Mnichow (dpa/SN). Po insolwency třećeho najwjetšeho europskeho poskićowarja pućowanskich jězbow FTI branša z tym liči, zo so wiki same znowa zrjaduja. „Ludźo pojědu najebać plajtu FTI dale do dowola. Potencial wjacorych miliardow eurow sej druzy zarjadowarjo jězbow mjez sobu rozdźěla“, je sej fachowc za turizm Torsten Kirstges na wysokej šuli we Wilhelmshavenje wěsty. Konkurenća Tui a DER Touristik změja z toho swoje lěpšiny. Pućowanske wiki su dale w dobrym połoženju. Třeći najwjetši poskićowar jězbow w Europje FTI bě předwčerawšim, póndźelu insolwencu přizjewił. Prawdźepodobnje njebě FTI straty koronapandemije přewinył, hinak hač konkurenca. Dowolnicy, kotřiž běchu jězby pola FTI hižo zapłaćili, móža pak z tym ličić, zo jim škodu narunaja. Po plajće koncerna Thomasa Cooka 2029 běchu fonds zawěsćenja jězbow załožili. Koncerny Tui a DER wjesela so nětko na ludźi, kotřiž su swoje jězby dotal pola FTI knihowali. Zarjadowarjo koncentruja so w tym zwisku na kónčiny, w kotrychž bě FTI sylnje zastupjena, kaž Egyptowsku, Turkowsku a Zjednoćene arabske emiraty.

Z wulkim swjedźenjom za swójby na dwórnišću Žandowskeho třiróžka je Choćebuska lěsna železnica minjeny kónc tydźenja 70. róčnicu swojeho wobstaća woswje­ćiła. K gratulantam słušeštaj braniborski ministerski prezident Dietmar Woidke a Choćebuski wyši měšćanosta Tobias Schick (wobaj SPD). Přichwatali pak běchu wosebje spřećeleni lěsni železnicarjo ze swojimi jězdźidłami. Cyły kónc tydźenja porskachu parne lokomotiwy z Berlina, Běłeje Wody a Pólskeje po tři kilometry dołhej čarje. Telko parnych lokomotiwow naraz tam w 70lětnych stawiznach hišće widźeli njeběchu. 1. junija 1954 bě prěnja lěsna železnica wotjěła. Foto: Michael Helbig

Lipsk (dpa/SN). W procesu ilegalneho předawanja sćazanych składowanych kolesow pola Lipšćanskeje policije je wobskoržena policistka wumjetowanja wotpokazała. Wona njeje so wosobinsce wobohaćiła a njeje žane pjenjezy za sebje wobchowała, rjekny prawiznik 47lětneje w jeje nadawku wčera na sudnistwje. Tam dyrbi so wot słužby wuswobodźena hłowna policajska komisarka jako tehdyša zamołwita komory azerwatow padustwa, wobtykanja a falšowanja wopismow dla zamołwić.

Statne rěčnistwo jeje wumjetuje, zo je wot awgusta 2014 hač do nowembra 2028 znajmjeńša 265 zdźěla dosć drohotnych kolesow dale dawała, přewažnje policistam. Na tute wašnje je 4 795 eurow wuzbytkowała a sej znajmjeńša 3 000 eurow zdźeržała. Zwjetša kradnjene kolesa bě policija sćazała.

Žona twjerdźeše, zo je pjenjezy towarstwu přepodała, kiž jeje nan jako předsyda nawjedowaše. „Njejsym ničo zatajiła a swojeho šefa stajnje wo tym informowała“, 49lětna rjekny. Tomu so tehdyši wotrjadnik spjećowaše: „Njejsym ničo wo tym wědźał a bych jej to tež zakazał.“

Serbske Nowiny wudawaja so w Domowina-Verlag GmbH Ludowym nakładnistwje Domowina 

Jednaćel: Syman Pětr Cyž

Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.

Šefredaktor a zamołwity redaktor w zmysle

nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238

tel.: 03591 / 577 232 faks: 03591 / 577 202 e-mail:  www.serbske-nowiny.de

Adresa redakcije a nakładnistwa: Sukelnska 27, 02625 Budyšin

Adresse der Redaktion und des Verlages: Tuchmacherstraße 27, 02625 Bautzen

Zamołwita za rozšěrjenje a marketing:

Patricia Róblowa 577 273

Předań nawěškow: Janka Rögnerowa 577 220 e-mail:

Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory

Vertriebskennzeichen: 2 B 2560 B