Jerewan (dpa/SN). W něhdyšej sowjetskej republice Armeniskej su masowe protesty opozicije dźensa stolicu Jerewan zlemili. Demonstranća blokowachu hłowne dróhi, podzemska železnica njejězdźeše. Nawoda opozicije Nikol Pashinyan bě k masowej ciwilnej njeposłušnosći namołwjał, po tym zo bě parlament wčera z wjetšinu zapósłancow wotpokazał, jeho za ministerskeho prezidenta wuzwolić. Demonstranća hižo tydźenje dołho přećiwo korupciji a wujowstwu w kraju protestuja.

Wobskorža knježerstwo USA

Sacramento (dpa/SN). Kaliforniska je zhromadnje ze 16 dalšimi zwjazkowymi statami USA knježerstwo prezidenta Donalda Trumpa wobskoržiła. Do toho bě wone připowědźiło, wot bywšeho pre­zidenta Baracka Obamy wukazane pra­widła za dodźerženje wobswětoškitnych směrnicow za awta zmjechčić. Kalifor­niski generalny statny rěčnik Xavier Becerra rjekny w Sacramento, zo njeńdźe wo zwadu z knježerstwom, ale wo strowotu dźěći. Wobswětowy zarjad EPA bě připowědźił, zo chcył směrnicy nastupajo přetrjebu bencina złahodnić.

Wjace pjenjez za brónje

Berlin (dpa/SN). Po wuzwolenju Andreje Nahles za předsydku je nahladnosć SPD mjez wolerjemi na runje tak 17 procentow woteběrała. To je procent mjenje hač hišće minjeny tydźeń a 3,5 procentow mjenje hač při wólbach do zwjazkoweho sejma loni w septembru. Zwěsćił je to slědźenski institut Forsa při wopra­šowanju w nadawku sćelaka RTL. Porno tomu­ bě politbarometer sćelaka ZDF ty­dźenja hišće snadny rozrost nahladnosće strony wot 19 na 20 procentow zwěsćił.

Bywšu frakcisku šefinu běchu 22. apryla na zjězdźe strony we Wiesbadenje z jenož 66,3 procentami jako prěnju žonu na čole socialdemokratiskeje strony Němskeje wuzwolili. Wona bě wobšěrny proces ponowjenja připowědźiła.

Bychu-li ludźo w Němskej zwjazkoweho kanclera direktnje wolić móhli, njeby Nahles po zwěsćenju instituta Forsa žanu šansu přećiwo Angeli Merkel (CDU) měła. Jenož 13 procentow wolerjow by so za Nahles rozsudźiło, wjace hač trójce telko (49 procentow) za Merkel.

Berlin (dpa/SN). Etatowy komisar Europskeje unije Günther Oettinger žada sej wot čłonskich krajow EU při jednanjach wo nowym etaće zwólniwosć ke kompromisam. „Wočakuju wot wšitkich krajow fleksibilitu“, rjekny Oettinger w dźensnišim rańšim magacinje sćelaka ARD. EU ma składnosć, swoju zhromadnosć dopokazać, wón rjekny. W běhu dnja chcyše Oettinger swój naćisk etata za čas mjez 2021 a 2027 předstajić.

Němski komisar swój plan, wudawki zwyšić, zakitowaše, byrnjež EU z wustupom Wulkeje Britaniskeje cyłkownje mjenje pjenjez k dispoziciji měła. Bywši ministerski prezident Badensko-Württembergskeje ma hladajo na přiběracu inflaciju etat za wurunany.

Lutować chcył komisar mjez druhim w ratarskim wobłuku, hdźež EU dotal wjele subwencijow financuje. To móhło dołhodobnje k wyšim płaćiznam žiwi­dłow wjesć, wón přizna. Ratarjo móhli nuzo­wani być, płaćizny za ratarske wudźěłki zwyšić. „Runje tajke je žiwjenje“, wón rje­kny. „Štož sej wiki žadaja, dyrbiš płaćić.“

Podstupim (dpa/SN). Prezident Podstupimskeje industrijneje a wikowanskeje komory, Peter Heydenbluth, je so za wot kraja financowanu darmotnu jězdźenku za wučomnikow w zjawnym blisko­wobchadźe wuprajił. „To by dobry signal a dobry marketing za hospodarstwo Braniborskeje było“, rjekny wón nowinarjam. Nic naposledk by to „woprawdźity přinošk“ k zaručenju fachowych mocow w kraju był, Heydenbluth rjekny. Wo darmotnych jězdźenkach za wučomnikow mjeztym tež w druhich krajach debatuja.