Čakaja njesćerpnje na koncept
Schwedt (dpaSN). Štyri měsacy do zahajenja wolijoweho embarga přećiwo Ruskej pobrachuje po informacijach dźěłarnistwa za chemiju, hórnistwo a energiju (IG BCE) konkretny koncept za rafineriju w braniborskim Schwedće. „Je najwjetši čas, zo so rozrisanje prezentuje“, wuzběhny přisłušny wobwodny nawoda dźěłarnistwa Rolf Erler powěsćerni dpa. Ludźo w Schwedće njesćerpnje na to čakaja.
Němska je so w běhu sankcijow přećiwo Ruskej na runinje EU dla zawjazała, so wot spočatka lěta 2023 dospołnje ruskeho wolija wzdać. To potrjechi rafineriju, kotraž z ruskim wolijom dźěła. Ruski wobhospodar Rosneft ma po předstawach zwjazkoweho hospodarskeho ministra Roberta Habecka (Zeleni) lědma zajim na tym, so ruskeho wolija wzdać. Habeck a jeho ministerstwo dźěłataj měsacy dołho na rozrisanju. Krótkodobnje móhli tankowcy a přistaw z Rostocka něhdźe 60 procentow potrjeby za rafineriju zaručić. Tež dodawanje wolija z Pólskeje je móžne. Přiwšěm je přichod zawoda njewěsty.
Situacija stabilna
To a tamne (24.08.22)
Klimowej aktiwistaj staj wčera jedyn z najwuznamnišich wobrazow galerije Starych mištrow w Drježdźanach za swójsku akciju znjewužiwałoj. Wonaj nalěpištaj po słowach rěčnicy skupiny „Poslednja generacija“ swoju ruku na ramik Raffaeloweje „Sixtinskeje madony“. Wuměłska twórba sama a historiski ramik wobškodźenej njejstej. Restawratorojo pak sej nětko wšitko dokładnje wobhladuja. Policija mjeztym wobkrući, zo su přepytowanja přećiwo aktiwistomaj zahajene.
Twochnjeny byk je so w Israelu do zarjadniskeho twarjenja banki zadobył a tam po chódbach ćěrił. Wobrazy kamery zawčerawšim pokazachu, kak so wulke zwěrjo po hładkim špundowanju suwaše a do sćěny zrazy. Rěčnica banki zdźěli, zo su byka skónčnje dosahnyli a z twarjenja w Lodźe pola Tel Aviva wotwjedli. Wjetšu wěcnu škodu w twarjenju zwěsćili njejsu.
Žně znowa pod přerězkom
Berlin (dpa/SN). Němscy ratarjo su lětsa trochu wjace žita domchowali. Kaž burski zwjazk dźensa w Berlinje zdźěli su po nachwilnych trochowanjach něhdźe 43 milionow tonow a z tym dwaj procentaj wjace žita hač loni žnjeli. Mnóstwo žnjow pak ležeše znowa pod přerězkom minjenych lět. Wulki faktor njewěstosće su hišće wočakowane žně nastupajo kukuricy, kotraž je w mnohich regionach sylnje pod trajacej suchotu ćerpiła.
Mjenje tworow k hodam
Berlin (dpa/SN). Přetrjebarjo měli so po informacijach branše hladajo na hody na to nastajić, zo budźe mjenje wudźěłkow k dispoziciji. „Někotre produkty kaž elektroniske nastroje, hrajki a tekstilije z Azije móhli hody lědma dosahać“, wuswětli dźensa hłowny jednaćel wikowanskeho zwjazka HDE Stefan Genth. Dodawanske rjećazy jenož pomału zaso zaběža. Něhdźe 90 procentow wikowarjow rozprawja wo dodawanskich ćežach.
Posłužby budu wobmjezować
Tež w Němskej wěnuja so ratarjo wosebitym družinam howjadow a ...
Předewšěm chudšim pomhać
Sebnitz (dpa/SN). Zwjazkowa swójbna ministerka Lisa Paus (Zeleni) chce so po swójskim wuprajenju w zwjazkowym knježerstwje wo třećim wolóženskim pakeće předewšěm za chudše swójby z mało dochodami zasadźeć. Tole zwurazni wona na kromje lětnjeje tury wčera w sakskim Sebnitzu. „Tu trjebamy zaměrnje wotpowědne wolóženje.“ Wona zasadźuje so předewšěm za to, zo swójby zymu derje zmištruja.
