Wopačna chorhoj skandal zbudźiła
London (dpa/SN). Byrnjež Chorwatska na europskich koparskich mišterstwach hižo zastupjena njebyła, postara so wona z wulkim skandalom wo mjezynarodnu kedźbnosć. Tak su hrajerjo wokoło kapitana Luki Modrića wšitke štyri partije na hrudźi wopačnu chorhoj Chorwatskeje měli. Čerwjeno-běły šachowy muster započina so normalnje horjeka nalěwo z čerwjenym kašćikom. Chorwatska wubranka pak hraješe z nawopačnym mustrom, kotrež započina so z běłym kašćikom. To dopomina na režim Ustaša, kiž bě w Druhej swětowej wójnje poboku nacistiskeje Němskeje wojował a je surowe wójnske złóstnistwa předewšěm na serbiskich ciwilistach a wójnskich jatych zawinował.
Chorwatski koparski zwjazk rěčeše wo „njewotpohladnym zmylku“, na kotryž njeběchu so dohladali, a je so pola koparskich fanow zamołwił. Zwjazk chce za koparske trikoty zamołwitu firmu namołwić, interne konsekwency sćahnyć. Chorwatske mustwo bě hižo wospjet z prawicarskimi symbolemi napadnyło.
To a tamne (02.07.21)
Wjace hač 30 króć nuzowe čisło wolił je sydomlětny hólc w Mnichowje a zawini tak zasadźenje policije. Pachoł bě tak mjenowanu smartwatch wužiwał – naručny časnik, z kotrymž móžeš tež telefonować. Zastojnicy podachu so na to k městnu, hdźež hólčec bydleše. Tam so wukopa, zo bě smartwatch k narodninam dóstał, zo pak njemóžeše ju hišće posłužować.
Z kašćikom piwa je wonkowny minister Heiko Maas swój dołh pola Britow zarunał. Wón bě so z britiskim kolegu w zastojnstwje Dominicom Raabom sadźił, zo Němska na koparskich EM přećiwo Jendźelskej dobudźe, čemuž wšak na kóncu tak njebě. Po poražce 0:2 we Wembleyjowym stadionje Maas kašćik piwa we wulkopósłanstwje Wulkeje Britaniskeje woteda. Tam přizna, zo je sej z Raabom w mjezynarodnych prašenjach poprawom přezjedny, nic pak w kopańcy.
Certifikat EU płaćiwy
Berlin (dpa/SN). Po cyłej Europskej unji płaći wot dźensnišeho jednotny certifikat za šćěpjenych pře koronawirus. Tónle wupokaz ma předewšěm pućowanje wolóžić. Čłonske staty EU běchu přilubili, zo njetrjebaja mějićeljo wupokaza do karanteny abo na test. Wupokaz móže tež informacije wo přetratej infekciji wopřijeć. Informacije su koděrowane na mobilnym telefonje składowane abo na dokumenće wućišćane.
Policista w Šwedskej zatřělili
Stockholm (dpa/SN). W šwedskim měsće Göteborgu su policista wosrjedź dróhi zatřělili. Po informacijach policije bě zastojnik minjenu nóc z wjacorymi wosobami w rozmołwje, jako na njeho třělachu. Wón zemrě w chorowni. Skućićela hišće nimaja, tež jeho motiw njeznaja. W potrjechenej kónčinje dochadźa stajnje zaso k třěleńcam mjez kriminelnymi skupinami. Tohodla su policisća tam wosebje prezentni. Njeskutk je w kraju wulku poraženosć zbudźił.
Planuje 204 miliony dozow
Po dźělnym sypnjenju wjaceposchodoweho bydlenskeho domu w Miamiju w ...
Za reformu wotsunjenja
Třeći najćopliši junij po lěće 1881
Offenbach (dpa/SN). Słónčny, dešćikojty a ćopły: Z přerěznej temperaturu 19,0 stopnjow bě lětuši junij po informacijach Němskeje wjedroweje słužby třeći najćopliši wot zapisowanja wjedra w lěće 1881. Tak leži junij wo 3,6 stopnjow nad přerězkom mjezynarodneje referencneje doby 1961–1990, kaž rěčnik wjedroweje słužby wčera po dotalnym wuhódnoćenju datow wjace hač 2 000 wjedrarnjow Němskeje zdźěli. Přirunujo z aktualnišej a ćoplišej přirunanskej dobu 1991–2020 wučinja rozdźěl přeco hišće 2,6 stopnjow. Předewšěm w druhej třećinje měsaca bě prěnja lětuša žołma horcoty za ludźi dosć napinaca. 19. junija su w Berlinje 36,6 stopnjow naměrili.
