Kijew (dpa/SN). Ukraina prócuje so wo dalšich wobdźělnikow za planowany měrowy wjeršk srjedź junija w Šwicarskej. „Dźensa sym ze statnymi a knježerstwowymi šefami Chilskeje, Albanskeje, Awstriskeje a Mosambika rěčał“, rozprawješe prezident Wolodymyr Zelenskyj wčera wječor w swojim widejowym poselstwje. „Štyri dalše kraje na wjeršku, dźakuju so wam.“ Znate je, zo chce zwjazkowy kancler Olaf Scholz (SPD) Němsku na konferency zastupować. Mjeztym Ruska ze swojej ofensiwu dale pokročuje.

Šwicarska organizuje po přeću Ukrainy 15. a 16. junija na hrodźe Bürgenstock pola Luzerna wjerškowe zetkanje. Na nim chcedźa wjace mjezynarodneje pomocy za nadpadnjeny kraj mobilizować. Ukraina so nadźija, runje neutralne abo samo z Ruskej spřećelene kraje na juhu wo swojej poziciji přeswědčić. Wosebje intensiwnje prócuja so wo Chinu. Njeńdźe w prěnim rjedźe wo měrowe jednanja z Ruskej. Moskwa njeje scyła přeprošena a tak a tak wotpokazuje, so na tajkej konferency wobdźělić.

Zwjazkowe knježerstwo za diplomatiske rozrisanje na Bliskim wuchodźe

Weimar (dpa/SN). Wonkowna ministerka Annalena Baerbock žada sej konkretne kročele na dobro politiskeho rozri­sanja konflikta na Bliskim wuchodźe – město symboloweje politiki. Wona reagowaše tak na připowědźi Španiskeje, Irskeje a Norwegskeje, Palestinu jako swójski stat připóznać. „Za politiske rozrisanje w surowym połoženju, kotrež dyrimy runje dožiwić, trjebamy politiske rozrisanje a nic symboliske připóznawanja“, rjekny politikarka Zelenych po wuradźowanjach ze swojimaj kolegomaj z Francoskeje a Pólskeje w formaće tak mjenowaneho Weimarskeho třiróžka w durinskim Weimaru. Hinak hač Norwegska, Irska a Španiska Němska dotal wotpokazuje, Palestinu jako swójski stat připóznawać. Hłowny wobskóržbnik Mjezynarodneho chłostanskeho sudnistwa w Den Haagu Karim Khan bě sej žadał, złóstnistwow přećiwo čłowjeskosći w Gazaskim pasmje dla zajeće nawodnistwa Hamas a israelskeho ministerskeho prezidenta Benjamina Netanjahuwa wukazać.

Tójšto smy w minjenych dnjach čitali a słyšeli wo dźensa před 75 lětami schwalenym Zakładnym zakonju za Zwjazkowu republiku Němsku. Za zapadny dźěl kraja předwidźany nachwilny zakoń njeměješe narok być wustawa kraja. Tajku chcychu hakle wudźěłać, hdyž stej krótko na to załoženej němskej stataj ZRN a NDR zaso zjednoćenej. Přiležnosć njeje so 1990 wužiwała. Politiska njewola na jednej a na tamnej stronje wutworjeny ćišć, tak chětře kaž móžno po tehdyšim paragrafje 23 Zakładneho zakonja pozdatnemu rajej přistupić, zadźěwaštej tomu, zo ma zjednoćena Němska dźensa modernu, z ludowym rozsudom wobkrućenu wustawu. Najebać to su w artiklach 1 do 19 zapisane zakładne prawa a wutworjenje Zwjazkoweho wustawoweho sudnistwa wudobyća, kotrež měli sej při wšej woprawnjenej kritice wysoko wažić. 75 lět Zakładneho zakonja zdobom wuwědomja, zo přiwzaće mjeńšinoweho artikla do njeho po zwrěšćenym pospyće w lěće 1994 dale wulke předewzaće wostanje. Axel Arlt

Torgau (dpa/SN). W Torgauwje, Wittenbergu a Eisenachu woswjeća lětsa 500. róčnicu prěnjeje spěwarskeje knižki ewangelskeje cyrkwje. Hač do nowembra wustupuja w Torgauwje a Wittenbergu sławne cyrkwinske chóry ze wšeje Němskeje, zo bychu tydźensce koncertowali a Bože słužby wobrubili, Ewangelska cyrkej srjedźneje Němskeje zdźěla. Dom Bacha w Eisenachu wěnuje jubilejej wot 11. julija wurjadnu wustajeńcu pod hesłom „Wosom spěwow: 500 lět spěwarske – 300 lět choralowe kantaty Bacha“. Lěto 1524 maja za lěto prěnjeje cyrkwinskeje spěwarskeje knihi. W Nürnbergu wuńdźe tele lěto „Kniha wosom spěwow“, w Erfurće ručna knižka „Enchiridion“. Johann Walter, kantor w Torgauwje, wuda w tutym lěće spěwnu knižku „Eyn geystlich Gesangk Buchleyn“. W njej wozjewichu prěni króć wjacehłósne sadźby najwažnišich ewangelskich choralow. Je to prěnja knižka, kotraž mjenuje so spěwarske. Knižku su we Wittenbergu ćišćeli a wudali. Martin Luther spisa za nju předsłowo, w kotrymž chwaleše hudźbu jako dobry srědk rozšěrjenja wjesołeho poselstwa mjez wěriwymi.