W Sebnitzu zwurazni jednaćel towarstwa Akcija ciwilna kuraža Sebastian Reißig swój strach, zo móhli protesty lětsa nazymu sylniše być hač loni nazymu a w zymje přećiwo naprawam korony dla. „Jelizo so płaćizny płuna podwoja abo potroja, potom du ludźo won na dróhu“, wón wuzběhny. Paws zdźěli, zo chce knježerstwo wot eksistency wohroženych ludźi jasnje podpěrać. Zdobom je solidarita w towaršnosći trěbna. Wona skedźbnja w tym zwisku předewšěm na to, zo je w Europje wójna.
Pytaja za přechodnym rozrisanjom
Berlin (dpa/SN). W krizy sćelaka Berlin-Braniborska (RBB) kołowokoło bjezposrědnje pušćeneje intendantki Patricije Schlesinger dźěłaja zastupjerjo kontrolnych gremijow na přechodnym rozrisanju na čole sćelaka. Wčera wupraji so zarjadniska rada za to přechodneho intendanta powołać, kotryž dyrbjał zjawnoprawniski sćelak ARD z krizy wjesć.
Po informacijach powěsćernje dpa móhło dźensa k rozmołwje ze zastupjerjemi RBB ze zastupjerjemi krajow w Podstupimje dóńć, zo bychu wo dalšim postupowanju rěčeli. Braniborska ma tuchwilu prawniski dohlad do RBB. Zajutřišim schadźuje so druhi kontrolny gremij, rozhłosowa rada.
Po informacijach RBB nawjeduje tuchwilu chory pisany zarjadniski direktor Hagen Brandstäter naležnosće sćelaka.
Po wjetšinowym rozsudźe pušćena intendantka Schlesinger njedóstanje žane wotnamakanje. Tole je zarjadniska rada wčera wobzamknyła.
Wjacore faktory su móžne
Wobswětowy wuběrk sejma dźensa móžne přičiny mrěća rybow rozjimuje
Berlin/Podstupim (dpa/SN). Zwjazkowe knježerstwo je pólske wumjetowanja nastupajo wopačne informacije w zwisku z mrěćom rybow we Wódrje wotpokazało. „Wobžarujemy, zo je k hódnoćenju z pólskeje strony dóšło“, zdźěli rěčnik zwjazkoweho wobswětoweho ministerstwa wčera w Berlinje. Pólska bě do toho wo „fake newsach“ ze stron Němskeje rozprawjała. Tuchwilu pytaja stajnje hišće za přičinami mrěća rybow we Wódrje.
Mjeztym su fachowcy wjacore organiske a anjeorganiske substancy we wodźe namakali, kotrež móhli za to zamołwite być, praji rěčnik dale. „Zda so woprawdźe wo chemijowy cocktail jednać. Žana ze substancow njeje po našich dotalnych dopóznaćach jenička zamołwita, kotraž je mrěće rybow zawinowała.“ Tak móhło so wo „multi-kawsalny podawk “ jednać.
Proces dale dźe
Najwažniše je derjeměće
Thimphu (dpa/SN). Kralestwo Bhutan w Himalaji hladajo na hospodarske połoženje a wotběrace rezerwy dolara přichodnje nimale žane awta a motorske wjace njeimportuje. Wuwzaća su jeničce wužitne jězdźidła w hódnoće mjenje hač 1,5 milionow ngultruma (nimale 19 000 eurow). K tomu słušeja tohorunja mašiny za hłubokotwar, ratarske mašiny, jězdźidła za turistiski wobłuk a wěste taksije, tamniše financne ministerstwo w stolicy Thimphu njedawno zdźěli. Import jězdźidłow je jedyn z hłownych faktorow za spěšnje woteběrace rezerwy. Wustawa Bhutana předpisnje, zo dyrbi kraj dosć wukrajnych dewizow měć, zo móhł kóšty za wažne importy za znajmjeńša jedne lěto narunać.
W małym kraju mjez Chinu a Indiskej bydli mjenje hač 800 000 wobydlerjow. Woni su jedyn z najzbožownišich ludow swěta. Jich kral bě před lětdźesatkami postajił, zo je derjeměće wažniše hač hospodarski rozrost. Z produktom bruttozbožo, kotryž bazuje na wšelakich faktorach kaž strowota, kubłanje, ekologiska mnohotnosć a zamołwite wjednistwo knježerstwa, tole tam zwěsćuja.