Z 95 litrami dešća na kwadratny meter ležeše junij tež nad wjelelětnym přerězkom 85 litrow, předewšěm wulkich zliwkow z krupami dla.
Maas na wopyće w Pólskej
Waršawa (dpa/SN). Wonkowny minister Heiko Maas (SPD) je so dźensa na wopyt do Pólskeje podał. We Waršawje wočakowaše jeho kolega w zastojnstwje Zbigniew Rau. Jedne z ćežišćow rozmołwow je bjezdwěla wjele diskutowany němsko-ruski płunowód Nord Stream 2.
Do wopyta Maasa bě minister Rau w hóstnym přinošku za dźenik Frankfurter Allgeneine Zeitung Němsku před „imperialnymi paslemi“ ruskeho prezidenta Wladimira Putina warnował. Z dotwarom płunowoda nastanje na wuchodnej flance NATO wěstotny deficit, Rau twjerdźi. Ruska z pipelinu wotwisnosć Europy wot ruskeho płuna dale zesylni a ma tak w konfliktnym padźe składnosć, ćišć wukonjeć.
Nord Stream 2 drje njeje jenički kontrowersny dypk w němsko-pólskich poćahach. Na wopyće zwjazkoweho prezidenta Franka-Waltera Steinmeiera bě sej statny prezident Andrzej Duda twar wopomnišća za pólske wopory nacionalsocializma w Berlinje hač do lěta 2024 žadał. Nimo toho Waršawa na tym wobstawa, Polakam w Němskej status mjeńšiny spožčić.
Starosća so wo demokratiju
Naprašowanje k stejišću ludźi aktualnu statnu formu nastupajo
Stuttgart/Drježdźany (dpa/SN). W Němskej starosći so wjetšina ludźi wo staw demokratije a wo agresiwnosć w zjawnosći. To je wuslědk kraje přesahowaceho naprašowanja Roberta Boschoweje załožby a organizacije More in Common, kotryž su wčera w Stuttgarće předstajili. Aktualnje starosći so 65 procentow woprašanych „často wo połoženje demokratije“ a wobkedźbuje, zo je zjawna debata w Němskej dale a bóle z hidu pjelnjena (70 procentow).
Roberta Boschowa załožba a organizacija More in Common stej w Němskej, Francoskej, Wulkej Britaniskej, Pólskej a USA poměr ludźi k demokratiji přepytowałoj. Slědźenskej institutaj YouGov a Kantar běštej so k tomu spočatk lěta 2021 wjace hač 10 000 ludźi w tychle krajach naprašowałoj.
To a tamne (01.07.21)
Lubosć k zwěrjatam je pjaneho kolesowarja pječa pohnuła po seklojtej čarje jězdźić. Wón bě so šlinkam wuwinyć chcył, zo njeby je přejěł, kaž policistam rjekny. Swědk bě zastojnikow alarmował, dokelž bě kolesowar cyłu kolesowansku šćežku za sebje trjebał. Test alkohola wunjese, zo drje njeběchu šlinki jenička přičina: Pola muža naměrichu 2,5 promilow.
Kónc němskeje wubranki na europskich koparskich mišterstwach je třećinje wobydlerjow Němskeje wšojedne. To je wuslědk reprezentatiwneho naprašowanja slědźenskeho instituta YouGov mjez 1 731 ludźimi nad 18 lětami. Na prašenje za začućemi po zwrěšćenju mustwa rjekny 35 procentow „zo so wo to njerodźa“. 27 proc. poda, zo „njejsu překwapjeni“. 15 proc. je „jara přesłapjenych“, wosom procentow so „rudźi“ a jenož pjeć procentow je „rozhněwanych“.
Kontury změny struktury jasniše
Regionalny přewodźacy wuběrk Łužicy, wutworjeny kónc apryla jako posudźowacy gremij za we wobłuku zwjazkoweho zakonja wo skrućenju struktury namjetowane projekty a naprawy k zmištrowanju strukturneje změny, je wčera na nowinarskej konferency wo swojim prěnim posedźenju w Běłej Wodźe informował. Facit čłonow wuběrka je, zo su „dobry wuslědk docpěli“.
