Šwika zakaz wikow
Drježdźany (dpa/SN). Krajny zwjazk sakskich ratarjow je zawrjenje tydźenskich wikow pod hołym njebjom raznje kritizował. „Naprawa je katastrofa. Njeje zrozumliwe, čehodla Sakska jako jenički zwjazkowy kraj tajke něšto wukaza“, rjekny hłowny jednaćel Manfred Uhlemann powěsćerni dpa. „Na jednym boku su čerstwe ratarske wudźěłki direktnje z regiona, na tamnym boku njeje strach, so pod hołym njebjom z wirusom natyknyć, wjetši hač w kupnicy.“
Tež na tydźenskich wikach móža prawidła desinfekcije dodźeržeć a wotstawki mjez kupcami samo hišće wjetše być a přihódnišo rjadować. Nimo toho su tajke wiki runje we wjesnych kónčinach mnohim ludźom njeparujomny poskitk, sej žiwidła wobstarać. Zwjazk ratarjow ministerku za strowotnistwo Petru Köpping (SPD) prosy, zakaz zaso zběhnyć.
Merkel prosy ludźi wo sćerpnosć
Berlin (dpa/SN). Zwjazkowa kanclerka Angela Merkel (CDU) ma debatu wo tym, hač njemóhli wšelake naprawy přećiwo rozpřestrěću koronawirusa zaso zběhnyć, za přechwatanu. Wona chcyła „jara jasnje rjec, zo njeje hišće načasu wo wolóženjach nastupajo naprawy rěčeć“, kaž wčera w Berlinje wuzběhny. Ličba nowoinfekcijow je dale wulka. Zaměr naprawow je, strowotniski system njepřežadać. Kanclerka dyrbi tuž „ludźi w Němskej wo sćerpnosć prosyć“. Zdobom wona připowědźi, „wo wolóženju naprawow hakle rozmyslować, ručež su pozitiwne efekty widźeć. Bohužel smy wot toho hišće cyły kónc zdaleni.“
W Němskej je so mjeztym nimale 44 000 ludźi z wirusom natyknyło, 6 600 wjace hač dźeń do toho. Je to najwjetši rozrost w dotalnej krizy scyła. Po wšej republice je 267 pacientow zemrěło. Zwjazk a kraje su dotal njesłyšane naprawy wukazali, zo bychu rozšěrjenju wirusa zadźěwali. Hłownje maja so socialne kontakty wobmjezować. Mjeztym pak je hižo rěč wo tym, naprawy zaso zběhnyć.
Po jutrach wšitko normalne?
W Pólskej wirusa dla razne naprawy wukazane – premier optimistiski
Waršawa. Naprawy pólskeho knježerstwa přećiwo koronawirusej so na towaršnostne žiwjenje a na wšědny dźeń wobydlerjow sylnje wuskutkuje. Wot srjedy maja Polacy přikazane w swojich bydlenjach a domach wostać. Wuwzaće je puć na dźěło a domoj, do wobchoda abo apoteki. Za pomocnikow w boju přećiwo pandemiji płaća wosebite rjadowanja. Wjace hač dwě wosobje njesmětej so wotnětka w zjawnosći zetkać. W busach a tramwajkach ma kóžde druhe městno njewobsadźene wostać. Mjeza kraja wostanje zawrjena. Polacy, kotřiž so do swojeje domizny nawróćeja, dyrbja tam najprjedy raz dwaj tydźenjej do karanteny. Bože mšě smědźa drje so dale wotměwać, wjace hač pjeć wosobow pak njesmě so na nich wobdźěleć. Pohrjeby a wěrowanja su jenož hišće we wuskim kruhu swójbnych. Naprawy płaća najprjedy raz hač do ćicheje soboty, 11. apryla.
Što wšo z nuzy wurosće
To a tamne (27.03.20)
Zwada wo nuznikowu papjeru je so w hornjobayerskim Bergneustadće wo to postarała, zo dyrbješe policija zakročić. Dokelž smědźeše jenož jedyn paket papjery kupić, je so 54lětna žona z protesta na běžaty pas před kasu sydnyła a tak předawarkam dźěłać njezmóžniła. Policistam so wona masiwnje wobaraše, rjeješe a ćisny so na zemju. Zastojnicy dyrbjachu ju sputanu k awtu njesć. Hajzlowu papjeru njeje na kóncu žanu měła.
Bjez wopytowarjow so tež „zwěrjatam w Berlinskej coologiskej zahrodźe wostudźi“, měni rěčnica coowa Philine Hachmeister. „Runje wopicy wopytowarjow rady wobkedźbuja. Tež ćulenje a papagaje su wćipne a stajnje chětro napjate, štó takle nimo chodźi.“ Berlinski coo je koronakrizy dla zawrjeny a ćerpi tuž pobrachowacych wopytowarjow dla. Tam bydli 30 000 zwěrjatow.
