Budapest (SN/JaW). Madźarski parlament je so minjeny tydźeń nimale jednohłósnje za to wuprajił, wobydlersku iniciatiwu Federalistiskeje unije europskich narodnych mjeńšin (FUEN) Minority SafePack (MSPI) podpěrać.

Kaž FUEN w nowinskej zdźělence piše, je 157 zapósłancow za rezoluciju hłosowało, jenički přećiwo njej. W dokumenće nimo wudobyćow iniciatiwy tohorunja wuzběhuja, zo bě ju wjac hač jedyn milion ludźi podpisało a zo je Europski parlament rezoluciju wobzamknył. „Parlament je hłuboko přesłapjeny, zo je ko­misija EU přećiwo woli z wulkej wjetšinu přiwzate wobzamknjenje EU-parlamenta za Minority SafePack iniciatiwu cyłotnje wotpokazała. Tak jenož měnjenje Europskeho parlamenta njeignoruje, ale tež wolu wobydlerjow Europy zańč nima“, citu­je FUEN z wobzamknjenja.

Dale je parlament w Budapesće připowědźił, madźarske zhromadźenstwa we wukraju kaž tež narodne mjeńšiny, kotrež wšak wučinjeja nimale dźesać procentow wobydlerstwa EU, dale podpěrać.

Berlin (dpa/SN). Najebać poměrnje špatne wuslědki naprašowanjow je kanclerski kandidat SPD Olaf Scholz nastupajo wólby zwjazkoweho sejma dale optimistiski. „Jedne z wuměnjenjow je hižo spjelnjene. CDU a CSU wěstej, zo njezmějetej wjace hač 30 procentow. Móžemy tuž z wuslědkom w hornim wobłuku 20 procentow tež přichodne knježerstwo nawjedować“, rjekny zwjazkowy financny minister wčera wječor w sćelaku ZDF.

SPD ma po słowach Olafa Scholza „prawe namjety“, kak měło w Němskej dale hić. „Tohodla wěrimy, zo budźemy wuspěšni.“ Strona je so tuž jara wědomje za to rozsudźiła, kanclerskeho kandidata zahe nominować, hinak su to unija a Zeleni činili. SPD ma w aktualnych naprašowanjach něhdźe 15 procentow hłosow wolerjow. Naposledk běchu Zeleni jasnje sylniši. Scholz je sej přiwšěm wěsty, zo móže strona we wólbnym boju zastatk nachwatać. Swoje nazhonjenja w knježerstwje ma wón za wosobinsku lěpšinu – zhromadnje „z prawej wutrobu“ a jasnym planom do přichoda.

Zwjazkowe knježerstwo planuje rjadowanja za šćěpjenych a wustrowjenych

Berlin (dpa/SN). Po wšej Němskej pła­ćiwe zběhnjenje tuchwilnych wobmjezowanjow swobody za dospołnje šćěpjenych chcedźa hišće tutón tydźeń wobzamknyć. CDU/CSU a SPD su so po informacijach powěsćernje dpa wčera na to dorozumili, wotpowědne změny zaju­třišim, štwórtk, w zwjazkowym sejmje a pjatk w Zwjazkowej radźe wobzamknyć. To rěka, zo móhli wot soboty prěnje wolóženja za šćěpjenych a wustrowjenych płaćić. Nadźiju na bórzomne spěšne wolóženja w gastronomiji a turizmje pak zastupnicy knježerstwa zbudźili njejsu. Tež swjatkowny dowol je chětro njewěsty.

Berlin (dpa/SN). Składnostnje Mjezy­na­rodneho dnja nowinarskeje swobody je němska zwjazkowa ministerka za justicu Christine Lambrecht (SPD) dźěło njewotwisnych žurnalistow chwaliła a jim lěpši škit přilubiła. „Bjez swobodneho nowinarstwa njeje žaneje demokratije“, rjekny Lambrecht wčera w Berlinje.

Předewšěm prějerjo korony na demonstracijach žurnalistow stajnje zaso nadběhuja. „Skućićelow měli zwěsćić a sudnisce k zamołwitosći sćahnyć. Ze zakonskim naćiskom přećiwo lisćinam njepřećelow dźemy hišće kročel dale, zo bychmy so pospytam zatrašenja a hro­ženjam wobarali.“

W zhromadnej deklaraciji z generalnej sekretarku Europskeje rady Mariju Pejčinović Burić Lambrecht potwjerdźi, zo je „spěchowanje swobody měnjenja jedyn z hłownych nadawkow Europskeje rady“. Medije měli swobodu měć, statne postupowanje w krizy kontrolować a kritisce přewodźeć, politikarce pisatej. Němska Europsku radu tuchwilu nawjeduje. Wona ma swoje sydło w Strasbourgu a dohladuje zachowanje čłowjeskich prawow w čłonskich krajach, njeje pak organ EU.