Berlin (dpa/SN). Předsydka AfD Alice Weidel je znowa wumjetowanja wotpokazała, zo je jeje rozmołwa z miliardarom Elonom Muskom na platformje X pjenježna lěpšina na dobro AfD a tak snano ilegalne financowanje strony. „To bě ryzy dialog. Ničo přećiwo tomu njerěči, hdyž so čłowjekaj na tajkej platformje rozmołwjataj“, rjekny Weidel wčera wječor sćelakomaj RTL a ntv.

W rozmołwje z Muskom bě Weidel nacionalsocialista Adolfa Hitlera „komunista“ mjenowała. Tute wuprajenje wona tež napřećo RTL a ntv zakitowaše: „Sym ekonomka a nam je dospołnje jasne, zo bě Adolf Hitler lěwicar“, wona rjekny.

W rozmołwje z Muskom Weidel nimo toho twjerdźeše, zo bě Angela Merkel „prěnja zelena kanclerka“ a zo dźěći w šulach Němskeje ničo njenawuknu, chibazo zasady genderowanja.

Rozmołwu Weidel a Muska běchu politikarjo druhich stron w předpolu wótrje kritizowali. Mjez druhim namjetowachu pruwować, hač njejedna so wo ilegalnu politisku podpěru z wukraja.

Kamjenica (dpa/SN). Předewzaća w Kamjenicy a wokolinje maja wulke wočakowanja hladajo na lěto 2025, w kotrymž je jich město kulturna stolica Europy. Wosebje hotele, hosćency, turistiske a kulturne předewzaća, ale tež wobchody nadźijeja so lěpšich wobrotow, zdźěla hłowny jednaćel industrijneje a wikowanskeje komory Kamjenicy, Christoph Neuberg. Kak so prudy wopytowarjow konkretnje wuskutkuja, hodźi so tuchwilu jenož ćežko rjec.

Za turizm je kulturna stolica hoberska šansa, zdźěli jednaćelka Turistiskeje a marketingoweje towaršnosće Sakska, ­Veronika Hiebl. „Kamjenica a wša wokolina dóstanjetej po tutym puću kedźbnosć, kotruž sej zasłužatej.“ Nazhonjenja bywšich kulturnych stolicow kaž Essena pokazuja, zo ma titul tež lěta po tym ­hišće pozitiwne wuprudźenje. Nimo toho ludźo swoje jězby krótkodobnje knihuja. Hižo nětko zamołwići na wikach mjezynarodnych turistikarjow registruja, zo zajim za Kamjenicu spochi přiběra. Tež tójšto předewzaćelow na kongresach a posedźenjach w Kamjenicy wočakuja. „Pozitiwne wuwiće, kotrež smy hižo loni wobkedźbowali, pokročuje.“

Berlin (dpa/SN). Za dołhodobne financowanje marodneje syće kolijow w Němskej trjeba železnica po měnjenju nawody jeje předsydstwa Wernera Gatzera něhdźe 150 miliardow eurow. „Železnica ma wulke ćeže, kiž dyrbja so nuznje rozrisać. Infrastruktura je zestarjena, přežadana a stajnje zaso defektna“, rjekny wón časopisej Focus a připowědźi: „150 miliardow eurow budźe w přichodnych dźesać lětach znajmjeńša trěbnych.“

Kredity, kotrež dyrbi Zwjazk za to brać, su hladajo na woteběrace zadołženje zastupujomne, je sej wón wěsty. Nimo toho dyrbjeli so wuměnjenja za bórzomne inwesticije stworić.

Hižo spočatk 2024 bě zwjazkowy minister za wobchad Volker Wissing (bjezstronski) fonds k financowanju infrastruktury namjetował. Na nim měli so tež priwatni inwestorojo wobdźělić. Konkretny natwar fondsa njeje přiwšěm jasny. Tež zastupnicy branše maja rozrisanje z fondsom za zmysłapołne. Hladajo na hłuboko sahace problemy na polu infrastruktury železnicy pak je dołhodobne rozrisanje trěbne, kotrež skići industriji planowansku a produkcisku wěstotu.