153 projektow
Drježdźany (SN). Sakskej natwarnej bance předleži dotal 153 projektow strukturnu změnu nastupajo, 126 w Hornjej Łužicy a 27 za srjedźoněmski rewěr. Spěchowanski wobjim wučinja 630 milionow eurow, rjekny minister za regionalne wuwiće Thomas Schmidt wčera w Drježdźanach. Wo předewzaćach chce dźěłowa skupina ministerstwow srjedź meje wuradźować, kónc junija wobjednaja je w „regionalnymaj přewodźacymaj wuběrkomaj“. Łužiskemu wuběrkej přisłuša referent Domowiny Pětr Brězan.
Kaž Schmidt přizna, wobchowaja sej ministerstwa tajke něšto kaž prawo weta. Negatiwny posudk jednoho ministerstwa spěchowanju zadźěwa. Hišće w januarje bě so minister za rozsudy w regionach wuprajił, powěsćernja dpa pisa.
Nowotwar přizwoleny
Drježdźany (SN/JaW). Diecezanska zarjadniska přirada za zamóženje Drježdźansko-Mišnjanskeho biskopstwa je na swojim rjadnym wuradźowanju minjeny pjatk nowotwar biskopskeho sydła přizwoliła. Wo tym informuje medijowy rěčnik biskopstwa Michael Baudisch w nowinskej zdźělence.
Přizwoliła je mjenowana přirada zwottorhanje Domu propsta Baiera na Schwerinskej dróze. Na jeho městnje ma po dotalnych planach, kotrež bě biskopstwo hakle dwaj dnjej do rozsuda přirady na zjawnym słyšenju zajimcam internetnje rozłožiło (Serbske Nowiny rozprawjachu), nowe hłowne sydło Drježdźansko-Mišnjanskeho biskopstwa nastać. „Za twarski projekt schwali přirada inwesticiski budget něhdźe 42 milionow eurow. Předewzaće, kotrež ma – dalokož su trěbne twarske kapacity zaručene – hač do kónca lěta 2023 wotzamknjene być, financuje biskopstwo Drježdźany-Mišno ze swójskich srědkow“, Baudisch potwjerdźa.
Kaž w nowinskej zdźělence biskopstwa dale rěka, bě zakład rozsuda „wjacore lěta trajacy proces planowanja, do kotrehož bě přirada běžnje zapřijata“.
Němsko-chinske konsultacije
Peking/Berlin (dpa/SN). Zwjazkowa kanclerka Angela Merkel (CDU) a chinski ministerski prezident Li Keqiang staj so dźensa zhromadnje ze swojimaj ministrami k wirtuelnym knježerstwowym konsultacijam schadźowałoj. Rozmołwy stejachu w znamjenju najnowšich politiskich napjatosćow a přiběracych problemow němskich předewzaćow w Chinje. Do toho warnowaše předsyda wonkowneho wuběrka zwjazkoweho sejma Norbert Röttgen (CDU) před naiwnosću we wobchadźenju z Chinu hladajo na jeje strategiske globalne zaměry.
Wolóženja w Nižozemskej
Amsterdam (dpa/SN). Dobre štyri měsacy po wukazanju kruteho lockdowna k wobmjezowanju koronapandemije je Nižozemska wulku kročel wróćo do normality zwoprawdźiła. Tak je nócny zakaz, dom wopušćić, zběhnjeny. Hosćency a wobchody pod hołym njebjom smědźa zaso kupcow posłužować. Ludźo smědźa so zwonka bydlenjow zetkawać. Knježerstwo bě so za wolóženja rozsudźiło, byrnjež fachowcy před nimi warnowali.
Zrěčenju přihłosowali
FDP skóržbu přećiwo zakonjej zapodała
Ludźom prawa wróćić
Wita změnu při šćěpjenju
Berlin (dpa/SN). Zwjazk městow Němskeje wita za junij planowane zběhnjenje kruteho šćěpjenskeho porjada. „Mjeztym smy ze šćěpjenjom po dobrym puću. Trjebamy pak wjetšu spěšnosć. Tohodla je kročel rozsudna, zběhnyć šćěpjenski porjad“, rjekny Lipšćanski wyši měšćanosta a prezident Zwjazka městow Burkhard Jung powěsćerni dpa.
Jeli so kóždy wobydler wo šćěpjenski termin stara, so šćěpjenje dale pospěši. „W šćěpjenskich centrach komunow dotal wšitko bjez problemow běži. Tam su kmani tež nowu fazu šćěpjenja bjez ćežow zmištrować, praji Jung. Wón je „sej wěsty, zo chce so přewažny dźěl wobydlerjow šćěpić dać. Ći jedni, zo bychu so koronawirusej wobarali, ći tamni, dokelž chcedźa zaso do piwowych zahrodow hić abo na Mallorcu lećeć.“
Merz do mustwa
To a tamne (28.04.21)
Sobu najwoblubowaniše zarjadowanje oldtimerow, Anklamske zetkanje Trabantow, dyrbi tež lětsa koronapandemije dla wupadnyć, kaž rěčnik organizaciskeho mustwa zdźěli. Zetkanje měješe so wot 12. do 16. meje na Anklamskim lětanišću wotměć. Nětko nadźijeja so na klětu. Loni běchu zetkanje přepozdźe wotprajili a dyrbjachu zrěčensku pokutu 60 000 eurow zapłaćić. Před lětomaj witachu w Anklamje něhdźe 800 jězdźidłow, předewšěm Trabijow.
Swój před wosom lětami pokradnjeny moped Simson je wobsedźer w braniborskim Kyritzu nětko zaso namakał. Wot lěta 2013 bě wón stajnje zaso w interneće za swojej „łastojčku“ hladał. Před dnjemi wuhlada ju 38lětny nadobo jako poskitk w socialnej syći. Policija přepytuje nětko přećiwo poskićowarjej a mužej, kiž bě jemu moped předał.
Dalša łódź roły kładźe
Bornholm (dpa/SN). Za wjele diskutowany płunowód Nord Stream 2 je dalša specialna łódź započała roły kłasć. Po wuspěšnych testach zahaji ruska łódź „Akademik Čerskij“ dźěła w danskim dźělu Baltiskeho morja, kaž předewzaće Nord Stream 2 zdźěli. Hižo wot spočatka februara tam ruska „Fortuna“ roły kładźe. Přez płunowód chcedźa kóžde lěto 55 miliardow kubiknych metrow zemskeho płuna z Ruskeje do Němskeje transportować. Pipeline je nimale dotwarjena.
Chłostanja přepruwować
London (dpa/SN). Wuběrk za čłowjeske prawa britiskeho parlamenta chce pruwować, hač su w Jendźelskej a Walesu ludźom njewoprawnjene chłostanja korona-naprawow dla napołožili. Wuběrk da nětko wjace hač 90 000 chłostankow přepruwować. System chłostanja je „zamylacy, diskriminowacy a njefairny“, rěka w rozprawje wuběrka. Prawidła koronawirusa dla su wot spočatka pandemije we Wulkej Britaniskej 65 króć změnili. Chłostanja sahaja hač do 11 500 eurow. Prawniski puć přećiwo nim žadyn njeje.
USA přewostaja Astrazeneca
Namołwa: Wólbny system reformować
Strasbourg (SN/JaW). Parlamentariska zhromadźizna Europskeje rady (PACE) je knježerstwo Běłoruskeje namołwjała, „wobšěrnu reformu wólbneho systema w kraju přewjesć a jón mjezynarodnym standardam za demokratiske wólby přiměrić“. Wo tym informuje mjenowana rada na swojej internetnej stronje.
