EU: W Iraku so wujednać

póndźela, 10. julija 2017 spisane wot:

Brüssel (dpa/K/SN). Po tym zo je irakske wójsko město Mossul teroristiskej milicy Islamski stat z rukow wutorhnyło, pomina Europska unija k tomu, dóńć w Iraku spěšnje k wujednanju. „Nětkole je rozsudne, zahajić proces nawróta a wobnowjenja dowěry mjez jednotliwymi zhromadźenstwami, zo móhli wšitcy ludźo Iraka zhromadny přichod natwarjeć započeć“, rjeknyštaj zamołwita EU za wonkowne naležnosće Federica Mogherini a komisar EU Christos Stylianides.

Šofer wjele ludźi wuchował

Podstupim (dpa/SN). Při tragiskim busowym njezbožu z 18 mortwymi w hornjej Frankskej je přidatny busowy šofer tomu zadźěwał, zo hišće wjace ludźi w płomjenjach zahinje. 43lětny bě po zražce hnydom durje busa wočinił a mnohim­ ludźom z palaceho jězdźidła pomhał, kaž policija a statne rěčnistwo dźensa zdźělatej. Bus ze Sakskeje bě 3. julija na awtodróze A 9 njedaloko Münchberga pola Hofa do stejaceho nakładneho awta zrazył a so zapalił. Třiceći ludźi je katastrofu přežiwiło.

Ministrej wustup zakazali

Trump: Z Ruskej hromadźe dźěłać

póndźela, 10. julija 2017 spisane wot:
Washington (dpa/K/SN). Ameriski prezident Donald Trump je za to, skónčić diskusiju wo tym, hač su Rusojo wólby w USA wobwliwowali. To zwurazni wón tweetnje po nawróće z Hamburgskeho wjerška G 20. Trjeba je nětko so do­prědka hibać a z Ruskej konstruktiwnje hro­madźe dźěłać. Jako přikład mjenowaše Trump wzajomnje z Ruskej a Jordaniskej wujednany přiměr za juhozapad Syri­skeje. Wón so takle wupraji, dokelž diskutuja w USA wo tym, hač je prezident twjerdźenje Putina přiwzał, zo njeje so Ruska do ameriskich wólbow měšała. Kritikarjo Trumpej wumjetuja, zo je Putina na pokoj wostajił, a hódnoća zetkanje přewažnje jako toho wuspěch.

Dalše jednanja wo Syriskej

póndźela, 10. julija 2017 spisane wot:
Genf (dpa/K/SN). W šwicarskim Genfje je so dźensa dalše koło jednanjow wo Syriskej z posrědkowanjom Zjednoćenych narodow zahajiło. Wurjadny posrědkowar UNO Staffan de Mistura je wšak hnydom na spočatku před přewulkimi wočakowanjemi warnował. Kaž hižo při prjedawšich kołach jednatej knježerstwo a opozicija­ tež tónkróć jenož posrědnje. Škričku nadźije zbudźa nowy, mjez Ruskej, Jordaniskej a USA wzajomnje do­jednany regionalny přiměr, kotryž płaći wot wčera­wšeho za juhozapad Syriskeje a so dotal po informacijach njewot­wisnych wobkedźbowarjow w dalokej měrje dodźerži. Prěni króć po jednym lěće­ su při tym USA zaso wobdźělene na kročeli­ k de­eskalaciji.

„Chaoća lěpšiny měli“

póndźela, 10. julija 2017 spisane wot:

Debata wo konsekwencach po namócnosćach w Hamburgu

Hamburg (dpa/SN/MkWj). Po namócnosćach w Hamburgu w zwisku z wjerškowym zetkanjom G 20 je debata wo politiskej zamołwitosći wudyriła.

Ze stron CDU a FDP wumjetuja Hambursgkemu wyšemu měšćanosće Olafej Scholzej (SPD), zo je strach přez lěwicarskich ekstremistow złahodnjał a wopak posudźował. Frakciski šef CDU w Hamburgskim senaće André Trepoll rěčeše wčera wo „najwjetšim politiskim zmylku Hamburgskeho měšćanosty wšěch časow“ a žadaše sej toho wotstup. Scholz wotpokaza to wčera wječor we wusyłanju telewizije ARD „Anne Will“ ze sło­wami „,ně, to nječinju“.

Podpěru dósta Scholz ze stron nawody kanclerskeho zarjada Petera Altmaiera (CDU). „Njemóžu wopodstatnjenje spó­znać, čehodla dyrbjał wón wotstupić“, rjekny Altmaier dźensa w rozhłosu. Po jeho słowach njeńdźe wo prašenje stronskopolitiskeho rozestajenja, ale wo „rozestajenje mjez demokratami, kotřiž prawniski stat zakituja“, z radikalnymi, awtonomnymi a lěwicarskoradikalnymi mjeńšinami, kotrež stat wužaduja.

Nowe wulce kwalitatiwne kubłanišćo

póndźela, 10. julija 2017 spisane wot:

Budyšin (SN/MkWj). Wutwar něhdyšeje Budyskeje policajskeje šule na wotnožku Rózborskeje wysokeje policajskeje šule je na dobrym puću. Tole zdźěli serbski zapósłanc CDU w Sakskim krajnym sejmje Marko Šiman tele dny na nowinarskej rozmołwje. Hakle njedawno bě krajny sejm 800 000 eurow přidatnje přizwolił, z čimž so cyłkowna inwesticiska suma na 5,9 milionow eurow zwyši.

