Drježdźany (dpa/SN). Dźensa chcyše so wuběrk Sakskeho krajneho sejma za energiju, škit klimy, wobswět a ratarstwo znowa z wjacorymi namjetami frakcijow na temu wjelk rozestajeć. Tak so mjez druhim AfD za to wupraja, regulować jeho wobstatk. „Wjelk njeje ani w Europje, ani w Němskej, ani w Sakskej wohroženy“, wopodstatni frakcija swoje žadanje. W Němskej pak njeje žanoho managementa, kotryž regulaciju zmóžnja. AfD knježerstwo namołwja, zhromadnje ze zwjazkowymi krajemi „dźiwino-ekologiski rumowy koncept“ zdźěłać.

Koalicija CDU, Zelenych a SPD prosy wo sylniši management nastupajo wjelči wobstatk. Runočasnje so za to zasadźa, plahowarjow pastwoweho skotu hladajo na wudawki za jeho škit pjenježnje dale podpěrać. „Dotalne pozitiwne wuwiće wobstatka je wuspěch škita wjelkow, zdobom pak plahowarjow skotu wužaduje“, rěka ze stron koalicije. W Sakskej je tučasnje 25 wjelčich črjódow.

Społnomócnjeny za wuchodne kraje Wanderwitz rozprawu předstajił

Berlin (dpa/SN). Społnomócnjeny zwjazkoweho knježerstwa za wuchodne zwjazkowe kraje Marco Wanderwitz wobkedźbuje mjez mnohimi wuchodnymi Němcami „pohłubšene zasadne dwěle“ napřećo politice a demokratiji. „To drje je mjeńšina, ale wona je wjetša hač w starych zwjazkowych krajach“, rjekny politikar CDU powěsćerni dpa. „To demokratiju wohrožuje. Dyrbimy docpěć, zo ludźi wo demokratiji a prawniskim staće přeswědčimy. Dyrbjało kónc z tym być, zo při kóždych wólbach jednoho z wuchodoněmskich krajnych sejmow kaž putani na wólbne wuslědki hladamy a dyrkotamy, kelko procentow su ekstremne mocy zaso docpěli.“

Twochnjeny kenguru bě wčera w měsće Delmenhorsće po puću. Kaž rěčnik policije zdźěli, słuša skoćo swójbje. Swědka bě wčera rano policiju alarmowała, jako wuhlada kenguruwa při busowym zastanišću. Zastojnicy spytachu jeho popadnyć, štož pak so jim njeporadźi. Su tež přestali dale za nim pytać. Wšako z jich strony rěkaše: „Dokelž žane wohroženje njewobsteji, njejsmy přisłušni.“

Chětro wopity 56lětny je w běłym kitlu, ze zawobalenym łochćom a do ruki kałnjenej kanilu chorownju wopušćił a tak druhi raz na dźeń zasadźenje policije ­zawinił. Muž bě wutoru z 3,5 promilemi alkohola w kreji po durinskim Hildburghausenje kolesował. Zazy do wonkowneho špihela awta, padny a so zrani. Za braće kreje a zawobalenje ranow dowjezechu jeho do chorownje, hdźež pak so jemu po wšěm zdaću njelubješe.

Amsterdam (dpa/SN). Pospytane morjenje prominentneho nižozemskeho kriminalneho reportera Petera R. de Vriesa zbudźa w kraju wulku poraženosć. Policija je třoch podhladnych zajała. Ministerski prezident Mark Rutte rěčeše wo „nadpadźe na swobodny žurnalizm“. Na reportera běchu wčera wječor třěleli, jako wón studijo telewizijneho sćelaka wopušći. Skućićel bě jemu do hłowy třělił a jeho žiwjenjastrašnje zranił. De Vries leži w kritiskim stawje w chorowni.

Warnuja Iran před eskalaciju

Wien (dpa/SN). Wonkowni ministrojo Němskeje, Francoskeje a Wulkeje Britaniskeje warnuja Iran před dalšej eskalaciju w atomowej zwadźe. W zhromadnej deklaraciji zwuraznjeja woni swoje „chutne starosće“, zo móhł kraj uran na maćiznu předźěłać, kotraž hodźi so za twar atomowych bróni. Tajki material njeje za ciwilny wobłuk atomoweje energije trěbny, ale słuži jeničce za twar jadrowych bróni, ministrojo pisaja.

Dalše ćěła wućahnyli