Za kónc fosilneho motora
Berlin (dpa/SN). Zwjazkowy wobchadny minister Andreas Scheuer (CSU) wupraja so za kónc klasiskeho bencinoweho a dieseloweho awta w běhu přichodnych 15 lět. „Naš zaměr je, produkciju fosilneho spalomotora hač do lěta 2035 wuběžeć dać“, rjekny Scheuer nowinarjam. Hladajo na syntetiske ćěriwa pak njeje spalomotor přiwšěm hišće na kóncu. Ministerskaj prezidentaj Bayerskeje a Badensko-Württembergskeje Markus Söder (CSU) a Winfried Kretschmann (Zeleni) běštaj so runje tak wuprajiłoj.
Prawobydlerka ministerka
Washington (dpa/SN). Zapósłanča kongresa USA Deb Haaland ma jako prěnja prawobydlerka ministerske zastojnstwo w knježerstwje wukonjeć. Wjetšina senata je jeje nominaciju jako nutřkowna ministerka kraja w kabineće demokratiskeho prezidenta Joewa Bidena wobkrućiła. Demokratka Haaland (60) ze zwjazkoweho stata New Mexico přisłuša kmjenej Pueblo of Laguna. Jeje swójba bydli dlěje hač 30 generacijow w New Mexicu.
Dale za politiske rozrisanje
Kritizuja kónc šćěpjenja
Berlin (dpa/SN). Strowotniski fachowc Zelenych Janosch Dahmen je nachwilne přetorhnjenje šćěpjenja přećiwo koronawirusej z preparatom Astrazeneca kritizował. Šćěpjenje přetorhnyć je lochkomyslne, rjekny wón powěsćerni dpa hladajo na sydom padow trombozy mjez 1,6 milionami šćěpjenych. To je dalši dyr na njedobro dowěry ludźi do politiki zwjazkoweho knježerstwa w koronakrizy.
Minister za strowotnistwo Jens Spahn (CDU) rěčeše porno tomu wo „ryzy naprawje kedźbliwosće“. Nachwilny stop šćěpjenja bě Paula Ehrlichowy institut doporučił. Tež druhe kraje su šćěpjenje z mjenowanym serumom najprjedy raz skónčili.
Mjeztym je sej frakciski šef SPD w Sewjerorynsko-westfalskim krajnym sejmje Thomas Kutschaty žadał, ministra Spahna ze zastojnstwa pušćić.
Kabinet so zešoł
Nětko „nuzowe borzdźidło“ trěbne
Berlin (dpa/SN). Hladajo na zaso přiběrace ličby infekcijow z koronawirusom zwjazkowe knježerstwo zwjazkowe kraje naležnje namołwja, dojednane tak mjenowane „nuzowe borzdźidło“ koronawirusa dla tež wužiwać a wolóženja zaso zběhnyć. „Mamy 3. měrca wobzamknjene naprawy přesadźić, w zwjeselacych wotstawkach runje tak kaž w ćežkich“, podšmórny rěčnik knježerstwa Steffen Seibert wčera w Berlinje. Zwjazk a kraje běchu wobzamknyli lockdown znowa wukazać, su-li incidency w jednotliwych zwjazkowych krajach tři dny za sobu zaso wyše hač sto. „Tele wobzamknjenje ma so zwoprawdźić. Hdyž zhromadnje něšto schwalimy, potom z toho wuchadźamy, zo so to tež stanje“, Seibert potwjerdźi.
Dwaj wokrjesaj w Braniborskej stej připowědźiłoj, zo nochcedźa najebać incidencu nad sto žane razniše naprawy wukazać. Seibert mjenuje to „strašne połoženje“. Hladajo na dalše wuwiće a na jutry skedźbnja wón na přichodne wuradźowanje přichodnu póndźelu.
