Chětro hłódni drje běchu paduši, kotřiž su so w badensko-württembergskim ­Ottenhöfenje do rěznistwa zadobyli. Tam so njeznaći porjadnje wucychnowachu a spakosćichu dohromady wosom kilogramow swinjaceho mjasa kaž tež 28 wšelakich słódnych kołbasow. Ze swojej čerstwej rubiznu móžachu so zminyć. Škoda wučinja wjacore sta eurow.

Čućiwy nós policistki je ju ke konopjowej plantaži wjedł. Na přechodźowanju w schleswigsko-holsteinskim Hohen­lock­stedće zwěsći wona intensiwnu wóń konopje, sapacu z jednoswójbneho domu. Jeje kolegojo dom na to přepytachu a namakachu w dohromady pjeć stwach najmodernišu plantažu z 200 rostlinami a 140 sadźenkami, 600 gramow zapakowaneje marihuany a samo dwě pistoli. Sudnik pósła 36lětneho předchłostaneho plahowarja nablaku do jastwa.

Drježdźany/Budyšin (SN/JaW). Na swojim wuradźowanju předwčerawšim w Drježdźanskim sakskim justicnym ministerstwje nača rada Załožby za serbski lud tež naležnosć wo rozšěrjenju Bu­dy­skeho Serbskeho instituta (SI). Kaž zdźěli direktor Załožby za serbski lud Jan Budar po posedźenju na nowinarskej konferency w Budyšinje, njeje rada wo naležnosći hišće rozsudźiła, ale ju na „nazymske posedźenje přestorčiła“.

Pozadk rozmyslowanja SI rozšěrić je, zo tuchwilna kapacita archiwa instituta potrjebje hižo dlěje njewotpowěduje. „Magacin Serbskeho kulturneho archiwa dyrbimy na kóždy pad powjetšić a modernizować. Wšako budźe wón přichodnje dale a wuznamniši. Tohodla dyrbi tež wotpowědne rumnostne a klimatiske wuměnjenja spjelnić“, wobkrući Budar.

Dr. Bernd Fabritius je nowy społnomócnjeny zwjazkoweho knježerstwa za prašenja wusydlencow a narodne mjeńšiny. Zwjazkowy kabinet je 52lětneho rodźeneho sedmihródskeho Saksu wčera do zastojnstwa powołał. To zdźěli mjeńšinowy sekretariat, zepěracy so na nowinsku zdźělenku zwjazkoweho ministerstwa nutřkowneho. Mjeńšinowa rada wjeseli so na zhromadne dźěło z nowym społnomócnjenym. Po słowach jeho předsydy, Saterskeho Frizy Karla-Petera Schramma, „so wosebje nadźijeja, zo knjez Fa­britius kaž jeho předchadnik Hartmut Koschyk so połny angažementa za nas na samsnym niwowje kaž za wšitke dalše jemu připokazane skupiny zasadźa“. Mjeńšinowa rada prócuje so wo bórzomnu prěnju mjezsobnu rozmołwu. Wša­ko njeje Fabritius, kiž ma prawiznisku kencliju z ćežišćom socialnozawěsćenskeho prawa w Mnichowje, zapósłanc zwjazkoweho sejma kaž jeho předchadnicy w zastojnstwje.

Nowa Łuka/Halštrowska Hola (SN). Rada starostow Iniciatiwy za demokratiske legitimowane ludowe zastupnistwo serbskeho ludu je na posedźenju minjenu wutoru dr. Hagena Domašku za wólbneho nawodu powołała. Drježdźanjan wobroći so w swojej na to slědowacej narěči direktnje na serbsku zjawnosć: „Přeprošuju wšitke zjednoćenstwa a skupiny samsnych zajimow, zo bychu mi hač do 25. apryla kmane wosoby jako čłonow předsydstwa za listowe wólby namjetowali. Jich hłowny nadawk budźe, zwěsćić wuslědki na zjawnym posedźenju po zakónčenju wólbneho časa. Woni dźěłaja čestnohamtsce. Kandidatki a kandidaća kaž tež po wólbnym porjadku definowani dowěrnicy njehodźa so jako čłonojo tohole organa powołać.“