Přemało personala w chorownjach
Berlin (dpa/SN). Přiběracy wupad personala w chorownjach lětnjeje koronoweje žołmy dla so chorownje w Němskej jara starosća. „Ze wšitkich zwjazkowych krajow dóstawamy přizjewjenja, zo dyrbja jednotliwe stacije a wotrjady mało personala dla wotzjewić“, zdźěli šef předsydstwa Němskeje towaršnosće chorownjow Gerald Gaß. Sčasami su samo nuzowe přijimarnje wuchowanskich stražow wotzjewjene. „Tale situacija nas hladajo na nazymu chětro starosća.“
Ličba infekcijow je w minjenych tydźenjach zaso sylnje přiběrała. Roberta Kochowy institut je dźensa incidencu 687,7 nowych infekcijow na 100 000 wobydlerjow přizjewił. Fachowcy pak wuchadźeja z toho, zo je woprawdźita ličba wo wjele wyša, dokelž mnoho natyknjenych hižo PCR-test nječini a so tohodla njeregistruje. Wědomostny nawoda registra za intensiwne łoža Christian Karagiannidis měni, zo je wućeženje stacijow moderatne, ale za lěćo relatiwnje wysoke. Nastupajo pobrachowacy personal steji jasnje mjenje łožow k dispoziciji.
Pytaja nuznje nowy personal
Janšojsku milinarnju za nuzowu situaciju přihotuja
Choćebuz (dpa/SN). Za wobšěrniše zasadźenje nastupajo wěstotnu hotowosć blokow E a F Janšojskeje milinarnje pobrachuje personal, zdźěli zawodna rada předewzaća Łužiska energija a milinarnje (LEAG). Wjace hač sto sobudźěłaćerjow bychu trjebali, wuswětli předsyda zawodneje rady Rolle minjenu sobotu w informaciskim radiju rbb. Situacija je wosebity pad a njebě wotwidźeć. „Smy zwólniwi a spytamy to zmištrować“, wón wuzběhny. LEAG tuchwilu wjele dźěłowych městnow wupisa. Po informacijach koncerna pytaja mjez druhim mašinistow a wodźacych technikarjow za wobhospodarjenje milinarnje.
Blokaj E a F Janšojskeje milinarnje stej w štyrilětnej tak mjenowanej wěstotnej hotowosći. Po płaćiwym zakonju je jich zasadźenje jenož w nuzowych situacijach předwidźany. Block F měł so k 1. oktobrej 2022 a blok E k 1. oktobrej 2023 doskónčnje wotpinyć. Za čas wěstotneje hotowosće njewobdźělatej so blokaj na aktiwnym wikowanju.
To a tamne (05.07.22)
Mjeztym hižo 15. króć je Joey Chestnut z New Yorka wubědźowanje dobył, při kotrymž dyrbi hot dog jěsć. Swójski swětowy rekord 76 tajkich kołbaskow w całće w běhu dźesać mjeńšinow z lońšeho lěta lětsa docpěł njeje. Přiwšěm je 38lětny z wuslědkom, 63 kołbasow, spokojom, wšako njeměješe do toho dosć chwile trenować.
Cigaretoweje přestawki dla je muž w Fuldźe nimale swój ćah skomdźił. Poprawom je spěšnik hižo pomałku z dwórnišća wotjěł. Mužej pak so poradźi na njón skočić. Mjez dwěmaj wagonomaj sedźo na něhdźe 160 kilometrow na hodźinu spěšnym ćahu je něhdźe 20 kilometrow sobu jěł. Zwjazkowa policija je ćah skónčnje zadźeržała. Hladajo na žiwjenje strašnu akciju je wulke zbožo, zo je 32lětny wšitko bjez zranjenjow přetrał.
Wědomostnicy warnuja
Bon (B/SN). Najnowše statistiki katolskich wěriwych w Němskej podšmórnu dale trajacy proces wustupow z cyrkwje. Straty dowěry su wosebje znjewužiwanskich skandalow dla we wobłuku cyrkwje hoberske. W lěće 2021 wopušći 359 338 katolikow swoju cyrkej, to je dotal najwyša ličba. Prěni raz přisłuša mjenje hač połojca zwjazkowych wobydlerjow jednej z wulkich cyrkwjow. Kriza je so hižo wjele zašo započała. W dobje do 1. swětoweje wójny něhdźe 50 procentow katolikow njedźelne Bože mšě wopytowaše, dźensa je jich jenož hišće 4,3 procentow. Wědomostnicy warnuja před wotcuzbnjenjom młodych ludźi wot cyrkwje. Za fachowcow je jasne, zo ma cyrkej swoje struktury změnić. Sylnišo ma wona nazhonjenja a mysle młodych ludźi zapřijeć.
Medijowa kritika
Tři ludźi zatřělił
Kopenhagen (dpa/SN). Po amokowym běhu wčera wječor w Kopenhagenje je policija pola podhladneho třělbu a nóž namakała. Nimo toho měješe 22lětny Dana tež přistup k pistoli, tamniša policija dźensa zdźěli. Podhladny je w nakupowanskim centrumje danskeje stolicy tři wosoby zatřělił a štyri dalše zranił, při čimž su woni w kritiskim strowotnym stawje. K motiwej dotal hišće žane pokazki njepředleža.
