Drježdźany (dpa/SN). Sakski krajny sejm je so dźensa na swojim poslednim posedźenju do dowoloweje přestawki z přiběracymi płaćiznami energije zaběrał. Zapósłancy mějachu k tomu dwaj naćiskaj na blidźe. Lěwica chce ludźi před sćěhami wuwića płaćiznow škitać. Zeleni chcyli energijowu suwerenitu ze škitom klimy zwjazać a wo wobnowjomnych energijach w klimowej krizy debatować. Na próstwu SPD rěčachu wo šulskej syći a wo dlěšim zhromadnym wuknjenju šulskich dźěći. Při woprašowanju statneho knježerstwa bě kultusowe ministerstwo wosebje prašane: Tema bě kubłanje za dźěći a młodostnych, kotrež su sej před wójnu w Ukrainje do Sakskeje wućeknyli. Wčera běchu zapósłancy zakoń za transparencu schwalili, kiž ma ludźom přistup k dokumentam knježerstwa a zarjadnistwa wolóžić. Opozicija zakoń kritizowaše. AfD rěčeše wo „běrokratiskim monsteru“. Frakciski šef Lěwicy Rico Gebhardt ma zakoń za wuraz bojazliwosće, dokelž mjenuje 22 přičinow, ludźom přistup k dokumentam zapowědźić.

Waršawa/Tel Aviv (dpa/SN). Pólska a Israel chcetej po dlěšej diplomatiskej krizy swój mjezsobny poměr zaso polěpšić. Na to je so wón z israelskim prezidentom Isaacom Herzogom dorozumił, piše pólski prezident Andrzej Duda na swojej internetnej stronje. Přichodny israelski wulkopósłanc w Pólskej Yacov Livne, je mjeztym swój powołanski dokument zapodał. „To je wažna kročel, pólsko-israelski poćahi normalizować“, zdźěla Herzog tohorunja internetnje. Wón čaka nětko na powołanski dokument noweho pólskeho wulkopósłanca w Israelu.

W awgusće 2021 bě Israel wjele diskutowaneho pólskeho zakonja dla swojeho zastupjerja z Waršawy domoj zwołał. Nowy wulkopósłanc njebě swoju słužbu we Waršawje scyła nastupił. Pólskemu wulkopósłancej w Israelu běchu radźili, so po dowolu do Israela njenawróćić. Hłowna přičina njedorozumjenjow bě změna pólskeho zarjadniskeho prawa. Po nim njeje móžno, přećiwo rozsudam zarjadow po 30 lětach wjace sudnisce postupować. W Israelu so bojachu, zo je z tym wotškódnjenje za čas holocausta wuswojenych Židow doskónčnje z blida.

Liška je so do zarjadnistwa Berlinskeho senata zabłudźiła. Zwěrjo sedźeše wčera před zarjadom za integraciju, dźěło a socialne w Kreuzbergu a nóžkowaše potom po twarjenju hač do najwyšeho poschoda, senat zdźěla. Sobudźěłaćerjam so poradźi, lišku změrować a do kartona tyknyć, kotryž přepodachu policiji. Ta dowjeze zwěrjo ke skótnemu lěkarjej. Liški so w Berlinje derje rozmnožeja.

Wupyšeny pas swětoweho pjasćowarskeho mištra, kiž bě zemrěty južnoafriski prezident Nelson Mandela něhdy wot pjasćowarskeje legendy Raya Leonarda dóstał, su z muzeja w Južnej Africe pokradnyli. Pas, kotrehož hódnotu trochuja na 3 000 eurow, su njeznaći z muzeja Mandela House Museum w Soweto spakosćili. W domje bě Mandela wot 1946 hač do 1962 bydlił. W nim chowaja wosobinske wěcy bywšeho prezidenta.

Kijew (dpa/SN). Ukrainski prezident Wolodymyr Zelenskyj je hladajo na pomoc zapadnych krajow nastupajo moderne brónje optimistiski za dalši wotběh wójny. „Okupanća su mjeztym nazhonili, što je moderna artilerija. Woni njezměja nihdźe w našim kraju, kiž su wobsadźili, wjace wěste kónčiny“, rjekny Zelenskyj minjenu nóc we widejowym poselstwje. Minjene tydźenje su ukrainscy wojowarjo po informacijach medijow wjacore zepěranišća a składy bróni a municije ruskich jednotkow daloko za frontu zničili.

Přihłosuja přistupej k NATO

Den Haag (dpa/SN). Nižozemska je tomu přihłosowała, zo Šwedska a Finska NATO přistupitej. Prěnja komora parlamenta – podobnje Zwjazkowej radźe – w Den Haagu je wčera z wjetšinu wotpowědnemu naćiskej zakonja přihłosowała. Minjeny tydźeń bě hižo prěnja komora přihłosowała. Nordiskej stataj běštej po ruskim nadpadźe na Ukrainu wo přistup k zapadnej wojerskej aliancy prosyłoj.

FDP za atomowe milinarnje