Demonstracije přećiwo planowanej justicnej reformje w Israelu dale ...
Warnowanski stawk wobchad masiwnje haćił
Berlin/Drježdźany (dpa/SN). Regionalny a dalokowobchad po wšej Němskej bě dźensa masiwnych warnowanskich stawkow dla w dalokej měrje zlemjeny. Wot połnocy na přikład w Berlinje a Braniborskej žane regionalne ćahi wjace njejězdźachu. Tež Sakska bě potrjechena. Hač so połoženje w běhu dnja zaso polěpši, njebě dopołdnja hišće znate. Tež na lětanišćach dóńdźe k haćenjam. Pozadk toho je wšoněmski stawk dźěłarnistwow, kiž ma 24 hodźin trać. Ze stawkom chcedźa ćišć w tuchwilnych tarifowych jednanjach zwyšić. W běhu dnja chcyštej so dźěłarnistwo ver.di a zwjazk zastojnikow znowa ze zastupnikami komunow a Zwjazka zetkać. Je to třeće koło jednanjow za něhdźe 2,5 milinow přistajenych. Dźěłarnistwo žada sej wjace hač dźesać procentow, znajmjeńša pak 500 eurow wjace mzdy. Dźěłodawarjo tole dotal wotpokazuja. Při wšěm wobkedźbowarjo njewuzamkuja, zo so tarifowi partnerojo w běhu přichodnych dnjow tola hišće dojednaja.
W koaliciji hišće žane wuslědki
Berlin (dpa/SN). Šefojo amploweje koalicije SPD, Zelenych a FDP su tež dźensa rano w kanclerskim zarjedźe dale diskutowali. Tuchwilne konflikty amploweje koalicije njejsu hišće rozrisane. Předewšěm dźe wo temy kaž spěšniši wutwar zwjazkowych awtodróhow, wotstronjenje wolijowych a płunowych tepjenjow kaž tež financowanje zakładneho zawěsćenja za dźěći.
Kaž fachowc FDP za etat Otto Fricke při tym wuzběhny, pokazaja trajace rozmołwy na to, zo so stronje prócujetej rozrisanje nańć. Dokelž diskusije dale trajachu, je FDP poesedźenje prezidija a nowinsku konferencu wotprajiła.
„Je wjele nadawkow, kotrež dyrbimy zmištrować, předewšěm hladajo na krizu klimy“, podšmórny prěnja parlamentariska jednaćelka Zelenych Irene Mihalic. Wona plany hospodarskeho ministra Roberta Habecka (Zeleni) zakitowaše. Wot klětušeho maja nowozatwarjene tepjenja znajmjeńša 65 procentow na zakładźe wobnowjomnych energijow „nadźěłać“, štož wjedźeše k rozkorje, dokelž njemóže wjele ludźi tole financielnje zmištrować.
Hotuja so na klětuše wólby
Na stronskim zjězdźe Zelenych w Budyšinje čłonow w serbskej rěči witała
Budyšin (SN/BŠe). Na stronskim zjězdźe w Budyšinje hotowachu so sakscy Zeleni na klětuši wólbny bój. Přichodnje chce sej strona wo wjele lěpši wólbny wuslědk wuwojować. W lěće 2019 docpě wona 8,6 procentow hłosow. Sakska justicna ministerka Katja Meier a wobswětowy a energijowy minister Wolfram Günther přizjewištaj wobaj, zo chcetaj jako načolnaj kandidataj k wólbam nastupić. Günther pak rěčeše wo tym, zo móhłoj tež jako team wustupować.
Opoziciske knježerstwo
Serbsko słowo na stronskim zjězdźe, dosć impulsow z bazy za praktisku politiku na regionalnej a mjezynarodnej runinje – sakscy Zeleni su so w Budyšinje jako čile diskutowaca a zaměrna organizacija prezentowali. So wě, zo njeje strona tuchwilu w ludnosći Łužicy runjewon woblubowana. Ale jeje zwjazkowa předsydka je na přeswědčace wašnje wobkrućiła, zo matej wobchowanje stwórby a zachowanje socialneho měra dwě stronje samsneje medalje być. Čim wjac ludźi to za wěryhódne ma, ćim mjenje problemow z akceptancu we Łužicy strona změje.
Wušiknje skutkuje na jednym boku jako seriozna koaliciska partnerka, zdobom pak někak kaž opozicija napřećo CDU. Jeli Lěwica – hlej hrožace pačenje dokoławokoło Wagenknecht – dale rozpaduje, maja Zeleni do klětušich wólbow krajneho sejma poleposition. Jich frakciska předsydka z Łužicy Franziska Schubert je politiski prototyp jednoty konserwatiwnych a doprědkarskich myslow. Marcel Brauman
Sankcijez prawom
Berlin (dpa/SN). Wuměnjeja-li so studowacy za čas online-pruwowanja intensiwnje w chatowych skupinach, móža jich jebanstwa dla eksmatrikulować. To je Berlinske zarjadniske sudnistwo minjeny pjatk rozsudźiło. Tak njeńdźe wo to, hač bě wuměna spomóžna a so tam prawe wotmołwy diskutowachu, w zdźělence sudnistwa rěka. Z tym njebě skóržba studentki studijneho směra „Zjawne zarjadnistwo“ wuspěšna. Ju běchu „wosebje ćežkeho jebanstwa“ dla eksmatrikulowali.
