Lěty wupadnyli
Lawrow: Zaměrna prowokacija
Moskwa (dpa/SN). Ruski wonkowny minister Sergej Lawrow ma rozprawy wo syriskim nadpadźe ze chemiskimi brónjemi w měsće Duma za zaměrnu prowokaciju. Ruscy wojerscy fachowcy su mjeztym w měsće byli, bjez toho zo bychu slědy chloroweho płuna našli, rjekny Lawrow w Moskwje. Wumjetowanja zapada, zo Ruska syriske zasadźenje jědojteho płuna přećiwo ciwilistam kryje, je we wočomaj Lawrowa dźěl antiruskeje kampanje, kaž powěsćernja Interfax zdźěla. Po informacijach aktiwistow je při pozdatnym zasadźenju jědojteho płuna w kónčinje Ghuta wjace hač 150 ludźi zahinyło. Tež němske knježerstwo w Berlinje na to tuka, zo je syriske knježerstwo za nadpad zamołwite.
Mjeztym je organizacija za zakaz chemiskich bróni přepytowanja zahajiła. Tak chcedźa rozprawy potrjechenych analyzować a na městnje informacije wo zasadźenych chemiskich maćiznach zběrać. Nimo toho prašeja so swědkow a bjeru pódu a druhe maćizny, zo móhli je w laborje na jěd přepytować.
Spřećiwjeja so ministrej
Zwjazk městow a gmejnow kritizuje posudk sakskeho knježerstwa
Drježdźany (SN/MkWj). Sakske komuny su po słowach financneho ministra Matthiasa Haßa (CDU) pjenježnje derje wuhotowane. „Mamy fungowacy system“, rjekny Haß tele dny hladajo na financne wurunanje. Powšitkownje njeje trjeba system změnić, wón měnješe. Přiwšěm měł so dale wuwić, dokelž móže w jednotliwych padach přeco zaso k problemam dóńć. Minister přizna, zo wobsteja diskrepancy mjez naladu w gmejnach a dobrym połoženjom swobodneho stata.
Komuny běchu sej w oktobru wjace pjenjez wot swobodneho stata žadali a swoje połoženje ze situaciju w zapadnych zwjazkowych krajach přirunali. Po tym docpěchu města a gmejny Sakskeje lěta 2016 runje 87 procentow přerěznych cyłoněmskich dochodow na wobydlerja. Byrnjež dochody stata přiběrali, připokazanki komunam stagněruja, tehdy rěkaše. Předewšěm małe komuny su wohrožene. Trěbne inwestije wobličichu na něhdźe 6,5 miliardow eurow.
Zaso w starym stilu
To a tamne (10.04.18)
Hinak hač někotryžkuli dorosćeny je so dźěćo w delnjosakskim Bergenje přikładnje zadźeržało: Po tym zo bě ze swojim kolesom njewotpohladnje do parkowaceho awta zrazyła a wóz wobškodźiła, dwanaćelětna holca poł hodźiny podarmo na wobsedźerja čakaše. Tež w bance, před kotrejž awto steješe, njewědźachu, komu wone słuša. Tuž dźěše na policajsku stražu, hdźež so wukopa, zo je limuzina słužbne awto měšćanosty. „To móhł sej tón abo tamny dorosćeny přikład wzać“, policija zadźerženje holcy chwaleše.
Chrobły paduch je dźěćom w Mecklenburgsko-předpomorskim Warenje myto pokradnył, kotrež měješe jim na kóncu detektiwneje hry kiwać. Slědujo wot staršich wupołožene papjerjane šlebjerdki dóńdźechu dźěći skónčnje k jewišću pod hołym njebjom, hdźež měješe přizamknjene koleso stać. Tam pak ležeše jenož hišće skóncowany zamk.
Klětu chcedźa twarić započeć
W měsće nad Sprjewju nastanje nowe wukubłanišćo sakskeje policije
Budyšin (UM/SN). Klětu nalěto maja bagry na Budyskej Kantowej dźěłać započeć. Na to staj so Budyski zapósłanc w Sakskim krajnym sejmje Marko Šiman a sakski minister za nutřkowne naležnosće Roland Wöller (wobaj CDU) při jeho prěnim wopyće we wukubłanišću sakskeje policije, kotrež je na Budyskej Kantowej zaměstnjene, minjeny pjatk dojednałoj. Spočatnje bě so Wöller prašenju, hdy ma so dołho planowany twar skónčnje zahajić, hišće wuwinył. Šiman pak tłóčeše: Dalše dlijenje njesmě być. Wón poćahowaše so na připrajenje bywšeho ministerskeho prezidenta Stanisława Tilicha (CDU), po kotrymž chcychu wukubłanski centrum hižo lětsa rozšěrjeć započeć. Hłowna přičina dlijenja leži po słowach Wöllera w sakskim financnym ministerstwje – w tamnišim statnym zawodźe za imobilije a twarske naležnosće, hdźež nimaja pječa dosć planowarjow. Přiwšěm je sej sakske knježerstwo přezjedne, zo ma so policija zesylnić. Přichodne lěta chcedźa tysac přidatnych městnow wutworić.
