Z koncernami so dojednać
Berlin (dpa/SN). Němske knježerstwo smě z energijowymi koncernami dojednanje wo wotstronjenju jadrowych wotpadkow wotzamknyć. Zwjazkowy sejm je dźensa wot unije, SPD a Zelenych zhromadnje předpołoženy naćisk zakonja schwalił. Po nim maja koncerny EON, Vattenfall, RWE a EnBw hač do lěta 2022 něhdźe 23,5 miliardow eurow do wosebiteho statneho fondsa płaćić, kotryž kónčne składowanje radioaktiwneho materiala rjaduje. Składźišćo njejsu hišće našli.
Seehofer staja wuměnjenja
Mnichow (dpa/SN). Předsyda CSU Horst Seehofer wobstawa dale na kruće postajenej hornjej mjezy 200 000 ćěkancow, kotřiž směli wob lěto do Němskeje přińć. Tole je wažne wuměnjenje dalšeho wobdźělenja CSU na nowym zwjazkowym knježerstwje po wólbach 2017, rjekny Seehofer powěsćerni dpa. „Hewak póńdźe CSU do opozicije.“ Hornja mjeza je po jeho měnjenju trěbna, zo móhła so čłowjeskosć zachować, integracija zmištrować a wěstota wobydlerjow zaručić.
Pjenjezy EU afriskim krajam
Dźěławi Budyskeje wotnožki wagonotwarca Bombardier su dźensa ...
Nowy přiměr zmóžnja ewakuowanje
Fico: Sankcije su „njezmysł“
Plan za jězor nětko wyše zastopnjowany
Łaz (AK/SN). Plan nowowužiwanja Hórnikečanskeho jězora po zakónčenju hórniskotechniskeho saněrowanja hač do lěta 2021 ma mjez zamołwitymi institucijemi Sakskeje nětko wyšu prioritu. Tole zdźěli Łazowski wjesnjanosta Thomas Leberecht (CDU). Dotal měješe plan na lisćinje spěchujomnych předewzaćow Sakskeje krajneje direkcije za lěto 2017 jenož „srjedźnu wažnosć“.
„Zwoprawdźenje plana bě wohrožene“, rjekny wjesnjanosta na minjenym posedźenju gmejnskeje rady. Z teje přičiny skontaktowa so wón ze zapósłancom CDU w Sakskim krajnym sejmje Frankom Hirchu. Tón móžeše krótkodobny termin z dr. Michaelom Wilhelmom, statnym sekretarom w sakskim nutřkownym ministerstwje, organizować. Wuslědk: Interministerielna skupina přiwozmje plan k ponowjenju Hórnikečanskeho jězora najebać „srjedźnu wažnosć“ do spěchowanskeje lisćiny za lěto 2017. „Nětko móžemy pola krajneje direkcije jednanje k přizwolenju plana zahajić“, Leberecht podšmórny.
Jenož „kóštowy faktor“
„Hdźe su waše koncepty?“
Sakski krajny sejm wo etaće za 2017 a 2018 debatował
Drježdźany (SN/MkWj). Je Sakska ze swojim rekordnym dwójnym etatom za 2017 a 2018 na dobrym puću abo nic? Tole běše centralne prašenje wčerawšeje debaty Sakskeho krajneho sejma.
Na dnjowym porjedźe steješe mjez druhim wuradźowanje wo etaće hospodarskeho, justicneho a kultusoweho ministerstwa. Debata wšak so tradicionalnje wužiwa, wo cyłkownej politice knježerstwa diskutować. Při tym so zaso raz pokaza, zo móžeš w tymle prašenju jara wšelakoreho měnjenja być. Frakciski šef CDU Frank Kupfer pokaza w swojej narěči na přewšo dobre hospodarske połoženje kraja a na z tym zwjazane přiběrace dawkowe dochody. Tole zmóžnja swobodnemu statej wobšěrne inwesticije na dobro hospodarstwa, kubłanja a lěpšeje infrastruktury. Bjezdźěłnosć je dźakowano dobremu połoženju na 6,8 procentow wotewzała. Klětu wočakuja runje hišće 3,8 procentow bjezdźěłnych. Etat je wurunany. Nowe kredity nochcedźa brać.
Z hospodarskimi nazhonjenjemi do politiki
Budyšin (CRM/SN). Jeho poprawne žiwjenske srjedźišćo je pjekarstwo, to po- twjerdźi Njedźichowski pjekarski mišter Roland Ermer wčera wječor při stajnym zjawnym blidźe Budyskeho měšćanskeho zwjazka CDU. Hižo w lěće 1989 sta so dźensa 53lětny katolski křesćan a nan třoch dźěći z wyšim mištrom pjekarjow w Sakskej a běše z tym najmłódši w Němskej. Mjeztym je wón tež prezident Sakskeho rjemjeslniskeho zwjazka. Jeho zasada je, zo maja ludźo z nazhonjenjemi w hospodarstwje tohorunja politiku sobu postajeć. Tohodla kandiduje wón jako čłon CDU we wólbnym wokrjesu 156 za 19. němski zwjazkowy sejm.
„Politika je dźensa přejara wot žiwjenskeje reality wobydlerstwa wotsalena“, wón měni. Zasadnje pak mamy k našim hódnotam, wuchadźacym z křesćanstwa, tež woprawdźe stać. Ekstremistiske prudy wón raznje wotpokazuje – wšojedne, hač su to politiske abo nabožne. Tohodla zastupuje wón hišće sylniše zabranje stejišća přećiwo AfD a podobnym zeskupnjenjam ze stron ciwilneje towaršnosće.
To a tamne (15.12.16)
Dokelž njebě ručne spinadło přićahnył, jako chcyše wustupić, je muž we wuchodnej Friziskej swoje nowe awto přisadźił. Muž bě při něhdyšim zastanišću přewózneje łódźe při rěce Ems zastał. Při wustupjenju dyrbješe přihladować kak štyri tydźenje stare awto po nahłej skłoninje runu smuhu do rěki zjědźe a so podnuri. Wohnjowa wobora dospołnje skóncowany wóz zaso z wody wućahny.
Dočasne narodninske zbožopřeća přinjesu njezbožo. Na to je bamž Franciskus wěriwych skedźbnił, kotřiž běchu jemu na wčerawšej generalnej awdiency w Romje k 80. narodninam gratulowali, kotrež bamž zajutřišim, sobotu, swjeći. „W mojej domiznje přinjese wulke njezbožo, hdyž přezahe gratuluješ“, wón rjekny. Přichwatani běchu bamžej tortu darili, na kotrejž běchu swěčki w formje 80. nastajane. Bamž zamó wšitke wuduć.
