To a tamne (12.08.22)
Jako štom předrasćeny muž je w bayerskim Ingolstadće kolesowarku wustróžił, a to tak jara, zo je 45lětna padnyła a so zraniła. Žona bě ze swojim mandźelskim w měšćanskim parku po puću, jako so z plastowymi łopjenami zdrasćeny muž naraz pokaza. Wón drje jej hišće pomoc poskići, potom pak so naraz zminy. Policija pyta nětko za swědkami tuteje kuriozneje situacije.
Dwaj měsacaj po zajeću Jasona Alexanera před domom spěwarki Britney Spears su něhdyšeho mandźelskeho spěwarki ranjenja domjaceho měra a ranjenja ćěła dla wobwinowali. Napřećo statnemu rěčnistwu je Alexander wumjetowanja přiznał, zo by so procesej wuwinył. Jeho su mjeztym pušćili. Wón dyrbi pak wotstawk sto metrow k Spears dodźeržeć. Spěwarka bě so 2004 na swojeho přećela wudała, mandźelstwo dźeržeše 55 hodźinow.
Trump so sudnistwu spjećował
New York (dpa/SN). Po wjele kedźbnosće zbudźacym přepytanju swojeje ležownosće w Floridźe wostanje bywši prezident Donald Trump dale we wizěrje justicy. W New Yorku je so Trump wčera spjećował, so pod spřisahanjom wo swojim dźěle jako wikowar imobilijow wuprajić. 76lětny bě do toho po sudniskim wukazu k woprašowanju pod spřisahanjom do běrowa New Yorkskeje generalneje statneje rěčnicy Letitije James dojěł. Trump rěčeše znowa wo „politiskim přesćěhanju“.
Pelosi wopyt Taiwana zakituje
Washington (dpa/SN). Předsydka Domu reprezentantow USA Nancy Pelosi je swój wjele diskutowany wopyt Taiwana zakitowała. „Njedowolimy Chinje, Taiwan izolować“, rjekny demokratiska politikarka wčera we Washingtonje. China bě wopyt Pelosi raznje kritizowała a je na to wulke mórske wojerske manewry wokoło Taiwana zahajiła. Peking wobhladuje Taiwan jako swój teritorij a kontakty druhich krajow ke kupje wotpokazuje.
Wuhlowe embargo płaćiwe
Skupina 30 młodych ludźi z Ukrainy, Georgiskeje a Němskeje je ...
Namołwja do spjećowanja
Kijew (dpa/SN). Ukrainski prezident Wolodymyr Zelenskyj je wobydlerjow wot Ruskeje wobsadźenych kónčinow kraja namołwjał, so spjećować. Woni měli ukrainsku armeju po wěstych kanalach informacije wo njepřećelu abo wo kolaboraterach dodawać, rjekny Zelenskyj minjenu nóc w swojim widejowym poselstwje. Zdobom prošeše wón wo dalše zapadne brónje za swój kraj. Čim rozsudniša pomoc je, ćim prjedy so wójna skónči, rjekny wón hladajo na dźensnišu konferencu w Kopenhagenje. Tam wuradźuja zakitowanscy ministrojo wjace hač dźesać krajow wo wojerskej a financnej podpěrje na dobro Ukrainy.
Šef ukrainskeho prezidialneho zarjada Andrij Jermak sej žada, wojowanja hišće do zahajenja tepjenskeje periody zakónčić, zo njemóhła ruska infrastrukturu ćopłoty a energije zničić.
Scholz so prašenjam stajał
Lindner swoje plany zakituje
Berlin (dpa/SN). Zwjazkowy financny minister Christian Lindner je swoje plany nastupajo dawkowe wolóženja přećiwo kritice zakitował. „To je socialnje wuwažene“, rjekny předsyda FDP wčera wječor w sćelaku ZDF. „Sylne ramjenja dyrbja tež přichodnje wjele njesć. Chcu pak so wo to postarać, zo njezměja sej hišće ćešo.“
Lindner bě swoje plany wčera předstajił. 48 milionow wobydlerjow ma klětu z toho profitować, wón rjekny. Cyłkownje dźe wo wjace hač dźesać miliardow eurow. Procentualnje maja ludźo ze snadnymi dochodami wjace lěpšinow hač derje zasłužacy. W absolutnych ličbach wupada pak to hinak. Koaliciskej partneraj Zeleni a SPD matej to za njesprawne.
