Drježdźany (dpa/SN). Sakske krajne knježerstwo je w financnych wuskosćach tčacym komunam a wokrjesam pomoc přilubiło. Konkretnje rozsudźić chcedźa wo tym po dokładnym pruwowanju hač do kónca meje. Cyłoněmske wuwiće na­stupajo financowanje komunow je tež w Sakskej na dramatiske wašnje widźomne, rjekny ministerski prezident Michael Kretschmer (CDU) wčera po wuradźowanju ze zastupnikami komunow. Wyše naroki a wudawki na socialnym polu k tomu wjedu, zo maja nimale wšitke wokrjesy ćeže, etat wobzamknyć. Tuž trjebaja wšitcy nowe zrozumjenje wo zhromadnym dźěle Zwjazka, krajow a komunow. „Chcemy pomhać a činimy to tež.“

Waršawa (dpa/SN). Pólska, Israel a Němska su dźensa zhromadnje spočatk zběžka we Waršawskim geće před runje 80 lětami wopominali. Židowscy wojowarjo běchu so 1943 dalšej deportaciji do zaničowanskich lěhwow SS wobarali, byrnjež bój přećiwo němskej wojerskej přewaze wot wšeho spočatka praktisce bjez kóždeje šansy był. Při pomniku za wopory zběžka w pólskej stolicy wočakowachu w běhu dnja narěče statnych prezidentow Pólskeje, Israela a – prěni króć – Němskeje, Andrzeja Dudy, Izchaka Herzoga a Franka Waltera Steinmeiera. Politikarjo chcychu tam tež wěncy kłasć.

Zwjazkowemu prezidentej Frankej -Walterej Steinmeierej je wopyt Waršawy podobnje ćežki kaž narěč we wopomnišću Yad Vashem spočatk 2020. Tam bě so Steinmeier jasnje k zamołwitosći Němskeje za złóstnistwa w zwisku z holocaustom wuznał a dalši škit židowskeho žiwjenja w Němskej přilubił. Pólske narodno-konserwatiwne knježerstwo tuchwilu w zwisku z wólbnym bojom antiněmske předsudki w kraju masiwnje šěri.

„Před nami je ćežki čas“, zastupjerjo Drježdźansko-Mišnjanskeho biskopstwa wčera w Drježdźanach zwuraznichu. Tam lutowanske naprawy předstajichu, dokelž ma biskopstwo w přichodźe 17,5 milionow eurow mjenje pjenjez k dispoziciji. Wězo so prašam, čehodla zamołwići diecezy potom dale na nowotwarje Propst-Beieroweho-domu za 48 milionow eurow wobsteja, wšako móhli tam najprjedy raz najwjac fenkow lutować. Akterojo drje twjerdźa, zo je stary dom dodźeržany a ponowjenje wjace płaći hač nowotwar. Ale znajemy ­tola wulke projekty, kotrež wjace pjenjez žeru hač wotpohladane. A poprawom ­měło zamołwitym biskopstwa hižo dlěje wědome być, zo tež diecezy na zapadźe Němskeje fenki bjez kónca nimaja. Pje­njezy dyrbjało biskopstwo bóle zamołwiće zasadźić a dołhodobnje do přichoda planować, tak kaž to „normalni“ ludźo činja. Najwjac křesćanow wšak je spokojom z tym, štož wobsedźa a nježedźa so stajnje za nowym. Bianka Šeferowa

London (dpa/SN). Ruska wužiwa we wójnje přećiwo Ukrainje po posudku britiskich fachowcow masiwnje desinformaciju a wopačne powěsće. „Wot spočatka swojeje dospołneje inwazije w Ukrainje je ruski stat systematisce informaciske operacije jako hłowny element swojeje strategije zasadźił“, zdźěla zakitowanske ministerstwo dźensa w Londonje, powołujo so na informacije tajnych słužbow. Při tym wopačne abo manipulowane informacije wotpohladnje produkuja a dale dawaja. Wažny zaměr je, ukrainske knježerstwo wočornić a mjezynarodnu pomoc na dobro Ukrainy zesłabić.

Wusahowacy wobstatk tuteje strategije su „blady“. Při tym rozšěrja Ruska zaměrnje informacije z njeznatych žórłow, kotrež tak swój puć do oficialnych ruskich medijow namakaja. „Na tute wašnje žórło informacijow zatajeja, štož ­Ruskej zmóžnja, so oficialnje wot powěsćow distancować“, w Londonje rjeknu.

Britiske zakitowanske ministerstwo wozjewja wot spočatka wójny Ruskeje přećiwo Ukrainje powěsće tajnych słužbow. Moskwa wumjetuje Londonej zaměrnu kampanju desinformacije.