Kijew (dpa/SN). Ukrainske nawodnistwo je ciwilistow we wot ruskeho wójska wobsadźenych kónčinach na juhu kraja k ćěkańcy namołwjało. Wobydlerjo kónčiny wokoło Chersona a Saporiššje dyrbjeli swoje domy nuznje wopušćić, w nuzy tež do směra na čornomórsku połkupu Krim, kiž bě sej Ruska hižo 2014 přiswojiła. Ewakuowanje je trěbne, zo njebychu ludźo planowaneje ukrainskeje napřećiwneje ofensiwy dla wohroženi byli, zdźěli wčera zastupowaca ukrainska ministerska prezidentka Irina Wereščuk.

Zakitowanski minister Oleksij Resnikow rjekny w rozmołwje z britiskimi nowinarjemi, zo je prezident Wolodymyr Zelenskyj ukrainskemu wójsku přikazał, z pomocu zapadnych bróni wobsadźene kónčiny na juhu kraja wróćo zdobyć. Wosebje pobrjóžne kónčiny su za ukrainske hospodarstwo jara wuznamne. Zelenskyj bě minjeny čas wospjet připowědźił, zo chcył sej kraj wot Ruskeje kontrolowane kónčicy wróćo zdobyć.

Při ruskich raketowych nadpadach w Donjecku je wčera 15 ciwilistow zahinyło.

Směrodajny rozsud na energetiskim kongresu we Waršawje zdźělili

Waršawa/Gdańsk (RD/SN). Pólska planuje hač do lěta 2043 cyłkownje šěsć jadrowych milinarnjow w kraju. Prěnja ma 2033 dźěłać započeć. Lěta 2026 chcedźa twarske dźěła zahajić. Wo městnosći za prěnju pólsku atomowu milinarnju su po lěta trajacych přepytowanjach mjeztym rozsudźili: Wona ma we wulkogmejnje Choczewo nad Baltiskim morjom njedaloko Gdańska nastać. Tole su minjeny tydźeń na kongresu we Waršawje zdźělili, hdźež rěčachu wo politiskim ­a energetiskim zawěsćenju kraja.

Lubmin (dpa/SN). Wot dźensnišeho ranja su naposledk najwažniši zwisk za ruski zemski płun do Němskeje krok po kroku wotpinyli. Po informacijach rěčnika předewzaća Nord Stream AG su z dołho připowědźenym wotšaltowanjom za nuznje trěbne hladanske dźěła w 6 hodź. započeli a w běhu dnja dodawanje ze zemskim płunom dospołnje přetorhnyli. Kaž rěčnik připowědźi, maja dźěła hač do 21. julija trać. W tymle času žadyn ruski zemski płun přez tutón płunowód do Němskeje wjace njepřińdźe. Přepruwować chcedźa mjez druhim wěstotne systemy, milinowe zastaranje, wohnjoškit kaž tež wentile za wotpinjenje. Je-li trjeba, chcedźa nastroje wuměnić. Tež software za kompjutery ponowja. Zwjazkowy minister za hospodarstwo Robert Habeck (Zeleni) je njedawno swoje wobmyslenja zwuraznił, zo Ruska płunowy honač po zakónčenju dźěłow wjace njewotwjertnje. Ruske statne płunowe předewzaće Gazprom bě mnóstwo dodawaneho płuna w juniju znižiło, powołujo so na techniske problemy. Dołhodobne wotpinjenje płunowoda by w Němskej razne wuskutki wosebje za přichodnu zymu měło.

Papagaj je minjeny kónc tydźenja w münsterlandskim Werne prawdźepodobnje paduchow wućěrił. Kaž policija zdźěla, běchu skućićeljo hižo škleńcu chěžinych duri jednoswójbneho domu rozbili, jako so něšto njewočakowaneho sta. Wočiwidnje běchu papagaja budźili, kiž móže „halo“ a „na ty“ prajić. Po do­talnym stawje su so paduši bjez rubizny zaso zminyli. Papagaj dźeń po tym policistow, kiž chcychu pad dokumentować, tohorunja z „halo“ a „na ty“ witaše.

Hłódny paduch, kotrehož běchu w badensko-württembergskim Stimpfachu w cuzym domje při pječenju kołbasy lepili (SN rozprawjachu) je so dźeń po tym na městno njeskutka nawróćił, hdźež móžachu jeho zajeć. Wobydlerka bě policiju informowała, zo w jeje zahrodźe cuzy muž spi. Zastojnicy zwěsćichu, zo jedna so wo paducha z cuzeho domu.