Woidke wostanje społnomócnjeny Zwjazka
Podstupim/Frankfurt nad Wódru (RD/SN). Braniborski ministerski prezident Dietmar Woidke skutkuje tež za nowe zwjazkowe knježerstwo jako koordinator za němsko-pólske zhromadne dźěło. Politikar SPD njedźelu rjekny, zo je wospjetny poskitk zwjazkoweho wonkowneho ministra Heika Maasa (SPD) „jara rady přiwzał“. Po słowach Woidki „mamy styki blisko hranicy hajić. Tam so tójšto stawa, za to sym kóždemu jednotliwcej jara dźakowny, kiž so w małym abo we wulkim angažuje.“ Kaž Woidke rozłoži, „mamy z pólskim knježerstwom we Waršawje dobry a konstruktiwny dialog pěstować“. Tohodla wón wuraznje wita, zo staj zwjazkowa kanclerka Angela Merkel (CDU) a wonkowny minister Maas swojej prěnjej jězbje do wukraja krótko po wutworjenju knježerstwa do Francoskeje a Pólskeje wotměłoj.
Puigdemonta Španiskej njepřepodać
Schleswig/Neumünster (SN). Pad w Němskej zajateho bywšeho katalanskeho regionalneho prezidenta Carlesa Puigdemonta budźe justicu w Němskej dlěje zaběrać. 55lětny wostanje dale zajaty, rozsudźi wčera wječor hamtske sudnistwo w Neumünsteru. Sudniski přikaz, Puigdemonta hišće tónle tydźeń Španiskej přepodać, je njepředstajomny.
Mjeztym je so tež Federalistiska unija narodnych mjeńšin (FUEN) k padej wuprajiła, namołwjejo španiske kaž katalanske knježerstwo k dialogej. Chłostanske přepytowanje njeby institucionelnu krizu rozrisało, ale hišće wjac wolija do wohenja lało. Němska měła w europskim zajimje jednać a jednanja wobeńć, kotrež wjedu k dalšej konfrontaciji. Tohodla njeměła Puigdemonta Španiskej přepodać, prezident FUEN Loránt Vincze jasnje zwurazni.
„Europa měła zwólniwa być, w tak łoskoćiwych situacijach wotmołwy dać. Wot wšeho spočatka smy rjekli, zo dyrbi Europa nastupajo katalansku krizu mjez Barcelonu a Madridom posrědkować. Brüssel měł wobě stronje za jednanske blido dóstać.“
To a tamne (27.03.18)
„Muski Cinderella“ bě policiji minjeny pjatk w Połčnicy twochnył. Njeznateho z jenož hišće jednym črijom nětko pytaja. Muž bě w kupnicy 27 titkow worješkow družiny Macadamia spakosćił. Jako chcyše jeho filialny nawoda zadźeržeć, njeznaty twochny. Zhubił pak je po puću črij a wjacore titki z worješkow. Tež w Kamjencu je policija paducha lepiła. Wón smědźeše jej dźesać taflow šokolody přepodać a dósta za to chłostanje.
Poprawom měł sobujěducych w ćahu zastarać, město toho pak je so sobudźěłaćer Němskeje železnicy sam posłužował. Natutkany bě pasažěram njedawno w ćahu z Basela do Berlina napadnył. Tuž so hóršachu. Šef ćaha sobudźěłaćerja bistra tuž prošeše na zastanišću w Braunschweigu wulězć, hdźež policisća hižo na njeho čakachu. K jědźi a piću tuž hač do Berlina ničo njedawaše.
Ruce preč wot „Króny“
Diskusija wo Budyskej měšćanskej hali dale a emocionalniša
Budyšin (CS/SN). Zajim na diskusiji wo přichodźe Budyskeje měšćanskeje hale „Króna“ je jara wulki. To pokaza ličba wobdźělnikow, kotřiž běchu minjeny štwórk přeprošenje strony SPD sćěhowali a do Serbskeho domu přišli. Financny měšćanosta Robert Böhmer (CDU) rysowaše swój wid. Hladajo na kup twarskeho kompleksa přez město je wón chětro skeptiski a warnowaše tuž před njej. Prjedy hač bě so Böhmer słowa jimał, bě šef SPD za město Budyšin a wokolinu dr. Měrćin Krawc swoju poziciju rysował. Po jeho słowach měła so měšćanska towaršnosć do rozsuda zapřijeć. Naposledk pak dyrbja měšćanscy radźićeljo rozsudźić.
Moderny pasion
Lipsk (B/SN). „Hdźež maš ty prawje ...“ rěka moderny pasion, kotryž su Lipšćanscy młodostni sobotu w ewangelskej měrowej młodźinskej cyrkwi w Gohlisu wuspěšnje předstajili. Spisana wot Grit Markert zwjazuje hra aktualne žiwjenske situacije z ćerpjenjom Jězusa.
