Budyšin (SN/at). Štóž blisko awtodróhi A 4 bydli, wulki wobchad wosebje začuwa. Karawany nakładnych awtow mjez pólskej hranicu a Drježdźanami pak maja dale přiběrać. Tohodla je so znowa wuzwoleny Budyski zapósłanc Sakskeho krajneho sejma Marko Šiman (CDU) hižo minjene lěta za to zasadźał, tónle wot­rězk A 4 na šěsć čarow wutwarić. Wón tuchwilu žanu druhu móžnosć njewidźi tam rjadowany wobchad zaručić.

Do infrastrukturnych naprawow k strukturnej změnje po kóncu wudo­bywanja brunicy je tónle projekt přiwzaty. Trěbne planowanja móhli so bórze zahajić. Wobkedźbować pak měli aspekt, kotryž je dotal skerje podrjadowanu rólu hrał: škit před haru. „Z planowanjom mamy prěni raz lěpšu šansu so tomu wěnować“, je sej Marko Šiman wěsty. Wón budźe so za to zasadźeć, wšako su wolerjo jemu tónle nadawk w mnohich rozmołwach w tydźenjach wólbneho boja sobu dali.

Drježdźany (dpa/SN). Sakski ministerski prezident Michael Kretschmer (CDU) nochce so při wutworjenju noweho knježerstwa w swobodnym staće wot zwjazkoweje politiki wobwliwować dać. Dźeń do zahajenja sonděrowanskich rozmołwow ze SPD a Zelenymi je krajny šef sakskeje CDU wčera připowědźił, zo ma jeničce zajimy Sakskeje we wočomaj. „Chcu saksku koaliciju. Trjebamy program za přichodne pjeć lěta a za čas po tym. Dźe wo prašenje: Što Sakskej tyje“, Kretschmer wčera twitterowaše.

W Sakskej krajnej stolicy su so dźensa sonděrowanske rozmołwy mjez dotal knježacymaj stronomaj CDU a SPD kaž tež ze Zelenymi zahajili. Při tym chcedźa najprjedy raz pruwować, hač su koaliciske jednanja móžne. Pozicije we wšelakich prašenjach su wosebje mjez CDU a Zelenymi chětro rozdźělne.

Při wólbach 1. septembra bě CDU 32,1 procent hłosow dóstała a bu před AfD (27,5 proc.) najsylniša móc. Zeleni běchu 8,6 a SPD 7,7 procentow dóstali. Třeća najsylniša móc je Lěwica ze 10,4 procentami.

Žadaja sej zakonske rjadowanje za kónc zmilinjenja brunicy

Choćebuz/Berlin (dpa/SN). Braniborski minister za hospodarstwo Jörg Steinbach (SPD) na to tłóči, zo planowane skónčenje zmilinjenja brunicy hač do lěta 2038 kaž předwidźane zakonsce zakótwić. „To dyrbi so nětko hnydom zakoń stać – zakoń za kónc brunicy –, zo by hač do kónca lěta wotpowědny naćisk předležał“, rjekny minister Steinbach kónc tydźenja w telewiziji RBB we wusyłanju „Dyrbimy rěčeć“ w Choćebuzu. „Dyrbimy na to dźiwać, zo so wuslědki wuhloweje ko­misije tak přesadźa, kaž je to wobzamknyła. Hewak njezmějemy žadyn to­waršnostny konsens“, Jörg Steinbach podšmórny.

Městopředsyda frakcije Zelenych Oliver Kirscher zadźerženje zwjazkoweho knježerstwa kritizuje. „Nimam žane zrozumjenje za to, čehodla to tak dołho traje.“ Hač do lěta 2038 chce Němska krok po kroku klimje škodźace zmilinjenja brunicy skónčić. To bě tak mjenowana wuhlowa komisija ze zastupnikami hospodarstwa, dźěłarnistwow a wobswětoškitarjow kónc januara wobzamknyła. Łužica je wot tuteje naprawy wosebje masiwnje potrjechena.

Situacija dopomina mje na lětuši januar: Wšitcy napjeće čakachu, kajki termin skónčenja zmilinjenja brunicy je wuhlowa komisija w Berlinje wupjekła. Skónčnje wućahnychu – kaž běłeho nukla z kuzłarskeho cylindra – wony termin 2038, kiž je nětko tajke něšto kaž zakoń. Podobnje napjeće wočakuja nětko wozjewjenje tak mjenowaneho klimoweho kabineta. Tón ma přichodny pjatk postajić, z kajkimi naprawami chce Němska swětowu klimu wuchować. Wjace elektroawtow, přiražki za wotstronjenje starych tepjenjow a wězo dawk za wustork wuhlikoweho dioksida. Mi so zdawa, zo so zajim ludźi na tutej naležnosći poněčim pozhubja. Přewjele so powěda, přemało so čini, podobnje kaž při strukturnej změnje we Łužicy po kóncu brunicy. A poněčim je tež zwuk w tutej naležnosći razniši. Tole móhło so hišće přiwótřić, hdyž knježerstwo ničo druhe njewě, hač zaso raz dawki zwyšić. Marko Wjeńka