Wulke změny njebyli
Wuskutki dźewjeć eurow tunjeje jězdźenki wědomostnje přepytowane
Berlin/Mnichow (dpa/SN). Wolóženje za přetrjebarjow, přinošk k přewrótej wobchada, lěpšiny za nahladnosć busa a železnicy: Wočakowanja na dźewjeć eurowski tiket w zjawnym wosobowym bliskowobchadźe (ÖPNV) su hoberske. Trochu wjace hač dwaj měsacaj po starće po cyłym Zwjazku płaćiweho tiketa hódnoći zwjazkowy wobchadny minister Volker Wissing (FDP) projekt hižo jako wuspěch. Při tym wědomostne wuhódnoćenje hišće běži. A prěnje dopóznaća pokazuja na to, zo drje wosebita jězdźenka bjezdwěla skutkownosć pokazuje, ale lědma wšitke nadźije a zaměry spjelnić njemóže.
Lěkarka atestow dla zasudźena
Garmisch-Partenkirchen (dpa/SN). Wustajenja sta wopačnych nahubnikowych atestow dla su lěkarku z Hornjeje Bayerskeje k dwulětnemu jastwu zasudźili. Dokelž njeměješe wobskoržena žanoho dowidźenja, njebu chłostanje na pruwowanski čas postajeny, wujasni direktorka hamtskeho sudnistwa Christine Schäfer minjeny pjatk. Statne rěčnistwo kaž tež prawiznik žony stej mjeztym rewiziju přećiwo wusudej zapodałoj.
W pandemiji běchu wosebje přećiwnicy naprawow koronawirusa dla spytali, sej pola lěkarjow wuswobodźenja wot winowatosće wužiwać nahubnik wobstarać. Wopodstatnjene bu to potom z tym, zo njemóhli mějićeljo atestow pječa medicinskich přičin dla nahubniki wužiwać. Wobskoržena medicinarka je tajke strowotniske wuswědčenja wustajała, bjez toho zo by potrjechenych přepytowała. Dohromady dźěše wo 309 padow.
Pola wobwinowaneje běchu tež přepytowanje přewjedli. Najebać to wona dale wopačne atesty wupisowaše. Hamtske sudnistwo je jej tuž zakazało, přichodne tři lěta jako lěkarka skutkować. Zakaz je hnydom płaćiwy.
To a tamne (08.08.22)
Dospołnje přećeženej nakładnej awće je policija na awtodróze A 2 pola Hamma našła. Kaž rěčnik policije zdźěli, transportowaštej awće šokolodu. Jedyn wóz wažeše dźesać tonow, tamny wjace hač dwanaće, byrnjež byštej najwjace 7,5 tonow wozyć směłoj. Transportna firma dyrbješe třeće awto organizować a šokolodu překładować. Předewzaću hrozy pjenježna pokuta 300 eurow.
Jenož krótke bě wjeselo 14lětneho, po tym zo bě na hermanku w delnjofrankskim Marktheidenfeldźe pistolu-hrajku dobył. Policija jemu hrajku wotewza. Do toho bě sobudźěłaćer hermanka pachoła namołwjał, bróń hakle doma wupakować. 14lětny pak tole ignorowaše a z brónju, kotraž wupada kaž prawa pistola, po swjedźenišću běhaše. Wón smě sej bróń na policajskej straži wotewzać. Předawarjow proša, tajke hrajki wjace njepředawać.
Planuja wopyt Taiwana
Berlin (dpa/SN). Wuběrk zwjazkoweho sejma za čłowjeske prawa planuje kónc oktobra jězbu do Taiwana. Wotpowědnu próstwu chcedźa najpozdźišo spočatk septembra prezidijej parlamenta zapodać, powěsćernja dpa wot wjacorych zapósłancow zhoni. Jězba njeje reakcija na wjele diskutowany wopyt wodźaceje politikarki USA Nancy Pelosi w Taiwanje, ale bě pječa hižo dlěje planowany. China bě na jeje wopyt raznje reagowała a mórske manewry před Taiwanom zahajiła.
Ruska z nowej ofensiwu
Kijew (dpa/SN). Ruske wojerske jednotki su po ukrainskich informacijach w kónčinje wokoło Donjecka wjetšu ofensiwu zahajili a měrja so na měsće Bachmut a Awdijiwka, ukrainski generalny stab zdźěla. Z nadběhami ruske jednotki prawdźepodobnje spytaja, sej dobre wuchadźišćo za nadběh na město Soledar stworić. To je poslednja kónčina w Donbasu, kotruž ukrainske jednotki hišće kontroluja. Ukraina je kónčinu za zakitowanje masiwnje wojersce wutwariła.
Wo wjele wjace sobujěducych
Serbska hudźbna wuměłča Carolina Eyckec (prědku nalěwo) je ...
Dalše łódźeze žitom po puću
Lauterbach natyknjeny
Erdoğan a Putin so zetkataj
Moskwa/Istanbul (dpa/SN). Ruski prezident Wladimir Putin a toho turkowski kolega w zastojnstwje Recep Tayyip Erdoğan chcyštaj so dźensa w ruskim wočerstwjenišću Soči nad Čornym morjom zetkać. Rozmołwa měješe so w popołdnišich hodźinach zahajić. Po informacijach Krjemla chce Putin tež wo tym rěčeć, turkowske bojowe truty kupić, štož turkowske žórła njewobkrućeja. Oficialnje rěkaše, zo chcetaj Putin a Erdoğan wo aktualnych globalnych a regionalnych prašenjach rěčeć. Nimo wójny Ruskeje w Ukrainje drje tež wo turkowskich planach nastupajo ofensiwu na sewjeru Syriskeje rěčitaj. Moskwa bě Turkowskej wot tohole naposledk wotradźiła.
Erdoğan bě krótko po zahajenju ruskeho nadpada na Ukrainu rjekł, zo předań bróni Ruskej njewuzamkuje. Ruska zajimuje so na přikład za wot ukrainskeje armeje wuspěšnje zasadźenu bojowu trutu Bayraktar. Turkowska wudźeržuje dobre styki k Ukrainje, ale tež k Ruskej a wobhladuje so jako posrědkowar mjez woběmaj krajomaj we wójnje.
Lětsa dobre žně jabłukow
Podstupim/Teltow (dpa/SN). Plahowarjo sadu w Braniborskej liča z dobrymi žnjemi jabłukow w tutym lěće. „Wočakujemy dobre do jara dobre žně“, rjekny jednaćel zwjazka plahowarjow, Andreas Jende, srjedu. Loni bě hubjeny wunošk po jeho podaćach něhdźe 18 800 tonow wunjesł, lětsa wočakuje wón něhdźe 25 000 tonow. Zazběh žnjow je w septembru.
Škody na jabłukach spalenja słónca dla su ratarjam wjace dźěła činili, njeměli pak wunošk čujomnje pomjeńšić, měnješe Jende, kiž so za sadowe plantaže tež dešća nadźija. Wón pak so boji, zo tuńše jabłuka z wukraja domjace wiki přepławjeja, dokelž na přikład burja w Pólskej swoje wudźěłki hižo kaž něhdy do Ruskeje předawać njemóhli. Jabłuka su po informacijach krajneho zarjada za statistiku najwažniše w braniborskim sadarstwje: Wone zabjeru ze 818 hektarami 59 procentow za štomowy sad wužiwaneje přestrjenje. 2017 bě jich 873 hektarow. W Braniborskej su po statistiskim zarjedźe hłowne plahowanske kónčiny za jabłuka we wokrjesach Podstupim-Srjedźna marka, Märkisch-Oderland kaž tež w Frankfurt nad Wódru.
