njewotwisnje wot toho, hač maja scyła telewizor abo radijo.
Z jednym hłosom rěčeć
Bayerski ministerski prezident Markus Söder (CSU, srjedźa) je ...
Trump so jenož „zaprajił“
Washington (dpa/SN). Po raznej kritice swojich wuprajenjow na wjerškowym zetkanju z ruskim prezidentom Wladimirom Putinom dla je prezident USA Donald Trump twjerdźił, zo je so „zaprajił“. Na nowinarskej konferency z Putinom w Helsinkach bě Trump rjekł, zo nima ruske nutřměšenje do prezidentskich wólbow USA za dopokazane. „Čehodla dyrbjała Ruska za to zamołwita być?“, wón rjekny. Wčera Trump nowinarjam praješe, zo bě poprawom runje to nawopačne rjec chcył: „Čehodla njedyrbjała Ruska to być?“ Prezidentej USA bě tónle „zmylk“ pječa při přehladanju swojich rěčnych manuskriptow napadnył. Hač móže Trump swojich kritikarjow z tym změrować, je skerje njewěste. Dementi Putina bě wón „ekstremnje sylny a mócny“ mjenował. Dopóznaća tajneje słužby USA, kotrež nutřměšenje Ruskeje do wólbow pječa dopokazuja, bě wón zjawnje do prašenja stajał.
Mjeztym jewja so w USA přiběrajcy tež mjez republikanami kritiske hłosy. Sćelak Fox News, Trumpej dotal přichileny, jeho tohorunja kritizuje.
Dołhodobnje bjezdźěłnym pomhać
Berlin (dpa/SN). Němski zwjazkowy minister za dźěło Hubertus Heil (SPD) chce přichodne lěta hač do 150 000 ludźi z dołhodobneje bjezdźěłnosće wjesć. To je wón w rańšim magacinje sćelaka ZDF připowědźił, pokazujo na naćisk zakonja, kotryž chcyše zwjazkowe knježerstwo hišće dźensa wobzamknyć.
Kaž dźěłowy minister rjekny, je drje połoženje na dźěłowych wikach dosć dobre, je pak trěbne, „dołhodobnu bjezdźěłnosć wotstronić, za čož su štyri miliardy eurow k dispoziciji. Nowe městna chcył wón pjeć lět spěchować, hdyž su potrjecheni znajmjeńša sydom lět Hartz IV dóstali a w tym času jenož krótki čas dźěło měli. Minister Heil wotpokaza w tym zwisku kritiku, zo je doba spěchowanja předołha. Ludźo, kotřiž su sydom lět zwonka dźěłowych wikow byli, „trjebaja chwile so zaso do powołanja namakać. Woni trjebaja dołhodobnu perspektiwu.“ Prašani su nětko dźěłodawarjo runje tak kaž pomocne organizacije a komuny.
