Giffey chce tola koaliciju z CDU
Berlin (dpa/SN). Po wospjetnych wólbach w Berlinje chce tuchwilna wyša měšćanostka Franziska Giffey (SPD) prawdźepodobnje koaliciju z wólbnym dobyćerjom CDU wutworić. Tole rozprawjachu wčera a dźensa wšelake medije, bjez toho zo su žórło podali.
Dotal knježi w Berlinje koalicija SPD, Zeleni a Lěwica, kotraž móhła hladajo na wólbne wuslědki dale wobstać. Dotal strony w Berlinje hišće wo wšelakich móžnosćach sonděruja. Kaž z kruhow SPD w Berlinje rěka, njeje so hišće próstwa wo koaliciske jednanje na krajne předsydstwo stajiła. Hakle na dźensnišim posedźenju chcedźa wo tym rozsudźić.
Wčera wječor je so třeće a poslednje koło sonděrowanskich rozmołwow mjez SPD a CDU kónčiło. Ani šef CDU Kai Wegner ani načolna kandidatka Zelenych Bettina Jarasch staj informacije wo rozmołwach zjawnje posrědkowałoj. Po słowach Wegnera ma so krajne předsydstwo CDU jutře schadźować, hdźež chcedźa temu koalicije wobjednawać.
Boži dom jako nošer energije
Za dale a wjace solarnych připrawow na třěchach cyrkwjow
Berlin/Podstupim (dpa/SN). Solarne připrawy na třěchach cyrkwjow njejsu za ewangelsku a katolsku cyrkwju w regionje Berlin-Braniborska hižo rědke. A tež politika reaguje na přiběrace wědomje za škit klimy. Tole wuchadźa z naprašowanja powěsćernje dpa, kotraž je so pola cyrkwjow za połoženjom wobhoniła. „Zachowanje stwórby – škit žiwjenskich zakładow – maja za křesćansku cyrkej kaž tež na statnej runinje wulku prioritu“, rěka w zhromadnej rozprawje Ewangelskeje cyrkwje Berlin-Braniborska-šleska Hornja Łužica (EKBO) kaž tež katolskeju biskopstwow Berlin a Zhorjelc. Tež braniborska ministerka za wědomosć Manja Schüle (SPD) je so zhromadnej rozprawje přizamknyła. K tomu pak tež słuša, zo wotwisnosć wot fosilnych energijowych nošerjow pomjeńšimy. Tež cyrkwinske wosady móža k tomu přinošować. „Mjez wutwarom wobnowjomnych energijow a pomnikoškitom njeje přećiwka“, je w zdźělence wozjewjene.
Postawa zaso na historiskim městnje
To a tamne (01.03.23)
Pasant w Podstupimje je zawčerawšim spytał, dweju rubježnikow zadźeržeć. Do toho běštej we wobchodźe juwele pokradnyłoj. Rubježnikaj chcyštaj poprawom spěšnje twochnyć, tola pasant so jimaj do puća stupi. Jednoho rubježnika je wón kruće dźeržał, tola skónčnje móžeše so wuwinyć. W šmjatańcy z pasantom pak je rubježnik nimo juwelow tež hamor, titku a jedyn čriji zawostajił. Kriminalna policija pad nětko přepytuje.
Na dowolowej kupje Mallorca bědźachu so minjene dny ze sněhom, kiž je zymska nižina z mjenom „Juliette“ wobradźiła. Nětko pak warnuja meteorologojo před powodźenjemi a sylnym wichorom. Dowolnicy a domoródni měli tuž w domach wostać.
Bätzing: Połoženje kritiske
Konferenca biskopow / TCM skedźbnja na specifiske serbske problemy
Drježdźany (SN/MkWj). W sakskej krajnej stolicy je so wčera wulkozarjadowanje zahajiło: Na přeprošenje Drježdźansko-Mišnjanskeho biskopa Heinricha Timmereversa schadźuje so tam hač do zajutřišim, štwórtka, Němska biskopska konferenca. Na nalětnim posedźenju wobdźěli so 65 čłonow.
K zahajenju je předsyda konferency, biskop dr. Georg Bätzing, wčera popołdnju žurnalistam přehlad wo ćežišćach podał. Temy wuradźowanjow su mjez druhim wójna w Ukrainje a z tym zwisowace prašenje ćěkancow, synodalny puć kaž tež dalše přeslědźenje splažneho a duchowneho znjewužiwanja w cyrkwi.
Biskopja schadźuja so dwójce wob lěto we wulkim kole. Mjeztym zo wotměwa so nazymska hłowna zhromadźizna stajnje w hessenskej Fuldźe, zetkawaja so biskopja w nalěću na rozdźělnych městnach. Po lěće 1996 je konferenca lětsa mjeztym druhi króć z hosćom w Drježdźansko-Mišnjanskim biskopstwje: Swój čas běchu so biskopja w Smochčanskim Domje biskopa Bena zešli.