Po słowach sudnikow je studentka w juliju 2021 online-klawsuru pisała. Po korekturje přihrawachu so docentej a pruwowarjej screenshoty ze chatoweje skupiny, w kotrejž so mnozy wobdźělnicy pruwowanja – mjez nimi tež skóržbnica – wuměnjachu. Wysoka šula zahaji přećiwo wobdźělnikam skupiny pruwowanske jednanje podhlada zamylenja dla. Skónčnje potrjechenych eksmatrikulowachu. Kaž sudnicy minjeny pjatk wopodstatnichu, bě to prawje. Po tym zo dóńdźe při online-pruwowanjach k wulkej ličbje wobšudźenjow, je wysoka šula nětko sankcije wuwjedła, kotrež maja wulku wottrašacu skutkownosć.
To a tamne (27.03.23)
Ze zubnej šćětku a metalowym gratom staj so mužej z jastwa w Newport News, měsće we Virginiji, zwjazkowym kraju USA, wudobyłoj. Tak skurilne kaž wułam 37- a 43lětneju, běše jeju zajeće něšto hodźin po tym. Wonaj staj sej w hosćencu susodneje wsy pampuchi słodźeć dałoj. Ludźo su jeju spóznali, wšako běše policija fota wudobywarjow wozjewiła. Zo je so jimaj z tajkimaj gratomaj wućek radźił, je na „słabosći konstrukcije“ twara zaležało, je policija na naprašowanje zdźěliła.
Šesta strona je w sakskim sejmje zastupjena: Zapósłanc Ivo Teichmann, kiž je loni frakciju AfD wopušćił, je do ministrony „Zwjazk Němska“ zastupił. Na čole strony steji něhdyši krajny předsyda Swobodnych wolerjow Sakskeje Steffen Große. Tež w europskim parlamenće ma strona dźakowano něhdyšemu AfDnikej Larsej Patrickej Bergej mandat.
Georgiskej pomoc přilubiła
Tbilissi (dpa/SN). Wonkowna ministerka Annalena Baerbock je Georgiskej hladajo na pospyty Ruskeje, w kónčinje wliw wukonjeć, dalšu podpěru w procesu přistupa kraja do EU přilubiła. „Durje do směra kandidatstwa EU su šěroko wotewrjene“, rjekny politikarka Zelenych po rozmołwje ze swojim kolegu Iliju Dartschiaschwilijom w stolicy bywšeje sowjetskeje republiki. Dartschiaschwili rěčeše wo „njepowalnej woli“ georgiskeho ludu, do Europskeje unije zastupić móc.
Hrozy z listom Stalina
Moskwa (dpa/SN). Dlěje hač lěto po zahajenju wójny přećiwo Ukrainje je bywši ruski prezident Dmitrij Mjedwjedew nastupajo zwyšenje produkcije swójskich bróni njewšědny srědk nałožował. Před zastupnikami narodneje brónjenskeje komisije citowaše 57 lětny bywšeho sowjetskeho diktatora Józefa Stalina (1879–1953), w interneće rozprawjeja. Mjedwjedew čitaše z telegrama Stalina brónjenskej fabrice w Čeljabinsku w lěće 1941. W nim Stalin hrozy, nawodow zawoda „kaž złóstnikow zničić“, njedyrbjeli-li woni produkciju bróni spěšnje zwyšić.
Protesty so přiwótřeja
Po dobrym lětdźesatku na wodźe, w trajnym wětřiku a měnjatym ...
Stawk potrjechi statysacy ludźi po wšej Němskej
Berlin (dpa/SN). Připowědźeny wulki warnowanski stawk přichodnu póndźelu potrjechi po posudku zwjazka lětanišćow Němskeje (ADV) statysacy pasažěrow. „Něhdźe 380 000 předewzaćelskich a priwatnje pućowacych njemóže swój lět nastupić“, zdźěli zwjazk wčera powěsćerni dpa. ADV rěči w tym zwisku wo „eskalaciji stawka po francoskim přikładźe“. Cyły kraj je tak wot mjezynarodneho powětrownistwa wuzamknjeny. „Dźěłarnistwa rozžohnuja so z dobrej tradiciju, zo namakaja w Němskej rozrisanja za jednanskim blidom“, rjekny hłowny jednaćel ADV Ralph Beisel. Připowědźene naprawy su po jeho měnjenju nadměrne a překročeja wšitke měritka warnowanskeho stawka. „To je pospyt, z generalnym stawkom francoske poměry w Němskej přesadźić.“ Dźěłarnistwa železnicarjow a ver.di běchu wčera za přichodnu póndźelu cyłodnjowski stawk připowědźili.