Do swobody so nawróćić?
Debata wo móžnych škodach wobmjezowanja coronawirusa dla
Berlin (dpa/SN). „Swójby su w tuchwilnej krizy coronawirusa dla wosebje potrjechene. Pandemija je jim hoberske wužadanje, zawrjene šule wunjesu staršim, kotřiž powołansce dźěłaja, wulke ćeže, hladanje dźěći zaručić“, zwurazni zapósłanča Lěwicy w Němskim zwjazkowym sejmje Sabine Zimmermann powěsćerni dpa. Nimo toho bědźa so starši, kaž najwjace dźěławych, ze starosćemi nastupajo financielny přichod, wona rjekny. Tohodla dyrbjał so stat bóle wo swójby starać. „To žada sej spěšne zhromadne prócowanja Zwjazka a krajow.“
Pruwowanja maja być
Berlin (dpa/SN). Najebać krizu coronawirusa dla maja so kónčne pruwowanja w šulach Němskeje přewjesć. Na to su so kultusowi ministrojo zwjazkowych krajow wčera na widejowej konferency dorozumili. „Wokomiknje kraje zwěsćeja, zo njetrjebaja pruwowanja wupadnyć“, rěka w zhromadnym wobzamknjenju. Minjene dny běchu iritacije nastali, po tym zo bě schleswigsko-holsteinska kubłanska ministerka Karin Prien (CDU) připowědźiła wšitke pruwowanja wotprajić.
Spahn: Koncept z krizy
Berlin (dpa/SN). Němski zwjazkowy minister za strowotnistwo Jens Spahn (CDU) chce koncept za mjenje masiwne wobmjezowanje wšědneho žiwjenja ludźi coronawirusa dla zdźěłać. „Prašenje, kak móžemy krizowy modus zaso wopušćić, je z kóždym dnjom wažniše“, rjekny Spahn nowinarjam. Hač k jutram chcył wón na tele prašenje wotmołwić, kaž přilubi. Při tym dźe jemu wo „swědomitu runowahu mjez swójskej zamołwitosću a statnej kontrolu“. Wosebje wažne je, starych a chronisce chorych škitać.
EU wuradźuje wo połoženju
EU: Němska dyrbi bój přećiwo rasizmej zesylnić
Berlin/Brüssel (SN). Antidiskriminowanski běrow zwjazkoweho knježerstwa wita najnowšu rozprawu Europskeje komisije přećiwo rasizmej a njetolerancy (ECRI) a podpěruje w nim zakótwjene poručenja. Tak sej tam mjez druhim žadaja, bój přećiwo prawicarskemu ekstremizmej a rasizmej zesylnić, přećiwo hidźe w interneće efektiwnišo postupować a antidiskriminowanski běrow z přidatnymi kompetencami wuhotować. ECRI, gremij Europskeje rady, bě w swojej mjeztym šestej rozprawje połoženje w Němskej nastupajo rasizm, antisemitizm, njetolerancu a nastajenje napřećo homoseksualnym přepytował.
Rozprawa ECRI podšmórnje, zo dyrbjała Němska raznišo přećiwo rasizmej a diskriminaciji postupować, rjekny komisariski nawoda mjenowaneho běrowa Bernhard Franke w Berlinje. „Je derje, zo ECRI jasnje wuzběhuje, kak wažne su skutkowne prawo za runostajenje a sylne běrowy Zwjazka a krajow přećiwo diskriminaciji, chcemy-li so problemej wšědneho rasizma chutnje stajeć.“
Dale a wjace natyknjenych
Berlin (dpa/SN). Ličba z coronawirusom natyknjenych w Němskej je so w běhu wčerawšeho dnja wo 4 995 na nětko 36 508 powjetšiła. Kaž Roberta Kochowy institut zdźěla, je mjeztym 198 ludźi na chorosć zemrěło. Uniwersita Johnsa Hopkinsa w USA rěči porno tomu wo 37 323 natyknjenych a 206 zemrětych.
Wot coronawirusa wosebje potrjechena Španiska wobmjezowanja wosobinskeje swobody ludźi dale přiwótřa. Tam ma 47 milionow wobydlerjow hač do 11. apryla w dalokej měrje doma wostać, kaž parlament wčera wobzamkny. Najebać wšitke naprawy so tam wirus dale rozšěrja. Ličba natyknjenych je wčera wo 8 000 na 48 000 rozrostła. Dotal su 3 400 smjertnych woporow zličili. W Italskej ličba nowych infekcijow hižo něšto dnjow snadnje woteběra. Runočasnje pak wosta ličba smjertnych woporow z 683 w běhu dnja dale wulka. Wčera su 3 500 nowoschorjenjow registrowali. W USA je ličba smjertnych woporow coronawirusa dla na 1 030 přiběrała. Po oficialnych informacijach je so tam 68 500 ludźi z wirusom natyknyło.
