To a tamne (20.07.17)

štwórtk, 20. julija 2017 spisane wot:

Mać z čerstwej całtu k narodninam překwapić chcyše štyrilětny w badensko-württembergskim Gundelfingenje, je pak při tym zasadźenje policije zawinił. Pjerach bě wčera rano samlutki do wobchoda přišoł a sej całtu žadał. Předawarka pak so starosćeše a zawoła policiju. Zastojnicy hólčka na to pěši domoj přewodźachu. Mać bě za nim hižo pytała. Tón bě so skradźu z bydlenja zminył a so nětko z policiju nawróći – wězo z čerstwej całtu za mać jako narodninski dar.

Z awtom so přećisnył a dale jěł je 93lětny na zwjazkowej dróze pola Gery. Na parkowanišću njedaloko městna njezboža w Altenburgskim kraju wón skónčnje zasta. Byrnjež so po wšěm zdaću njezranił, dowjezechu jeho do chorownje. Kak je k njezbožu dóšło, njemóže sej policija tak prawje wujasnić. Muž bě z jězdnje zjěł, do wobhrodźenja prasnył a so přećisnył.

Tel Aviv (dpa/K/SN). Dalše njeměry blisko Temploweje hory w Jerusalemje su sej dźensa 14 zranjenych Palestinjanow žadali. Tež policistaj poćerpještaj zranjenja. Palestinjan, trjecheny wot woclanych, z gumijom wobdatych kulkow, je ćežko zranjeny, rozprawja Palestinski čerwjeny křiž. Strona Fatah prezidenta Palestinjanow Mahmuda Abbasa je na ludnosć apelowała, přewjesć dźensa „dźeń hněwa“. Hamas a Dźihad stej to­horunja k protestam namołwiłoj.

Žada sej wjace respekta

Berlin (dpa/SN). Zwjazkowy prezident Frank-Walter Steinmeier je sej po namócnosćach w Hamburgu w zwisku z wjerškowym zetkanjom G 20 wjace respekta před policiju žadał. „Někotři su respekt před statnymi institucijemi, kaž na přikład před policiju, wočiwidnje zhubili“, rjekny wón nowinarjam. Zdobom warnowaše před alarmizmom: „Demokratija w Němskej njeje wohrožena, najebać krawale.“ Podawki w Hamburgu su jemu dopokaz, zo je stat jednanjakmany.

Wulkopósłanc USA powołany

Britiski princ William, jeho mandźelska Kate kaž tež dźěsći George a Charlotte su dźensa z Pólskeje přišedši w Berlinje přizemili. Z lětanišća Tegel podachu so do kanclerskeho zarjada, hdźež jich zwjazkowa kanclerka Angela Merkel (CDU) witaše. Na swojim třidnjowskim wopyće chcedźa sej tež Heidelberg a Hamburg wobhladać. Planowane su pak tohorunja politiske rozmołwy, mjez druhim wo brexiće. Foto: dpa/Bernd von Jutrczenka

Turkowska znowa raznje kritizowana

srjeda, 19. julija 2017 spisane wot:
Berlin (dpa/K/SN). Němska kanclerka Angela Merkel (CDU) je zajeće wojowarja wo čłowjeske prawa Petera Steudtnera w Turkowskej kritizowała a sej jeho pušćenje žadała. „Ze strony zwjazkoweho knježerstwa budźemy wšo za to činić, na wšitkich runinach, dóstać jeho zaso na swobodu“, wona zwurazni. „Je to bohužel dalši pad, zo dóstanu so njewinowaći ludźo do młynow justicy a tak tež do zajeća. Tohodla je to přičina najwjetšeje starosće.“ Zajeće Steudtnera a pjeć dalšich ludźi tydźenja w Istanbulu je mjezynarodnje wulku rozhorjenosć zbudźiło. Statne rěčnistwo jim wumjetuje, zo su podpěrali „wobrónjene teroristiske organizacije“. Tež USA naprawu zasudźeja.

„Małoruska“ nowy stat na wuchodźe?

srjeda, 19. julija 2017 spisane wot:
Donjeck/Kijew (dpa/K/SN). Proruske mocy wuchodneje Ukrainy su nowy stat z mjenom „Małoruska“ proklamowali. „Mamy za to, zo stej Luganska ludowa republika a Donjeckowska ludowa republika – Krim sobu njeliči – jeničkej teritorijej Ukrainy, hdźež wobsteji knježerstwo po zakonju“, rjekny jich nawoda Aleksander Sacharčenko. Nimo toho ma we wot Kijewa wotpadnjenych kónčinach tři lěta wuwzaćny staw knježić, po kotrymž su mjez druhim strony zakazane. Reakcije prozapadneho Kijewskeho nawodnistwa najprjedy jónu žaneje njeje. Naměstny ruski wonkowny minister Leonid Kalašnikow je postupowanje kritizował, dokelž spřećiwja so měrowemu planej za Donbas.

Z eura zbywaja jenož 45,4 centy

srjeda, 19. julija 2017 spisane wot:

Berlin (SN/MkWj). Zwjazk dawkipłaćerjow Němskeje hladajo na dźensniši wopomnjenski dźeń dawkipłaćerjow 2017 na to skedźbnja, zo je poćežowanje wobydlerjow z dawkami a wotedawkami tak wulke kaž hišće nihdy. Statistisce su ludźo hač donětka jeno za stat dźěłali. Hakle wot dźensnišeho dźěłaja za swójsku móšnju. Ludohospodarska kwota poćežowanja z dawkami wučinja lětsa rekordne 54,6 procentow. Z kóždeho eura zbywaja ludźom tak jenož 45,4 centy.