Tež Němcaj pod znjezboženymi
Rom/Bozen (dpa/SN). Po zesunjenju wulkich dźělow lodowca w horinach Dolomitow na sewjeru Italskeje wuchadźa zwjazkowe wonkowne ministerstwo z toho, zo su tež Němcy mjez znjezboženymi. Kaž rěčnica ministerstwa dźensa zdźěli, jedna so wo dwě wosobje. Honorarny konsul w Bozenje a němske pósłanstwo w Romje so z italskimi zarjadami wuměnja. Wčera dóńdźe na horje Marmolata k njezbožu, při čimž su so dźěle lodowca, sněh a kamjenje zesunyli a krosnjerjow zasypali. Tuchwilu je něhdźe 20 wosobow zhubjenych.
Inflacija w Turkowskej wysoka
Planowanych wobswětowych postajenjow nižozemskeho knježerstwa dla ...
Scholz wosebitu akciju zahaji
Berlin (dpa/SN). Zwjazkowy kancler Olaf Scholz (SPD) starosća so stupacych płaćiznow energije dla, wón wčera w interviewje ARD wuswětli. „Jelizo naraz tepjenska zličbowanka wo něšto stow eurow stupa, potom je to suma, kotruž mnozy zmištrować njemóža. To je socialna rozbuchlina.“ Kancler prócuje so wo změrowanje a chce so dźensa ze zastupjerjemi hospodarstwa zetkać a wo wosebitej akciji rěčeć. Wobkedźbowarjo wočakuja, zo rozsudne naprawy tak mjenowaneje „koncertowaneje akcije“ hakle po lětnjej přestawce sćěhuja, hdyž budźe rozměr energijoweje a płaćiznoweje krizy jasniši. Mjeztym pak ze wšelakich směrow konkretne namjety předleža. Tak předstaji Zwjazk němskich dźěłarnistwow płaćiznowu garantiju za milinu a płun.
Najnuzniši problem su tuchwilu płaćizny płuna. Zwjazkowy hospodarski minister Robert Habeck (Zeleni) warnowaše před eksploziju płaćiznow pola měšćanskich zawodow, jelizo Ruska honač zawjertnje a zastaraćeljo dosć płuna k dispoziciji stajić njemóža.
To a tamne (04.07.22)
Dokelž chcyše pjećlětny minjeny pjatk rano w Drježdźanach na kóždy pad na hrajkanišćo, je z bydlenja staršich twochnył a so ze swojim kolesom na puć podał. Kedźbliwi pasanća su jeho šěsć kilometrow zdaleny při brjohu Łobja wuhladali. Tež mać je hižo za hólčecom pytała a policiju informowała. Mjez druhim su namołwu w socialnych syćach zahajili.
Wutřělow na kwasu dla měješe policija w Duisburgu minjeny štwórtk wulki wuspěch. Hósć na kwasu bě wjacore razy wulkeho zboža dla do powětra třělił, na čož wjacore awta policije přichwatachu. Jako sobujěducych luksusoweho kwasneho awta kontrolowachu, lepichu skónčnje 25lětneho nawoženju, za kotrehož přikaz jatby předležeše. Swój swjedźeń pak wón wopušćić njetrjebaše. Po tym zo je chłostanski pjenjez zapłaćił, móžeše so wón k swojim hosćom nawróćić.
Wuska mjezsobna wuměna
Z podijow k serbskimaj temomaj na Łužiskim cyrkwinskim dnju w Zhorjelcu
Kónc tydźenja leži za nami, na kotrymž su zhromadnosć a zetkawanja mjez protestantami a katolikami, Serbami a Němcami, Delnjoserbami a Hornjoserbami w srjedźišću stali. Tak piše Baršćanski farar Tobias Pawoł Jachmann jako zamołwity wšitkim tym, kotřiž su k poradźenju Serbskeho centruma na Łužiskim cyrkwinskim dnju minjenu sobotu w Zhorjelcu přinošowali. Nimo tam zastupjenych institucijow a towarstwow ma tež spisowaćel Křesćan Krawc swój podźěl. Wón čitaše w němskej rěči ze swojeje knihi „Was wir in uns tragen“. Po ličenju Tobiasa Jachmanna su poskitki Serbskeho centruma na Delnich wikach něhdźe 400 ludźi přiwabili. Jim přidruža so ći njeličeni, kotřiž dožiwichu na Hornich wikach program z chórom Łužyca. Wyši krajny cyrkwinski rada dr. Thilo Daniel z Drježdźan wopyta po Serbskim ewangelskim cyrkwinskim dnju w Bukecach tu Serbow znowa. Forum wo mjeńšinowej politice je wón kedźbliwje sćěhował.
Rěč je kluč k wobstajnej identiće
Na Łužiskim cyrkwinskim dnju su so za pochadom a jónkrótnosću w regionje prašeli.
DOMIZNA na nazhonjenjach a dopomnjećach bazuje. Identita husto z daleposrědkowanych nazhonjenjow wobsteji. To je stawiznar Dr. Lars Arne Dannenberg z Kinsporka minjenu sobotu w Zhorjelcu na Łužiskim cyrkwinskim dnju podšmórnył. Wón bě hromadźe z Dešanskej fararku Katharinu Köhlerowej, serbskim superintendentom Krystofom Rummelom a pólskim fararjom Cezarym Kroeliwiczom (Zgorzelec, Lubań) w podiju foruma „Štó je tu poprawom žiwy? Łužiske identity“. Wojerowski farar Jörg Michel moderěrowaše jón w Starej synagoze w Centrumje žiwa Łužica. Tónle forum bě jedyn z tam dohromady pjeć. „Teje łužiskeje identity njeje. Husto so identity kaž staćan NDR, Hornjołužičan, Serb kryja ...“, wuwjedźe historikar Dannenberg. „Łužičan móže na kóždy bok a wašnje wjacore identity w sebi zjednoćić.“
