Drježdźany (SN/MkWj). W diskusiji wo perspektiwach přichoda Łužicy žada sej sakski zapósłanc FDP w zwjazkowym sejmje a zastupnik liberalnych we wuběrku za wobchad a digitalnu infrastrukturu Torsten Herbst infrastrukturnu ofensiwu za wobchadnu syć a digitalnu techniku. Financować měli ju z wurjadneho fondsa za Łužicu. „Kwalita infrastruktury a hospodarski přichod Łužicy stej njedźělomnej. Tohodla trjeba Łužica ofensiwu na dobro lěpšeje wobchadneje infrastruktury. Mobilita ludźi a tworow runje tak kaž wutwar spěšneho interneta dyrbitej so rozsudnje polěpšić“, rěka w zdźělence zapósłanca. Wusahowace wobchadne projekty, kaž železniska čara wot Zhorjelca přez Běłu Wodu do Choćebuza abo elektrifikacija železniskeje čary mjez Drježdźanami a Zhorjelcom, měli so tuž pospěšić a z wurjadneho fondsa za strukturnu změnu płaćić. To samsne potrjechi sewjero-južny nadróžny zwisk mjez awtodróhomaj A 4 a A 15. Nimo toho móhli so dźěle Łužicy z pospytnej kónčinu za nowy mobiloškričkowy standard 5G stać. Tón je mjez druhim wažne wuměnjenje za awtonomne jězdźenje.

„Němskej so derje dźe, štož mje zwjesela.“ Tute wuprajenje zwjazkoweje kanclerki Angele Merkel (CDU) kabaretisća rady wužiwaja, hdyž chcedźa na socialne problemy w Němskej skedźbnić, na přikład na přiběracu chudobu w starobje. Nětko su ličby oficialne: Nimale połojca rentnarjow w Němskej nima wob měsac wjace hač 800 eurow. To najhórše na tym pak je: Podźěl ludźi na hranicy chudoby přiběra. To je tež wuslědk woneje reformy dźěłowych wikow knježerstwa SPD a Zelenych z lěta 2004, kotraž mjenowaše so Agenda 2010. Wona skićeše mjez druhim móžnosć, ludźi za přewšo snadnu mzdu dźěłać dać. To drje je Němskej hospodarski rozmach a (pječa) mało bjezdźěłnych wunjesło. Na tamnym boku pak so ličba chudych a tak njespokojnych ludźi dale powjetša. Hdyž knje­žerstwo na tym polu ničo njezměni, nje­trjeba so wólbnym wuspěcham populistow dźiwać. Marko Wjeńka

Sakska ministerka Eva-Maria Stange: Mały dźěl njesprawnosće zarunać

Drježdźany (SN/MkWj). Statne wuměłske zběrki w Drježdźanach přepodachu srjedź junija Pólskej republice 124 etnografiskich objektow a 14 historiskich fotografijow za Muzej archeologije a etnologije we Łódźi. Tak su so po 78 lětach někotre z poslednich dźělow něhdy ­wobšěrneje zběrki na swoje domoródne městno wróćili. Sakska statna ministerka za wuměłstwo a wědomosć dr. Eva-Maria Stange (SPD), pólski minister za kulturu a narodne kulturne herbstwo prof. Piotr Gliński a direktor Łódźskeho muzeja prof. Ryszard Grygiel su přepodaće objektow wutoru oficialnje wobkrućili. „Na tym dnju dopominamy zdobom na surowy wotrězk našich zhromadnych stawiznow. Ćim bóle so wjeselu, zo nas kulturne drohoćinki, pochadźace z Južneje Ameriki, Azije a Afriki, dźensa we Łódźi zjednoćeja. Z přepodaćom kulturnych objektow chcemy mały dźěl njesprawnosće zaso zarunać, kotruž su Němcy za čas nacionalsocializma w Pólskej skućili.

Najdlěše nochće swěta su wottřihane a wotnětka w muzeju widźeć. 82lětny Indičan Shridhar Chillal nochće, kotrež běchu minjene 66 lět na jeho lěwej ruce na nimale 200 centimetrow narostli, prezentowaše je wčera w New-Yorkskim ­muzeju kuriozitow. Tam leža nětko we witrinje. Indičan njebě nochće wot 1952 wjace třihał. Lěta 2014 běchu je do Guinnessoweje knihi rekordow zapisali.

Wulka myš je w awstralskim wulko­měsće Adelaide 2 000 wopytowarjow baletneje inscenacije na njerjane wašnje ­wuhnała. Krótko do kónca předstajenja „Ćernjawka“ wupadny milina na koncertnej žurli a bu dospołnje ćma. Přihlado­warjo dyrbjachu so z pomocu kapsnych lampow abo swěcy mobilnych telefonow ze žurle won namakać. Skónčnje so wukopa, zo bě wulka myš centralny milinowód měšćanskeje štwórće překusała.