Sam sej do pasli zalězł je muž na Dortmundskim lětanišću, jako chcyše pjenježnu pokutu swojeje žony zapłaćić. Zastojnicy běchu ju při kontroli zajeli, dokelž wona pjenjezy dołžeše a wukaz zajeća hižo předležeše. Policija zwěsći, zo tež muž njewinowaty njeje. Tež za nim hižo pytachu, dokelž bě wospjet bjez jězbneje dowolnosće po puću był. Žona smědźeše hić, muža dowjezechu do jastwa.

Wopojny jěd, luksusowe časniki, dwě dule złota, drohe awto a 200 000 eurow namakała je Berlinska policija při raciji přećiwo wikowarjam drogow we wjacorych bydlenjach stolicy. Pola hłowneho podhladneho namakachu 450 gramow kokaina, sto gramow marihuany a dalše drogi. Policija bě z wjacorymi zastojnikami, wukubłanymi psami a specialnej jednotku bydlenja přepytowała.

Karlsruhe (dpa/SN). Kóšty za zasadźenje policije při wulce riskantnych koparskich hrach smědźa so profijowym koparskim klubam napołožić. Tole je zwjazkowe wustawowe sudnistwo dźensa rozsudźiło. Město Bremen bě hižo 2014 wobzamknyło, zo maja so zarjadowarjo profijowych koparskich hrow na kóštach wobdźělić. Popłatk žadaja sej na profijowych hrach z wjace hač 5 000 wopytowarjemi, hdyž je strach namocy wosebje wulki. Koparski zwjazk DFL je přećiwo tomu skoržił.

Wo wěstoće w morju wuradźowali

Helsinki (dpa/SN). Po wjacorych pozdatnje sabotažowych njeskutkach na morju je zwjazkowy kancler Olaf Scholz (SPD) dźensa ze statnymi a knježerstwowymi šefami dalšich čłonskich krajow NATO wo wěstoće w Baltiskim morju wuradźował. Na zeńdźenju w finskej stolicy Helsinkach su za pućemi pytali, kak móhli kritisku infrastrukturu w morju lěpje škitać a so ruskim łódźam wobarać, kotrež wolijowy embargo wobeńdu.

Truty Ukrainu nadběhowali