Hłowna přičina mjenowaneho wuwića su tajne zwyšenja dawkow. Pozitiwne wuwiće mzdow a dochodow ćeri ludźi do dźeń a wyšich dawkowych sadźbow. Zwjazk dawkipłaćerjow je so tuž z jasnymi žadanjemi na zwjazkowe knježerstwo wobroćił. Tak měli so tarify mzdowych dawkow znowa rjadować. „Njesmě być, zo dyrbi fachowy dźěłaćer z powołanskim nazhonjenjom naraz najwyšu dawkowu sadźbu płaćić, bjez toho zo by woprawdźe derje zasłužił.“

Duda podpismo zapowědźił

srjeda, 19. julija 2017 spisane wot:

Debata a demonstracije justicneje reformy w Pólskej dla

Waršawa (dpa/SN). Pólski statny prezident Andrzej Duda je do diskusije wo justicnej reformje zapřimnył, z kotrejž chcyło narodnokonserwatiwne knježerstwo přichodnje wuzwolenje sudnikow wobwliwować. Duda předpołoži mjeztym swójski naćisk reformy, kaž wón wčera we Waršawje připowědźi.

Zdobom je Andrzej Duda njedawno wobzamknjenemu zakonjej knježaceje narodnokonserwatiwneje strony Prawo a sprawnosć (PiS) swoje podpismo zapowědźił. „Njepodpisam reformu najwyšeho sudnistwa, jelizo parlament do toho mój naćisk njeschwali.“ Pólski sejm, w kotrejž PiS z absolutnej wjetšinu knježi, bě zakoń minjeny tydźeń wobzamknył. Z nim ma knježerstwo direktny wliw na to, wuzwolić krajnu radu sudnikow – wustawowy organ k dohladowanju njewotwisnosće justicy. Tak by na přikład justicny minister prawo dóstał, sudnikow powołać a zaso pušćić.

Łužica měła wólbna tema być

srjeda, 19. julija 2017 spisane wot:

Choćebuz (SN/MkWj). Energijowy region Łužica-Błóta a Hospodarska iniciatiwa Łužica žadatej sej w zhromadnym stejišću aktiwnu podpěru zwjazkoweho knježerstwa za strukturnu změnu we Łužicy. Łužica měła jako tema w boju nastupajo wólby zwjazkoweho sejma w septembru kaž tež w pozdźišim koaliciskim zrěčenju kruće zakótwjena być.

Najnowšich wobzamknjenjow zwjazkoweho knježerstwa w zwisku z planom wo škiće klimy dla a z tym zwisowacym kóncom zmilinjenja brunicy hrozy strach, zo Łužica hač do 15 000 dźěłowych městnow zhubi, rěka we wčera wozjewjenym dokumenće. Zwjazkowe knježerstwo je tuž winowate, potrjechene kónčiny při wuwiću perspektiwow za přichod kaž tež při wutworjenju nowych dźěłowych městnow podpěrać. Wobě iniciatiwje sej mjez druhim žadatej, zo měł Zwjazk swoje zarjady we Łužicy zasydlić a předewzaćam z wotpowědnym spěchowanjom zaměstnjenje wolóžić. Stejišćo chcedźa nětko wšitkim łužiskim kandidatam připósłać.

To a tamne (19.07.17)

srjeda, 19. julija 2017 spisane wot:

Tři měsacy stare hojo je pos w Americe z morja wuchował. Golden Retriever z mjenom Storm bě so w přistawje Jefferson Harbor w Long Island pola New Yorka kupał. Nadobo wuhlada wón zabłudźene sornjatko w morju. Bjez wahanja je Storm za šiju hrabny a na pobrjóh donjese. Widejo wo akciji, wot Marka Freeleyja w interneće wozjewjeny, su sej mjeztym statysacy wobhladali. Hojeću, kotrež dowjezechu do zwěrjatownje, so mjeztym zaso derje dźe.

Na wšě 400 konopjowych rostlin je biologa w ruskim měsće Togliatti w swojim bydlenju plahował. Rostliny stejachu samo na přetwarjenym łožu a w kamorach. We wjelbiku namakachu zastojnicy nimo toho sydom kilogramow marihuany w hódnoće wjace hač 2,5 milionow rublow (něhdźe 36 000 eurow). Policija biologu-plahowarja konopje zaja.

K smjerći kardinala Meisnera

wutora, 18. julija 2017 spisane wot:

Köln (B/SN). K smjerći kardinala Joachima Meisnera pisa předsyda Němskeje biskopskeje konferency, kardinal Reinhard Marx, mjez druhim: „Z jeho smjerću zhubi cyrkej w Němskej wěriweho katolika, kiž je hač do kónca swoju poziciju zaběrał, je stał k swojim přeswědčenjam a je mnohe lěta swoju wědu a swoje kompetency katolskej cyrkwi wěnował. Je zmužity wojowar był.“ Njeboćički je woporliwje katolsku cyrkej w dźělenej Němskej sobu tworił. Wosebje w NDR, hdźež běše swjećacy biskop w Erfurće a po tym biskop w Berlinje, chcyše wón katolikow ke Chrystusej wjesć. A jako předsyda biskopskeje konferency móžeše wjele wuskutkować, stajnje z wotstawkom k mócnarjam, dokelž bě jemu swoboda wěry to najwažniše.

Benediktinojo z nowym nawodu

Rom (B/SN). Abt Gregory Polan z USA je nowy primas benediktinow. Wuzwoleny bu wón za naslědnika Němca Notkera Wolfa, kiž bě zastojnstwo po 16 lětach złožił. Abtowy primas je najwyši reprezentant wšitkich 22 000 benediktinow a benediktinkow swěta.

Cyrkej kritizuje CSU

Serbska debata

nowostki LND