Dwaceći metrow dołhi šawl a čapka pyšitej nětko historisku wěžu južnobraniborskeho Łukowa (Luckau). Dźesatki dobrowólnikow su za to minjene měsacy pilnje pletli a wjace hač sto dźělow znosyli, kaž Łukowske přemysłowe towarstwo zdźěla. Hač do 3. adwenta ma wěža swoju „zymsku drastu“ wobchować. Wona je dźěl historiskeho měšćanskeho wobhrodźenja a zdobom symbol města. Wobydlerjo sej stajnje zaso swojorazne akcije wokoło njeje wumysleja.

Přichodna zyma budźe kruta. Tole je wuslědk tradicionalneho waženja kóčki w małym rudnohorinskim Voigtsdorfje. Kocor Nero wažeše wčera 6 470 gramow. To je 40 procentow wjace hač w lěću. Normalnje pak tajke skoćo wo 25 procentow wahi přibywa. „Nero je so porjadnje nažrał, to budźe kruta zyma.“ Tole pišu organizatorojo spektakla wotpowědnje hesłu: Čim tołša kóčka, ćim zymnišo budźe. Zarjadowanje, kotrež su w Voigtsdorfje hižo třeći króć organizowali, je wjace hač 300 wopytowarjow přiwabiło.

Istanbul (dpa/SN). Po wčerawšim poručenju Europskeho parlamenta, rozmołwy z Turkowskej wo přistup kraja k EU přetorhnyć, je turkowski prezident Recep Tayyip Erdoğan hrozył, mjezy kraja ćěkancam wotewrěć. „Dyrbjała-li EU hišće dale hić, potom wotewrjemy mjezy“, po­twjerdźi Erdoğan w narěči, z kotrejž měrješe­ so na EU. Parlament bě ze swojim poručenjom na represalije přećiwo opoziciji w Turkowskej reagował.

Ptača gripa w Braniborskej

Podstupim (dpa/SN). Ptača gripa je Braniborsku docpěła. Pola mortweje tonuški we wokrjesu Podstupim-Srjedźna marka su strašny wirus H5N8 zwěsćili, infor­muje ministerstwo za škit přetrjebarjow. Zamołwići su hnydom wot­powědne wěstotne naprawy wukazali, předewšěm za plahowarjow pjerizny. Kački, husy a kury njesmědźa potrjechenu kónčinu 15 dnjow dołho wopušćić. W tym času jich wobstatki wobkedźbuja.

Zaso 800 lětow šmórnyli