Laschet: Dyrbimy wojować
Rozdźělne zhladowanje na wólbne wuslědki CDU w Stuttgarće a Mainzu
Berlin (dpa/SN). Předsyda CDU Armin Laschet je swoju stronu po wólbnych poražkach w Badensko-Württembergskej a Porynsko-Pfalcy k zhromadnemu napinanju do wólbow zwjazkoweho sejma namołwjał. Njeje wot Boha date, zo přińdźe zwjazkowy kancler z rjadow CDU, rjekny Laschet po informacijach powěsćernje dpa wobdźělnikam digitalneho posedźenja předsydstwa strony a sej žadaše: „Dyrbimy wojować.“ Zdobom je zadźerženje někotrych zapósłancow unije w zwisku z aferu škitnych nahubnikow dla kritizował. Derjeměće towaršnosće měło w srjedźišću dźěła zapósłancow stać. „Hdyž chce něchtó nahubniki předawać, móže wón to rady činić, ale bjez mandata“, Laschet rjekny. Jako reakciju na aferu chce předsydstwo kodeks zadźerženja za nošerjow mandata wobzamknyć, kotryž ma hač na najnišu komunalnu runinu sahać.
Płašć po wětřiku
Wjace elektrošrota
To a tamne (16.03.21)
Wjace hač 120 metrow dowysoka lězć dyrbjachu wohnjowi wobornicy w Berlinje. Při fasadźe hotela „Park Inn by Radisson“ na Alexanderowym naměsće bě so wulke „R“ pušćiło a hrožeše na terasu hotela na 40. poschodźe padnyć. Pismik wisaše jenož hišće na elektriskim kablu. Specialisća za wuchowanje ludźi we wulkich wysokosćach su „R“ zaso zasadźili. Akcija traješe dobru hodźinu.
Ze 200 km/h před policiju ćěkał je muž z wosobowym awtom na dróze pola Greifswalda w Předpomorskej. Zastojnicy jeho sčasami samo z wočow zhubichu. Něšto pozdźišo kolegojo awto wuhladachu, na čož šofer z wulkej spěšnosću dale smaleše. Wjacore policajske jězdźidła awto přesćěhachu. Před Prenzlauwom je skónčnje prózdne nańdźechu. Krótko na to so jeho wodźer sam přizjewi a dyrbješe jězbnu dowolnosć wězo wotedać.
Ermer chcył nahladnosć wokrjesa w Berlinje polěpšić
Wojerecy (SN/MkWj). Roland Ermer je direktny kandidat CDU za wólby zwjazkoweho sejma 26. septembra we wólbnym wokrjesu 156, štož wotpowěduje najwjetšemu dźělej Budyskeho wokrjesa. Čłonojo wokrjesneho zwjazka wuzwolichu 56lětneho pjekarskeho mištra z Njedźichowa minjeny pjatk ze 97 procentami. Napřećiwneho kandidata wón njeměješe. Ermer bě před štyrjomi lětami hižo raz nastupił, zo by naslědnistwo Marje Michałkoweje přewzał. Tehdy pak zdoby sej kandidat AfD Karsten Hilse direktny mandat. Michałkowa bě nětko we Wojerecach runje tak přitomna kaž Budyski krajna rada Michael Harig jako wokrjesny předsyda strony a generalny sekretar sakskeje CDU Alexander Dierks.
Wopory namocy wopominał
Mossul (B/SN). Bamž Franciskus bě na wopyće w Iraku tež w awtonomnej kónčinje Kurdistanje. W Mossulu, něhdyšim hłownym sydle teroristiskeje milicy Islamski stat, wopominaše wón wopory wójny a namocy. K woporam njeskutkow słušeja muslimojo, křesćenjo a jezidojo. Na kóncu modleše so bamž z přitomnymi wosebity wopomnjenski paćer. Chaldejsko-katolski arcybiskop Najib Mikhael Moussa je so swjatemu wótcej za wopyt wutrobnje dźakował. „Naš kraj trjeba profetiski hłós, zo by tu ćerpjacym ludźom pomhał“, wón podšmórny.
Móža synagogu twarić
Podstupim (B/SN). Jako poslednja němska krajna stolica dóstanje Podstupim zaso synagogu. Po lětadołhim tam-a-sem chcedźa ju lětsa nazymu twarić započeć, kaž to kultusowa ministerka Braniborskeje Manja Schüle (SPD) zhromadnje z prezidentom Centralneje rady židow w Němskej Josefom Schusterom připowědźi. Kraj natwari za 13,7 milionow eurow na Hrodowej synagogu a wosadny centrum. Fachowje přewodźa projekt Centralna městnosć dobroćelstwa židow w Němskej. Twarske dźěła maja po planje w lěće 2024 zakónčene być.
Katedrala znowa wotewrjena