Nastać ma nowy wukubłanski centrum na najwyšim niwowje. Nimo wysokeje šule chcedźa tam tež zastojnikow awtodróhoweje policije a wotnožku kriminalneje policije Zhorjelskeje policajskeje direkcije zaměstnić. Při tym maja w Budyšinje dobre wuměnjenja. Objekt na Mužakowskej je wulki dosć. Tak móža twarske naprawy zwoprawdźić, bjez toho zo bychu wukubłanje stražneje policije mylili. Planowarjo móhli so hižo nětko do dźěła dać. Klětu drje so twarske dźěła zahaja, je sej zapósłanc sakskeho sejma wěsty. Hač do lěta 2022 dyrbjało wšitko dotwarjene być.

Wopačna debata

póndźela, 10. julija 2017 spisane wot:
Tele wobrazy drje so do kolektiwneho pomjatka zaryja: wjerškowe zetkanje G 20 w Hamburgu, zwjazane z namócnosćemi, palacymi so awtami a wodomjetakami. Nětko Němska zaso debatuje, kak strašny lěwicarski ekstremizm je. Móžu sej derje předstajić, zo su wonym statnikam, kotřiž běchu so w Hamburgu schadźowali, wobrazy namócnosćow cyle lube. Tak znajmjeńša njetrjebaja sej za­stupnicy dwaceći najwažnišich industrijnych a prohowych statow njepřijomne prašenja lubić dać: Na čo sće so w kónčnej deklaraciji poprawom dojednali? Što chceće swojim wolerjam doma rozprawjeć? Kajki zmysł tajke zetkanja maja, hdyž na kóncu ničo njewuskoči hač horcy powětr? Budźe swět nětko sprawniši, lěpši a čisćiši? My dyr­bjeli wjele bóle wo tychle prašenjach debatować a nic tak jara wo tym, hač měł Hamburgski wyši měšćanosta wotstupić abo nic. Marko Wjeńka

Požadarjo azyla wopušćeja hotel

póndźela, 10. julija 2017 spisane wot:
Prěnja skupina požadarjow azyla je dźensa Budyski Sprjewiny hotel wopušćiła a do druhich­ přebywanišćow přećahnyła. Srjedu wotjědźe dalša skupina, cyłkownje 170 wosobow. Přichodny kónc tydźenja zrěčenje wo wužiwanju hotela jako dom požadarjow­ azyla wuběži. Nětko chcedźa tam integraciski centrum za připóznatych požadarjow azyla zarjadować. Woni maja w domje bydlić a wottam na dźěło abo na powołanske­ wukubłanje jězdźić. Foto: Steffen Unger

To a tamne (10.07.17)

póndźela, 10. julija 2017 spisane wot:

Je wona kusnyła abo nic? Kóčka steješe dźensa w srjedźišću procesa wotškódnjenja dla na krajnym sudnistwje w Ingolstadće. Wona bě samo wosobinsce přitomna, zo by napřećostajenje z pječa kusnjenej žonu móžne było. Ta twjerdźi, zo bě so kóčka 9. januara do jeje nohi zakusnyła a bolacu ranu zawostajiła, a žada sej 2 000 eurow wotškódnjenja. Wobsedźerka dwěluje, zo je jeje kóčka žonu kusnyła, wšako móhła to kóčka susodki być.

Zwada štyrjoch maćerjow wo městno za dźěćacy wozyčk w busu je w Bremenje w hotowej bijeńcy z třomi zranjenymi policistami wuwjercholiła. Jedna ze žonow zawoła swojeho muža, kiž z bratrom k busej přińdźe. Jako wjacori policisća přijědźechu, daštaj so mužej do nich. Ně­hdźe 50 ludźi rozestajenju před busom přihladowaše. Z wulkozasadźenjom so poradźi zwadźenych změrować.

Kardinal Meisner na marach

pjatk, 07. julija 2017 spisane wot:

Köln (dpa/SN). Zemrěty kardinal Joachim Meisner steji wot dźensnišeho hač do póndźele w Kölnje na marach. W romaniskej bazilice swj. Gereona maja wěriwi składnosć, so z nim rozžohnować, kaž rěčnik Kölnskeho arcybiskopstwa zdźěli. Pochować chcedźa něhdyšeho Kölnskeho arcybiskopa sobotu, 15. julija. Kašć přewodźeja potom w procesionje ke Kölnskej hłownej cyrkwi, hdźež Meis­nera­ w biskopskej krypće pochowaja.

Mortwi při wojowanjach

Acapulco (dpa/SN). Při wojowanjach mjez znjepřećelenymi cwólbami w mexiskim jastwje je 28 ludźi žiwjenje přisa­dźiło. Wojowanja běchu rano w kłódźe wočerstwjenišća Acapulco wudyrili. Wěstotne mocy trjebachu wjacore hodźiny, zo bychu połoženje pod kontrolu dóstali. W jastwje sedźa wulkozłóstnicy.

Prěnje zajeće pola Audi

Wobskóržbny spis pominany

pjatk, 07. julija 2017 spisane wot:
Berlin (dpa/K/SN). Zwjazkowe knježerstwo zasadźa so dale naležnje za to, zo Turkowska zajateho žurnalista Deniza Yücela na swobodu pušći. Dlěje hač 140 dnjow je wón mjeztym w přepytowanskej jatbje, wot prezidenta Recepa Tayyipa Erdoğana winowany terorizma a čušlenja za Němsku. Berlin pomina sej k tomu wobskóržbne pismo. „Zasada pra­wostatnosće žada sej wobskóržbny spis, w kotrymž je konkretnje pomjenowane, što někomu wumjetuja. Dotal mamy jeničce­ předzasudźowanja Yücela ze strony knježacych, kotrež jeho jako tero­­rista a spiona difamuja“, rjekny statny minister­­ we wonkownym ministerstwje Michael­ Roth (SPD).

Serbska debata

nowostki LND