CDU pod ćišćom
Žadaja sej psychisku pomoc
Berlin (dpa/SN). Psychoterapeuća Němskeje žadaja sej wot politiki lěpši škit ludźi z psychiskimi problemami koronapandemije dla. „Nimo strachow a depresijow přiběraja tež napjatosće a agresije. Často so tajke zjawy jewja, často su zakryte“, rjekny prezident komory psychoterapeutow Dietrich Munz powěsćerni dpa. „Dyrbjał-li so lockdown najebać to podlěšić a hišće přiwótřić, by wažne było njedźiwać jenož na hospodarske wotškódnjenje.“
Tak dyrbjeli dźěći a młodostnych, kiž maja problemy, doma wuknyć, zaměrnje pomhać. „Wučerjo po měsacy dołhim homeschoolingu derje wědźa, kajcy šulerjo su w swojich wukonach jasnje wosłabnyli.“ Za nich měli přidatne móžnosće hladanja a podpěry přez šulskich psychologow zarjadować, Dietrich Munz namjetuje. „Dobra ideja by była, bychu-li kraje a komuny zmóžnili studentow tež do kónca studija zasadźić. Tući móhli na přikład kmótřistwo za jedne dźěćo přewzać a z nim zaměrnje dźěłać, zo móhli šulerjo wučbnu maćiznu nachwatać.“ Runje při ćoplišim wjedrje móhli so tež wonka zetkawać.
Mjenje porodow
To a tamne (12.04.21)
Mylnje eksmatrikulowała je Swobodna uniwersita w Berlinje 2 600 studentow. Přičina bě techniski zmylk. Studenća njeběchu swój studijny popłatk w prawym času přepokazali a běchu hižo napominani. Poprawom dóstawaja potrjecheni w tym padźe druhe napominanje. Město toho pak připósła jim knihowanski system hnydomnu eksmatrikulaciju. Mjeztym su wšitkich wo misnjenju informowali a zmylk w systemje sporjedźeli.
Přepjany za alkoholowy test bě šofer nakładneho awta w badensko-württembergskim Herbrechtingenje. Do toho bě wón ze swojim jězdźidłom na parkowanišću do připowěšaka dalšeho Lkw-ja zrazył, a to tak jara, zo bu připowěšak do pódla stejaceho awta stłóčeny. 31lětny bě tak wopity, zo njemóžeše ani alkoholowy test přewjesć. Policisća dowjezechu jeho tuž do chorownje.
Zakituje rozsud matury dla
Hannover (dpa/SN). Delnjosakski kultusowy minister Grant Hendrik Tonne je rozsud konferency kultusowych ministrow k přewjedźenju maturitnych pruwowanjow zakitował. Debaty nastupajo wotprajenje pruwowanjow su zbytne a młodych ludźi jenož přidatnje zamyleja, rjekny politikar SPD wčera po zakónčenju konferency. Ministrojo běchu wobzamknyli, zo maja so maturitne pruwowanja wotměć. Při tym płaća wysoke hygieniske a wěstotne předpisy, kaž rěkaše.
Weil za rozumne rozsudy
Berlin (dpa/SN). Ministerski prezident Delnjosakskeje Stephan Weil (SPD) žada sej wot politiki hladajo na najnowšu diskusiju wo nowym lockdownje zrozumliwe a spušćomne rozsudy politiki. Jenož tak je móžno, zhubjenu dowěru ludźi zaso wróćo zdobyć, rjekny wón dźensa w rańšim magacinje sćelaka ZDF. Tuchwilu njejsu ličby infekcijow tak špatne kaž do toho myslene, wón rjekny. Tohodla ma wón wobmyslenja, ludźi z difuznej debatu znjeměrnjeć. „Što prošu jara je krótki a kruty lockdown dokładnje?“
Minister USA do Němskeje
Na swětnišćowym dwórnišću Baikonurje w Kazachstanje su dźensa ...
Tež Woidke za serum Sputnik V
Podstupim (dpa/SN). Tež braniborski ministerski prezident Dietmar Woidke (SPD) móhł sej předstajić, ruske šćěpiwo Sputnik V přećiwo koronawirusej zasadźić. Tole je statna kenclija w Podstupimje potwjerdźiła. Za kampanju šćěpjenja su wulke mnóstwa seruma trěbne, Woidke rjekny. „Tuž dyrbjeli kóžde kmane, spušćomne a dowolene šćěpiwo wužiwać“, ministerski prezident zwurazni. „To płaći samozrozumliwje tež za Sputnik V.“ Do toho běchu wjacore medije wo namjeće Woidkeho rozprawjeli.
Bayerski ministerski prezident Markus Söder (CSU) bě předwčerawšim, srjedu, připowědźił, zo je sej Bayerska z nachwilnym zrěčenjom 2,5 milionow dozow Sputnika V zawěsćiła, dyrbjała-li Europska unija zasadźenju seruma w Europje přihłosować. Zwjazkowy minister za strowotnistwo Jens Spahn (CDU) je wčera připowědźił, zo chcył z Ruskej wo dodawanju Sputnika V jednać.
Termin wotprajili
Protestuja přećiwo zjězdej AfD
Drježdźany (dpa/SN). Přećiwo cyłoněmskemu zjězdej AfD kónc tydźenja w Drježdźanskich wikach su protestne akcije připowědźili. Akciske zjednoćenstwo „Zadźeržće AfD“ je swojich přiwisnikow namołwjało, „připućowanje delegacijow přistojnje, z wotstawkom a nahubnikami a dodźeržejo wšitke škitne naprawy koronawirusa dla kritisce přewodźeć“. Kritika njeměri so jenož přećiwo politice AfD, ale tež přećiwo tomu, zo strona najebać přiběrace ličby infekcijow dale na tym wobsteji, zjězd ze 600 wobdźělnikami přewjesć. „AfD zaso raz pokazuje, zo njeje ničo rozumiła“, rjekny Moritz Zeidler, čłon předsydstwa Drježdźanskich młodych socialdemokratow. Prezencny zjězd w rumnosći přewjesć, ma wón za „idiotiske“.
Za zjězd płaći wobšěrny hygienowy koncept. Sakska AfD bě spočatk februara na samsnym městnje zjězd přewjedła. Sčasami bě hač do 700 wobdźělnikow w hali. Na zjězdźe chce AfD swój program za wólby zwjazkoweho sejma lětsa w septembru wobzamknyć.
To a tamne (09.04.21)
Wjace hač 20 wopicow je ze zwěrjenca w badensko-württembergskim Löffingenje ćeknyło. Prawdźepodobnje běchu twarske dźěła w zwěrjencu přičina, zo móžachu zwěrjata puć z parka namakać. Wopicy běchu na to we wjetšich skupinach po puću. Sobudźěłaćerjo nětko za primatami pytaja. Policija ludźi prosy, so wopicow zdalować. Poprawom spłóšiwe zwěrjata móhli agresiwnje reagować.
Spódnje cholowy w zahrodach zaryć chcedźa w Šwicarskej. Při tym jedna so wo přepytowanje statneho slědźenišća Agroscope. Institucija je 2 000 spódnich cholowow z bałmy ratarjam a zahrodkarjam rozesłała. Tući měli cholowy do zemje zaryć a po měsacu zaso wuryć. Na zakładźe wobškodźenja płata móža fachowcy kwalitu pódy posudźować. Při tym płaći: Čim wjace je dźěrow w cholowach, ćim strowiša je biologija pódy.