Starosć wo wěriwych wažna
Vatikan (B/SN). W minjenym tydźenju zetka so Rada kardinalow, kotraž bamža Franciskusa při reformach poradźuje. Wuslědk bě, zo měł so Vatikan bóle wo jednorych wěriwych a wo jich wšědne starosće starać. Franciskus bě do toho w lisće pisał, zo so wo elitu lajkow angažowanych staraja, ale na tamnych bohužel zabywaja.
Festiwal k zničenju Israela
Tři nowe wobliča ze sejma
Berlin (SN/at). Zapósłancaj dr. KlausPeter Schulze (CDU) a Gabriela Heinrich (SPD) staj nowaj čłonaj Němskeho zwjazkoweho sejma w parlamentariskej přiradźe Załožby za serbski lud. Jeju kaž tež zastupowaceju čłonow Andreasa Lämmela (CDU) a Stefana Zierke (SPD) je parlament minjenu srjedu wuzwolił.
Dr. Schulze z Grodka je parlamentariskej přiradźe w minjenej wólbnej periodźe hižo jako zastupowacy čłon přisłušał.
Wšitcy dalši třo zapósłancy su nowačcy w zastojnstwje. Andreas Lämmel z Drježdźan je wot lěta 2005 zapósłanc zwjazkoweho sejma. Gabriela Heinrich pochadźa z wólbneho wokrjesa Nürnberg-sewjer w Bayerskej, Stefan Zierke z wólbneho wokrjesa Uckermark-Barnim w Braniborskej, wobaj přisłušataj parlamentej wot 2013.
Parlamentariska přirada je nimo rady dalši gremij serbskeje załožby a ma šěsć rjadnych a runje telko zastupowacych čłonow. Tuchwilny předsyda parlamentariskeje přirady je serbski zapósłanc Sakskeho krajneho sejma Marko Šiman (CDU), jeho naměstnica Kerstin Kircheis (SPD) z Krajneho sejma Braniborskeje.
Wjele mortwych při wohenju
Kemjerjowo (dpa/SN). Při katastrofalnym wohenju we wulkokupnicy zapadosibirskeho města Kemjerjowo je znajmjeńša 64 ludźi zahinyło. Dalše 40 wosobow je ćežko zranjenych, tamniše zarjady zdźěleja. Wjac hač 500 pomocnikow měješe woheń hakle po hodźinach pod kontrolu. Tuchwilu wuchadźeja zamołwići z toho, zo ličba woporow dale rozrosće. Wjele ludźi je hišće zhubjenych, mjez nimi tójšto dźěći. Woheń bě wčera wječor na štwórtym poschodźe kupnicy blisko kinoweje žurle wudyrił.
Žiwjenske wočakowanje stupa
Wiesbaden (dpa/SN). Žiwjenske wočakowanje w Němskej znowa stupa. Nastupajo nowonarodźenych hólcow su to 78 lět a štyri měsacy, holcy su přerěznje 83 lět a dwaj měsacaj žiwe, informuje Zwjazkowy statistiski zarjad ze sydłom we Wiesbadenje. Tež hižo starši ludźo su dźensa dlěje žiwi. Je-li muž starobu 65 lět docpěł, ma wón dobre šansy, hišće dalše 17 lět a dźesać měsacow žiwy być. Žony móža to po 65. žiwjenskim lěće samo hišće 21 lět.
Steinmeier w Indiskej pobył
Tysacy ludźi přećiwo zajeću protestowali
Dalšej projektaj wobkrućenej
Drježdźany (SN). We wobłuku mjezy přesahowacych kooperaciskich programow Swobodneho stata Sakskeje a Čěskeje republiki w lětach 2014 do 2020 móža nětko dalšej dwaj zwoprawdźić. Přewodźacy wuběrk wobkrući tele dny zhromadnej projektaj we wobjimje 1,2 milionow eurow, kotrejž Europska unija spěchuje. Jedyn z njeju zaběra so z mjezy přesahowacym zachowanjom a wozrodźenjom biodiwersity a pódy, zeleneje infrastruktury kaž tež z posłužbami we wobłuku ekosystema. Gmejnje Polevsko a Okrouhlá chcetej na přikład žiwjenske wuměnjenja pčołkow polěpšić. W projekće „Z pčołkami k susodam lećeć“ wuhotuja we wobdźělenych komunach zelenišća, hdźež móža so insekty zasydlić. Mjezy přesahujcy wojuja tež přećiwo chorosćam pčołkow. EU spěchuje předewzaće z něhdźe 430 000 eurami.
Dalši projekt polěpša institucionelne kapacity zjawnych zarjadnišćow a podpěruje eficientne zjawne zarjadnistwo. Na fachowym systemje zažneho warnowanja za geologiske rizika Połobskich pěskowčinow hnydom wjacore němske a čěske institucije hromadźe dźěłaja. Tež to Europska unija z něhdźe 750 000 eurami spěchuje.