Myslenje je najrjeńša zabawa čłowjeka
Budyšin (CS/SN). „Z hosćom w tachantskim wobchodźe“ bě minjenu srjedu intendant Budyskeho Němsko-Serbskeho ludoweho dźiwadła Lutz Hillmann, hdźež je na prašenja Bernharda Pecha wotmołwjał. Zastupjer ekumeniskeho wobchoda so wjeseleše, zo „je tajki z dźěłom nabrěmjenjeny muž chwile měł z kulturnje zajimowanymi Budyšanami so zetkać“. Hillmann tomu přihłosujo rjekny, zo móže winowatosćow intendanta dla lědma hišće sam jako dźiwadźelnik na jewišću stać. Byrnjež zastojnstwo jemu poprawom dowoliło sej róle wuzwolić, to „scyła nochcu. Sym wot lěta 1985 dosć wulkich a wulkotnych rólow hrał.“ 1999 sta so wón z intendantom institucije a wukonja funkciju hač do dźensnišeho. „To je njewšědnje dołhi čas, normalne je poprawom jenož pjeć lět.“
Za wjace ciwilneje kuraže
Rom (B/SN). Bamž Franciskus je jutrownu nóc na Božej mši w Pětrowej cyrkwi raznje šwikał pasiwne zadźerženje mnohich křesćanow přećiwo njesprawnosćam na swěće. Wón namołwi jich k wjetšemu angažementej za sprawnosć a žadaše sej wjace ciwilneje kuraže. Wosom dorosćenych bu jutrownu nóc wukřćenych, mjez nimi migrant John Ogah z Nigerije, kiž bě njedawno zadźěwał wobrónjenemu nadpadej w Romskich superwikach.
Jutrowničku dopołdnja swjećeše bamž po zwučenym wašnju z dźesaćitysacami wěriwych na Pětrowym naměsće jutrownu Božu mšu a žohnowaše jich z „Urbi et orbi“ („Město a swět“).
Wo měr na swěće so modlić
Dwaj na smjerć zranjenaj
Münster (dpa/SN). Po amokowej jězbje z dohromady třomi mortwymi w Münsteru stej dwě wosobje žiwjenjastrašnje zranjenej, kaž rěka ze stron policije. Społnomócnjena za škit woporow kraja Sewjerorynsko-Westfalskeje Elisabeth Auchter-Mainz chcyše so dźensa z potrjechenymi a zranjenymi w Münsteru zetkać. Na krawnym njeskutku bu sobotu popołdnju 20 ludźi zranjenych. Psychisce labilny 48lětny skućićel bě so hnydom po amoku w awće zatřělił.
Ruska: Isreal zamołwity
Moskwa (dpa/SN). Po měnjenju Ruskeje a Syriskeje je israelske wójsko za nadpad z powětra na syriske wojerske zepěranišćo w Homsu zamołwite. Israelskej wojerskej lětadle typa F-15 stej pječa w nocy z powětroweho ruma Libanona wosom raketow na lětanišćo T4 wottřěliłoj, zdźěla po agenturomaj Tass a Interfax tež zakitowanske ministerstwo w Moskwje. Pjeć raketow je syriska strona wotpopadnyła, tři dalše su zapadny dźěl terena trjechili, kaž rěkaše.
Lisćinu prioritow nastajić
Thomas Schmidt: Saksko-pólske styki dale wjesć
Drježdźany (SN). Sakski ratarski minister Thomas Schmidt (CDU) swój třidnjowski wopyt w susodnej Pólskej, z kotrehož je so minjeny pjatk nawróćił, dosć pozitiwnje hódnoći. „Mi je wažne, zo zhromadne temy we wosobinskich rozmołwach wobrěčimy. Zo je so nam poradźiło prěni króć direktny kontakt k pólskemu knježerstwu nawjazać, pokazuje mjezsobny zajim na wuskim partnerstwje. Wotewrjene rozmołwy su kruty zakład za tež w přichodźe dobre zhromadne dźěło mjez Pólskej a Sakskej“, rjekny Schmidt po nawróće w Drježdźanach.
