Kónc atomowych milinarnjow
Debatuja wojerskich lětadłow dla
Kijew (dpa/SN). Pólska smě Ukrainje z dowolnosću Němskeje pjeć bojowych lětadłow MiG-29 ze składow bywšeje NDR přewostajić. Zwjazkowe knježerstwo je wotpowědnu próstwu wčera w běhu někotrych hodźin přizwoliło. Nastupajo dowolnosć za pólski namjet rjekny zakitowanski minister Boris Pistorius (SPD): „To pokazuje: Na Němsku móžeš so spušćeć.“ Jedna so wo lětadła, kiž bě zwjazkowa wobora ze składow bywšeje Narodneje ludoweje armeje NDR přewzała. Lěta 2003 běchu 22 mašinow typa MiG-29 Pólskej předali. W kupnym zrěčenju je zapisane, zo dyrbi Němska přihłosować, chcyła-li Pólska lětadła dale dawać.
Předsyda frakcije Lěwicy w zwjazkowym sejmje Dietmar Bartsch je raznje přećiwo dodawanju lětadłow Ukrainje a zwjazkowemu knježerstwu wumjetuje: „Rozsud je fatalny zmylk“, rjekny Bartsch wčera w Berlinje. „Zwjazkowe knježerstwo překroči čerwjenu liniju, kotruž bě same postajiło.“ Bartsch na to pokaza, zo je zwjazkowy kancler Olaf Scholz (SPD) njedawno tajke postupowanje wotpokazał.
Wjace njeskutkow
Podstupim (dpa/SN). Ličba politisce motiwowanych njeskutkow w Braniborskej je loni widźomnje přiběrała. Cyłkownje su 4 384 tajkich chłostajomnych njeskutkow zličili, pjećinu wjace hač lěto do toho, nutřkowny minister Michael Stübgen (CDU) wčera zdźěli. Hižo lěta 2021 běchu z 3 661 padami nowy rekord politisce motiwowanych njeskutkow po zahajenju ličenja w lěće 2001 registrowali.
Z podźělom 47 procentow bu nimale kóždy druhi pad z prawicarskim politiskim pozadkom skućeny. To bě 2 046 padow a porno lětu 2021 rozrost wo dobre dwě sćě. Porno tomu je jenož pjeć procentow abo 232 padow jako politisce lěwicarskich zastopnjowanych. „Najwjetše wohroženje towaršnosće su dale prawicarskoekstremne njeskutki.“
To a tamne (14.04.23)
Kradnjene črije na policajskej straži wotedał je paduch w bayerskim Tirschenreuthće. Do toho bě wón we wobchodźe za twarske maćizny dźěłanske črije wuspytał a so z nimi na nohomaj z wobchoda zminył. Stare črije wostaji stejo. Sobudźěłaćerjo wobchoda móžachu pak jeho z pomocu awtomatiskeje kamery identifikować. Jako muž wot susodow zhoni, zo policija za nim pyta, so na policajskej straži přizjewi. Zastojnicy kradnjene črije sćazachu – a mužej stare přepodachu.
Při wohenju w infračerwjenej sawnje na kromje Mnichowa stej so dwě wosobje z kurom zajědojćiłoj a dyrbještej do chorownje. Elektriska sawna bě so z dotal njeznateje přičiny zapaliła, jako chcyše ju 57lětna žona prěni króć scyła wužiwać. Fachowcy tukaja na techniski defekt. Škodu w dospołnje zasazenym bydlenju trochuja na dźesaćtysacy eurow.
Sewjerna Koreja z nowej raketu
Seoul (dpa/SN). Sewjerna Koreja je po informacijach južnokorejskeho wójska za atomowe brónje kmanu raketu startowała, kotraž leći wjacore tysac kilometrow daloko. Wotlećała je raketa noweho typa dźensa rano njedaloko sewjerokorejskeje stolicy Pjöngjang, generalny stab w Seoulu zdźěla. Jako reakciju na nowy test Sewjerneje Koreje su USA zhromadnje z Južnej Koreju mórske wojerske zwučowanje w regionje zaso zahajili.
Kritizuja plany cannabisa dla
Berlin (dpa/SN). Unija je swoju kritiku na planach zwjazkoweho knježerstwa nastupajo legalizowanje cannabisa wospjetowała. Parlamentariski jednaćel frakcije CDU/CSU w zwjazkowym sejmje Thorsten Frei mjenowaše plany „strašne a naiwne“. Tajki „njezmysł“ chce frakcija w zwjazkowym sejmje wotpokazać. Minister za strowotnistwo Karl Lauterbach (SPD) strašne sćěhi předewšěm za młodostnych złahodnja, Frei kritizuje.
Klimoweho aktiwista storkał
Prezident USA Joe Biden je wčera we wobłuku swojeho wopyta w Irskej ...
Chcedźa widejo pruwować
Trump wobskorži prawiznika
Baerbock na wopyće w Chinje
Berlin/Peking (dpa/SN). Zwjazkowa wonkowna ministerka Annalena Baerbock je dźensa rano swój nastupny wopyt w Chinje zahajiła. W přistawnym měsće Tianjin je politikarka Zelenych šulu wopytała, na kotrejž wuwučuja tež němčinu. Nimo toho poby wona w němskim předewzaću, kotrež produkuje wětrniki. Centralne politiske rozmołwy su jutře w Pekingu planowane.
Tohorunja jutře wočakuje němsku politikarku chinski wonkowny minister Qin Gang. Zhromadnje z nim pojědźe Baerbock w spěšniku do Pekinga, po tym zo je zawod twarca elektriskich awtow wopytała.
Politisce drje budźe wopyt němskeje politikarki w Chinje jedyn z najćešich w dotalnym času jeje zastojnstwa. China wójnu ruskeho prezidenta Wladimira Putina přećiwo Ukrainje politisce podpěruje a zabjerje tež w prašenju Taiwana zapadej napřećo jara raznu poziciju. Opozicija w Němskej žada sej tuž wot Baerbock jasnu strategiju w poćahach k Chinje, zo bychu so hospodarske wotwisnosće wottwarili.
