Rozsudna rozmołwa
Stara politiska zasada praji: Štóž připowědźi, zo chcył wotstupić, tón je faktisce hižo wotstupjeny. W tej njepřijomnej a chětro słabej poziciji pojědźe Horst Seehofer (CSU) dźensa do Berlina, zo by so ze zwjazkowej kanclerku Angelu Merkel (CDU) tola hišće dojednał. Wuslědk rozmołwy budźe rozsudny za přichod knježerstwa a za prašenje, hač dyrbimy hižo bórze zaso wolić hić abo nic.
Při tym njeńdźe tola hižo wo prašenje, štó ma lěpšu azylowu politiku: Merkel abo Seehofer. Merkel je swoju politiku ćěkancam napřećo dawno dospołnje změniła. Problem, wo kotryž so nětko wadźa, je skerje pódlanski, dokelž wón ani tysac ludźi wob měsac njepotrjechi. Hłowne prašenje je, štó so přesadźi: Wony bayerski law z Mnichowa abo kanclerka, kotraž wot lěta 2005 zastojnstwo wukonja a je minjene lěta hižo tójšto hubatych a hejatych kontrahentow „wotstroniła“. Seehofer budźe přichodny. Marko Wjeńka
To a tamne (02.07.18)
Do jastwa póńdu třo młodostni, kotřiž běchu loni w juhočěskim měsće Třinec-Guty starožitnu drjewjanu cyrkwičku zapalili. Po wusudźe Ostravskeho wobwodneho sudnistwa změja woni třiapoł, wosom a dźewjeć lět wotsedźeć. Najwyšu pokutu dósta naškarak zapalerstwa. Woheń načini škodu 20 milionow krónow. Historiska škoda njeje ani wobličomna. Prašani za motiwom njeskutka su wobskorženi zwjetša z ramjenjemi sukali.
Sto porow sněhakow su njeznaći z wupožčowarnje w badensko-württembergskim Blausteinje pokradnyli. Nimo toho wzachu tež hišće třiceći porow sněhakowarskich čriji a dalše wuhotowanje sobu. Policija trochuje škodu na 50 000 eurow. Dokelž porjedźernju w lěću lědma wužiwaja, njemóža ani rjec, hdy su paduši tam pobyli. Wobsedźer bě to hakle kónc tydźenja zwěsćił.
Dalše tři miliardy za ćěkancow
Brüssel (dpa/SN). Turkowska dóstanje wot EU dalše tři miliardy eurow, zo móhła syriskich ćěkancow zastarać. Na to su so statni a knježerstwowi šefojo wčera w Brüsselu dojednali, po tym zo běchu měsacy dołho wo tym diskutowali. Prěni pomocny paket třoch miliardow eurow je přetrjebany. Europska unija bě Turkowskej šěsć miliardow přilubiła.
Žadaja sej asistent wotbočenja
Berlin (dpa/SN). Zo by strach smjertnych njezbožow při wotbočenju woteběrał, chcył zwjazkowy sejm tak mjenowany wotbočenski asistent do wšitkich nakładnych awtow zatwarić dać. W frakcije přesahowacej próstwje so zapósłancy za to wuprajeja, elektronisku nowosć ručež móžno zasadźić. Tak chcedźa zwjazkowe knježerstwo namołwić, to w Němskej wukazać, dyrbjało-li so rozrisanje na europskej runinje dlijić. Na dróhach Němskeje stajnje zaso ludźo smjertnje znje- zbožeja, dokelž jich šoferojo nakładnych awtow při wotbočenju prosće njewidźa.
Pjećoch w redakciji zatřělił
EU azylowu politiku přiwótřa – Pro Asyl kritizuje
Brüssel (dpa/SN). Po dołhich a wobćežnych jednanjach su so statni a knježerstwowi šefojo Europskeje unije na swojim wjerškowym zetkanju minjenu nóc w Brüsselu na to dojednali, azylowe prawo přiwótřić. Přichodnje chcedźa na morju wuchowanych ćěkancow we wosebitych zawrjenych lěhwach we wobłuku EU zaměstnić. Hač zarjaduja podobne lěhwa tež w sewjernej Africe, dyrbja pruwować. Mjezy škitacu agenturu Frontex chcedźa zesylnić a wonkowne mjezy Europy lěpje škitać. Lěhwa maja na zakładźe dobrowólnosće krajow nastać.
Zwjazkowa kanclerka Angela Merkel (CDU) mjenowaše dojednanje 28 statnikow na zhromadny tekst „dobre poselstwo“. Runjewon euforisce reagowaše italski ministerski prezident Giuseppe Conte. Tón bě hrozył wjeršk blokować, njedyrbjała-li EU Italskej hladajo na ćěkancow skutkownišo pomhać.
Podlěša sankcije
Orbán: Wšitcy jeno zawistni
Zahubne signale
To a tamne (29.06.18)
Krokodil w spušćadle je wulki njeměr w bayerskim Eglfingu zbudźił. Rozpjeršeny muž zazwoni policiju a rozprawješe jej, zo bě hłowu krokodila we wodźe wuhladał. Wobsadka policajskeho awta móžeše kurioznu namakanku najprjedy raz wobkrućić. Kaž pak so spěšnje wukopa, jednaše so jenož wo atrapu, kotraž so woprawdźitemu krokodilej jara podoba. Při žerdźi přiwjazana wupadaše wona kaž woprawdźity reptil.
Dokelž njebě tři eura za zhromadnu wječer na kóncu šulskeho lěta zapłaćiła, njeje powołanska šulerka w sewjeroněmskim Emdenje najprjedy raz swoje wuswědčenje dóstała. 17lětna pak njebě na jědźi ani wobdźělena. Najebać to chcyše jej wučerka dokument hakle přepodać, hdyž su tři eura zapłaćene. Nawodnica šule njeměješe za to žane zrozumjenje a šulerce wuswědčenje da.
Zakoń złahodnjeny
Waršawa (dpa/SN). Po raznej diplomatiskej zwadźe z Israelom je Pólska dwělomny zakoń wo holocausće złahodniła. Wobě komorje parlamenta hłosowaštej wčera we Waršawje za to, předwidźane chłostanje hač do třoch lět jastwa ze zakonja šmórnyć. W januaru schwaleny zakoń hrožeše z pjenježnej abo jastwowej pokutu tym, kotřiž Polakam „zjawnje a přećiwo faktam sobuwinu na holocausće dawaja“. Tele wuprajenje bě hłuboku krizu z Israelom zawinowało.
Zwjazkowy etat z „čornej nulu“
Berlin (dpa/SN). Prěni etat noweho zwjazkoweho knježerstwa je zdźěłany. Wón ma bjez nowych kreditow wuńć a předwidźi wudawki 343,6 miliardow eurow. To je 2,6 miliardow wjace, hač dotal planowane, kaž etatowy wuběrk dźensa rano po nimale 14 hodźin trajacym wuradźowanju zdźěli. Přiběracych dawkowych dochodow ma financny minister Olaf Scholz (SPD) přidatne srědki k dispoziciji. Wobćežnych jednanjow dla běchu hakle w měrcu nowe knježerstwo wutworili. Tak je etat 2018 tež hakle nětko doskónčnje hotowy.
Přidatne dochody z mawt
