Boja so komplikacijow
Zwjazkowe knježerstwo přećiwo serbskim kóncowkam w dokumentach
Berlin (SN/MkWj). Na njedawnej „Rozmołwje ze Saksami“ ministerskeho prezidenta Michaela Kretschmera (CDU) w Budyšinje je so runje tak wo tym rěčało kaž na zjawnym posedźenju sakskeho wuběrka za wědomosć, wysoke šule a kulturu Sakskeho krajneho sejma srjedź junija: Móžnosć, zo móža Serbowki swoju serbsku kóncowku swójbneho mjena do wupokaza zapisać dać. Dokelž dyrbjało zwjazkowe knježerstwo za to wobstejacy zakoń wo změnje mjena za přisłušnikow narodneje mjeńšiny (Minderheitennamensänderungsgesetz) z lěta 1997 wotpowědnje změnić, je so zapósłanča Lěwicy w zwjazkowym sejmje Caren Lay z pisomnym naprašowanjom na zwjazkowe ministerstwo za justicu a škit přetrjebarjow wobroćiła. Wona chcyše wědźeć, ke kajkemu wuslědkej je knježerstwo w Berlinje při pruwowanju wotpowědneje próstwy přišło a hač ma zasadnje za trjeba, zo směli Serbowki specifisku žónsku kóncowku w dokumentach wužiwać.
„-owa“ abo „-aua“?
10. rockowy koncert na Wótšowskej dožiwili
Lubnjow (PB/SN). Něšto stow ludźi je minjeny kónc tydźenja mjeztym 10. rockowy koncert na błótowskej kupje Wótšowska dožiwiło. Tójšto z nich bě z čołmikami k wotležanemu hosćencej přijěło, tak zo ležeše na kóncu wjace hač sto čołmikow w přistawje.
Jedna z nowostkow lětušeho koncerta bě wustup dweju skupin na kóždym wječoru. Nowy wotnajer Wótšowski, Torsten Teichert, bě nimo toho wšelake twarske změny zwoprawdźił. Tak da mjeztym chětro zestarjenej budce wotstronić, zo by wjace městna za jewišćo měł. Tež zastaranje ludźi je přeorganizował a polěpšił. „Sym sej mustwo Kalawskeho měšćanskeho swjedźenja jako podpěru skazał“, hosćencar rjekny. Hižo do zahajenja koncerta dźakowaše so wón wohnjowej woborje a sobudźěłaćerjam wuchowanskeje słužby za zasadźenje. Wosebity dźak pak je sej po jeho słowach přirodoškitny hamt krajnoradneho zarjada zasłužił. Bjez jeho dowolnosće njeby tajki koncert wosrjedź Błótow móžny był.
To a tamne (25.07.18)
Wulke mnóstwo mjasa su njeznaći kónc tydźenja z předawanskeje budki w hornjopfalcowskim Weidenje pokradnyli. Nětko policija slědźi, hdźe su so runočasnje wjetše grilowanske partyje wotměli. Wobsedźer budki dyrbješe póndźelu zwěsćić, zo pobrachuja tři kašćiki piwa, 60 steakow, 40 hamburgerow a płunowa bleša. „Z tym móžeš cyłu kompaniju zastarać“, rěčnik policije rjekny. Nětko nadźijeja so pokiwow swědkow.
Woblubowane lubosćinske zamki na Kölnskim Hohenzollernskim mosće tam najprjedy raz wostanu. Po rozprawach wo móžnej demontaži železnica zdźěla, zo nima planowane, turistisku atrakciju wotstronić. Rěčnik železnicy bě póndźelu připowědźił, zo dyrbja zamki poněčim wotstronić, zo móhli móst znowa wobarbić a tak přećiwo zerzawcej škitać. Tole pak je nětko wotstorčene.
Sudnik dyrbi přihłosować
Karlsruhe (dpa/SN). Pacientow psychiatrije smědźa jenož potom dlěši čas k łožu přiwjazać, je-li sudnik tomu přihłosował. Tole je Zwjazkowe wustawowe sudnistwo w Karlsruhe dźensa rozsudźiło. Potrjechenaj z Bayerskeje a Badensko-Württembergskeje běštaj skoržiłoj. Traje-li přiwjazanje dlěje hač poł hodźiny, lěkarski wukaz hižo njedosaha. Přiwjazaja-li pacienta w nocy, dyrbja sej přichodne rano sudniski rozsud wobstarać. Přiwjazanje rani zakładne prawo na wosobinsku swobodu, sudnicy měnjachu.
Kwalita so pohubjeńšiła
Berlin (dpa/SN). Po wospjetnym žadanju rjemjesła jewja so nětko tež w politice hłosy, žadajo sej znowapostajenje mišterskeje winowatosće we wšelakich rjemjeslniskich powołanjach. Městopředsyda frakcije CDU/CSU w zwjazkowym sejmje Carsten Linnemann rjekny nowinarjam: „Wotstronjenje mišterskeje winowatosće bě zmylk. Kwalita dźěła je so w tutych powołanjach zdźěla jasnje pohubjeńšiła. Nimo toho wukubłuja mjenje dorosta.“ Knježerstwo SPD a Zelenych bě 2004 mištersku winowatosć za cyły rjad powołanjow zběhnyło.
Wotewru přechod do Gazy
Strašnaa namócna scena
Woporaj dale na intensiwnej staciji
Srědki za spěšny internet
Informaciska jězba Sakskeho hospodarskeho ministra Martina Duliga
Halštrowska Hola (dpa/SN). Zamołwići Łužiskeje jězoriny chcedźa ličbu hosći wob lěto hač do lěta 2025 podwojić. Tuchwilu přińdźe kóždolětnje 750 000 turistow do regiona južneje Braniborskeje a wuchodneje Sakskeje. Potom ma jich 1,5 milionow być, zastupnicy turistiskeje branše wčera při Parcowskim jězoru zdźělichu. Tam bě so sakski hospodarski minister Martin Dulig (SPD) wo wotpowědnych projektach informował. Při tym wón namjetowaše, wjace turistow ze susodneje Čěskeje nawabić. Hižo nětko něhdźe dźesać procentow hosći wottam přichadźa. W tym zwisku su dalše inwesticije do wodosporta a transporta turistow z łódźemi planowane.
Kanclerka sej Özila jara waži
Katastrofa w Grjekskej –połsta mortwych při wohenjach
Athen (dpa/SN). Wulkej lěsnej wohenjej njedaloko grjekskeje stolicy Athen stej sej po informacijach grjekskeho rozhłosa znajmjeńša 50 smjertnych woporow žadałoj. Njedaloko města Rafina su pomocnicy 26 ćěłow namakali. Do toho bě rozhłós wo 24 smjertnych woporach rozprawjał. Wjace hač 150 ludźi poćerpi zranjenja. Mnozy z nich su w kritiskim stawje. Rybarjo, mórska straža a dowolnicy z gumijowymi čołmami su mjeztym wjace hač 700 ludźi ewakuowali, kotřiž běchu sej před płomjenjemi k morju wućeknyli. Tysacy přenocowachu pod hołym njebjom, w awtach abo sportowych halach. Mnozy spytachu z awtami ćeknyć, štož wjedźeše ke chaotiskim poměram na dróhach. Kura dla wjacore dróhi zawrěchu.