Žane nowe wolijowe tepjenja
Berlin (dpa/SN). Zwjazkowe hospodarske a twarske ministerstwo dźěłatej tuchwilu na naćisku zakonja, po kotrymž ma so zatwar nowych płunowych a wolijowych tepjenjow zakazać. To zdźěli dźensa rěčnica ministerstwow w Berlinje. Koalicija je so před nimale jednym lětom na to dojednała, zo maja wot klětušeho 1. januara po móžnosći wšitke nowe tepjenja 65 procentow z wobnowjomnych energijow tepić. Tole ma so w nowym energijowym zakonju za twarjenja zakótwić.
Akcije po Němskej rozšěrili
Podstupim/Drježdźany (dpa/SN). Klimowi aktiwisća su wčera prěni króć dróhu w Podstupimskim nutřkownym měsće haćili. Šěsć čłonow skupiny „Poslednja generacija“ zlěpichu so na dróhu a žadachu sej załoženje towaršnostneje rady. Tež w Drježdźanach běchu klimowi aktiwisća wčera popołdnju wobchad haćili. Tak zlěpichu so třo na Carolowy móst. Policija je blokadu zakónčiła a přećiwo wobdźělnikam protestneje akcije přepytowanje zahajiła.
Žadanja najprjedy wotpokazał
Zaso wjace zasadźenjow
Drježdźany (dpa/SN). Po rekordnym lěće 2021 su powětrowi wuchowarjo ADAC loni znowa wjace zasadźenjow měli. Tři w Sakskej stacionowane helikoptery su 2022 k 4 544 zasadźenjam wotzběhnyli. Wo tym je ADAC njedawno informował. To bě 489 wužiwanjow helikoptera wjace hač w lěće do toho. Tehdy bu marka 4 000 zasadźenjow prěni króć překročena. Jako přičiny toho wuwića mjenowaše ADAC přiběracu mobilitu po kóncu wobmjezowanjow korony dla, regionalne přećeženje wuchowanskeje słužby na zemi a njedostatk nuzowych lěkarjow. W mnohich regionach je wuchowanski helikopter při nuzowym padźe husto jako jenički wuchowanski srědk k dispoziciji.
Zaměry zasadźenjow běchu 3 740 w Sakskej, 635 w Saksko-Anhaltskej, 142 w Durinskej, štyri w Braniborskej a 23 w Bayerskej. Nuzowe pady systema wutroby a wobtoka běchu prěnja zasadźenska přičina, sćěhowachu zranjenja po njezbožach. Nimale kóždy dźesaty pacient bě dźěćo abo młodostny.
Po cyłej Němskej je ličba zasadźenjow helikopterow ADAC loni na 55 675 rozrostła, 3 441 wjace hač 2021.
Nowy rekord
Chcedźa studentam w nuzy pomhać
Drježdźany (dpa/SN). Sakski minister za wědomosć Sebastian Gemkow (CDU) je studowacym w nuzy podpěru přilubił. „Nichtó njeměł stupacych płaćiznow za žiwidła dla swój studij złožić“, wuzběhny wón wčera w Drježdźanach. W statnym knježerstwje chce so wón za přidatnu podpěru zasadźić.
„Studowacych wysoke płaćizny wosebje poćežuja, dokelž nimaja často telko pjenjez k dispoziciji“, Gemkow rozkładźe. Tohodla je wón hižo wjace króć ze zastupjerjemi studentow wuradźował a za rozrisanjom pytał. Wažna móžnosć je studentskim skutkam pomhać. „Nastupajo financielne zawěsćenje dóstanu studentske skutki hižo wjace hač tři miliony eurow krajnych přiražkow“, wědomostny minister wujasni.
Po informacijach móža sakske studentske skutki studowacym w nuzy z fondsami abo socialnymi požčonkami respektiwnje přiražkami pomhać. Studowacy móža so na přisłušne studentske skutki a studentsku radu wobroćić a so wo móžnosćach poradźować dać. Sebastian Gemkow wčera samo připowědźi, zo móhli dalše pjenjezy k dispoziciji stajić.
Šansu za ekomilinu wužiwać
Zwjazk wětroweje energije sej wjac dowolnosćow žadał
Berlin (dpa/SN). Wutwar wětrnikow je spočatk noweho lěta jenož pomałku zaběžał. Staw nowych dowolnosćow je jara niski a žadyn dobry signal, měni prezident Zwjazka wětroweje energije Hermann Albers napřećo powěsćerni dpa. Wot spočatka januara njeje so žana nowa připrawa w Badensko-Württembergskej, Bayerskej, Porynsko-Pfalcowskej, Sakskej a Posaarskej dowoliła. W Hessenskej předleži jenož jedna dowolnosć. Předewšěm w Badensko-Württembergskej, Bayerskej a Sakskej dyrbjeli zamołwići skónčnje jednać.
