Berlin (dpa/SN). Krótko do wólbow krajneju sejmow w Badensko-Württembergskej a Porynsko-Pfalcy je unija po najnowšim naprašowanju nahladnosć mjez wolerjemi snadnje přisadźiła. Přirunujo z naprašowanjom minjeny tydźeń je wona procent zhubiła a by aktualnje 33 procentow hłosow docpěła. To je slědźenski institut forsa w nadawku sćelaka RTL zwěsćił. Zeleni su tohorunja wo dypk w nahladnosći woteběrali a maja nětko 18 procentow. To pak stej dwaj procentaj wjace hač SPD, kotraž móže dale jeno ze 16 procentami ličić. FDP (wosom proc.) a AfD (dźesać proc.) stej kóžda procent přidobyłoj. Lěwica ma dale wosom proc.

Wólby zwjazkoweho sejma budu 26. septembra. Fachowcy su sej wěsći, zo so afera nahubnikow dla negatiwnje na uniju wuskutkuje.

Berlin (dpa/SN). Předsyda Zwjazkoweho zjednoćenstwa kasowych lěkarjow Andreas Gassen ma za móžne, w Němskej wot apryla měsačnje 20 milionow ludźi pře koronawirus šćěpić. Prěnje šćěpjenje dorosćeneho wobydlerstwa móhło hižo w prěnjej połojcy junija wotzamknjene być, dale sahaca imunizacija spočatk awgusta, rjekny Gassen nowinarjam. Wuměnjenje je, zo je běžnje dosć šćěpiwa k dispoziciji. Wot spočatka apryla maja tež lěkarjo w swojich praksach ludźi šćěpić. Tam móhli jich tydźensce 1,5 milionow zastarać. Gassen kritizowaše pak rozšěrjenu běrokratiju a kruty šćěpjenski porjad. Wotpowědne poručenje měła stajna šćěpjenska komisija krok po kroku zběhnyć, sej Gassen žada.

Kabul/Moskwa (dpa/SN). Ruska planuje swójsku konferencu k wožiwjenju měroweho procesa w Afghanistanje. Tamniše knježerstwo w stolicy Kabulu je přeprošenje na zetkanje w Moskwje runje tak dóstało kaž zastupnicy militantno-islamistiskich talibanow. Wobě stronje stej to mjeztym wobkrućiłoj. Wysoka rada za narodne wujednanje w Kabulu informowaše, zo je tež předsyda rady Abdullah Abdullah přeprošeny. Ruske wonkowne ministerstwo zdźěli statnej powěsćerni TASS, zo přihoty za konferencu 18. měrca tuchwilu běža. W Moskwje su hižo wjacore konferency wo Afghanistanje přewjedli, na kotrychž běchu so tež talibanojo wobdźělili, nic pak zastupnicy knježerstwa. W minjenym času je so ­nowe knježerstwo USA tohorunja za wožiwjenje měroweho procesa wuprajiło.

Z dźěćaceje čumpjele wuswobodźiła je wohnjowa wobora 18lětnu w Drježdźanach. Młoda žona bě so na hrajkanišću na čumpjel sydnyła, ale w njej tčacy wostała. Přiwołani pomocnicy dyrbjachu sydło rozšrubować, zo bychu ju z dilemy wuswobodźili. Zranił so při tym na zbožo nichtó njeje.

Domjace tofle Winstona Churchilla su za 37 000 eurow přesadźowali, kaž awkciski dom Bellmans w hrabinstwje West Sussex zdźěli. Somoćane tofle něhdyšeho premierministra z toho złoćanymi inicialemi wunjesechu tak dwójce telko dobytka kaž poprawom wočako­wane. Palencowa škleńca Churchilla ma za 17 500 eurow noweho wobsedźerja. Churchill (1874–1965) bě we Wulkej Britaniskej za čas Druheje swětoweje wójny a w 1950­tych lětach knježił a je premierministrej Borisej Johnsonej z wulkim přikładom.