Nawoda Němskeho instituta za hospodarske slědźenje Marcel Fratzscher mjenowaše plany Lindnera w sćelaku ARD „jara njewuwažene“. „70 procentow z toho je na dobro 30 procentow z najwyšimi dochodami“, wón kritizowaše. „Ludźo z niskimi dochodami, kiž lědma dawki płaća, njedóstanu ničo z toho. Runje jich pak inflacija najbóle trjechi.“
Inflacija dale wulka
Tankowy rabat a dźewjeć eurow tunja jězdźenka trochu pomhatej
Wiesbaden (dpa/SN). Inflacija w Němskej dźerži so najebać dalši lochki spad zasakle nad mjezu sydom procentow. Dźewjeć eurow tuni tiket a tankowy rabat stej rozrost płaćizny w juliju druhi měsac zasobu haćiłoj. Nimo toho njetrjebaja kupcy miliny wot spočatka měsaca spěchowanje ekomiliny wjace přez zličbowanku miliny płaćić (EEG-wotedawk). Podróšenje wučinješe w juliju 7,5 procentow. Zwjazkowy statistiski zarjad wobkrući srjedu z tym prěnje trochowanje. W juniju běchu płaćizny přetrjebarjow porno lońšemu měsacej hišće wo 7,6 procentow rozrostli, w meji samo wo 7,9 procentow.
Podróšenje pomjeńša kupnu móc ludźi, dokelž móža sej za jedyn eurow mjenje dowolić. Předewšěm płaćiznowe skoki pola energije ukrainskeje wójny dla a stupace płaćizny žiwidłow inflaciju w najwjetšim ludowym hospodarstwje Europy hižo dlěši čas pohonjuja.
To a tamne (11.08.22)
Z hamorom su policisća w Hövelhofje pola Paderborna dwaj měsacaj stare dźěćo ze zamknjeneho awta wuswobodźili. 33lětna mać bě dźěćo mylnje zamknyła a na klučiki w awće zabyła. Starosćo so wo swoje dźěćo wołaše žona nuzowe čisło policije. Jedyn z policistow z nuzowym hamorom wokno šofera kedźbliwje rozbi, zo njeby dźěćo zranił. Přiwšěm wołachu tež wuchowansku słužbu.
200 eurow pokuty napołožić chcedźa w chorwatskim dowolowym měsće Baška na juhu kupy Krk kóždemu turistej, kiž sej z pomocu trjenja lěhadło při brjoze morja „rezerwuje“. Tole su zamołwići za turizm města připowědźili. Dotal njeje jasne, kak chcedźa zakaz přesadźić, wšako dyrbiš ludźi při wupołoženju trjenja lepić. Na kupje Teneriffa sćelu wjacori hotelownicy swojich sobudźěłaćerjow, kotřiž trjenja při poolu prosće zhromadźa.
Lindner chce w inflaciji pomhać
Berlin (dpa/SN). Financny minister Christian Lindner chce ludźom hladajo na wulku inflaciju pomhać a jim wjace hač dźesać miliardow eurow dawkow spušćić. „Profituja dźěławi, mało zasłužacy, rentnarjo a samostatni, studowacy a předewšěm swójby“, piše politikar FDP w hóstnym přinošku w nowinje FAZ. Nimo změnow pola mzdowych dawkow chcedźa tež zakładnu bjezdawkowu sumu, potajkim dochody, za kotrež njetrjebaja ludźo žane dawki płaćić, zwyšić.
Nowy teror z Afghanistana
Kabul (dpa/SN). Po morjenju nawody Al-Kaidy Aimana al-Sawahirija w Kabulu je fachowc Tamin Asey před nowym strachom terora z Afghanistana warnował. „Afghanistan je zaso wěsty přistaw za terorizm“, rjekny něhdyši zastupowacy zakitowanski minister lěto po přewzaću mocy přez talibanow. Tući wobchadźeja z teroristiskimi skupinami kaž z hosćimi, z wuwzaćom Islamskeho stata, wón rjekny. Talibanojo běchu 2021 zaso móc w Afghanistanje přewzali.
Čołm z ćěkancami znjezbožił
