Brüssel (dpa/SN). Do dźensnišeho widejoweho wjerška Europskeje unije je sej politikar Zelenych Sven Giegold „synchronu koronapolitiku w Europje“ žadał. Runje noweje wulce natykliweje warianty koronawirusa dla je zhromadne postupowanje ćim wažniše, rjekny Giegold powěsćerni dpa. Zwjazkowa kanclerka Angela Merkel (CDU) chcyše dźens wječor ze swojimi kolegami w EU wo naležnosći wuradźować. Jedna z temow je móžne zawjedźenje europskeho wupokaza za tych, kotřiž su pře koronu šćěpjeni, a z nim zwjazane swobody, kaž pućowanje abo wopyt hosćencow.

Europska politikarka FDP Nicola Beer je sej dźensa žadała, za šćěpjenych wobmjezowanja koronawirusa dla spěšnje zběhnyć, zo móhli so do normalneho žiwjenje bjez statnych zasahow wróćić.

Washington (dpa/SN). Prezident USA Joe Biden je hodźiny po zapokazanju nawrót Zjednoćenych statow Ameriki k Pariskemu klimowemu zrěčenju zahajił. Tak je 78lětny, kaž bě připowědźił, dwělomny rozsud swojeho předchadnika Donalda Trumpa skorigował. Biden podpisa wčera wotpowědny spis Zjednoćenym narodam. Krótko na to je generalny sekretar UNO António Guterres čłonske staty informował, zo su USA wot 19. februara zaso dźěl zrěčenja a zo so na posedźenjach wotnětka zaso wobdźěleja.

Politikarjo w Němskej reaguja wolóženi na noweho prezidenta USA. „Wjeselu so na nowy kapitl němsko-ameriskeho přećelstwa a zhromadneho dźěła“, zdźěli zwjazkowa kanclerka Angela Merkel (CDU) po słowach jeje rěčnika Steffena Seiberta. Zapokazanje Bidena a wiceprezidentki Kamale Harris bě „swjedźeń ameriskeje demokratije“. Zwjazkowy prezident Frank-Walter Steinmeier rjekny: „Wjeselimy so, zo mamy USA jako njeparujomneho zwjazkarja we wažnych mjezynarodnych prašenjach zaso poboku.“

Drjewjana postawa wirologi Christiana Drostena jako rudnohórski kurjak ma hižo bórze městno w muzeju dóstać. Bonnski Dom stawiznow je tajki eksemplar skazał, kaž wottam rěka. Figura z nahubnikom znazornja, kak je wědomostnik Berlinskeje Charitéje za čas koronapandemije na popularnosći přibył. W Seiffenskim zawodźe maja kurjaka dla tójšto skazankow: Tydźensce rozposyłaja 500 eksemplarow – tež do wukraja.

Chorobne awto zadźeržał je helikopter w sewjerorynsko-westfalskim Velberće. Do toho bě so strowotniski staw pacienta w helikopteru pohubjeńšił. Pytajo za móžnosću přizemjenja wuhlada pilot jěduce chorobne awto, w kotrymž maja lěpše móžnosće lěkowanja. Helikopter tuž awto nisko lećo přesćahny a před nim přizemi. Tak móžachu pacienta stabilizować a z nim na to dale lećeć.

Flensburg/Brüssel (SN/JaW). Ze zjawnym listom su so dohromady 67 zapósłancow Europskeho parlamenta a třo nawodni zastupnicy europskeje wobydlerskeje iniciatiwy Minority Safepack na prezidentku Europskeje komisije Ursulu von der Leyen a jeje zastupnicu Veru Jourovu wobroćili. W spisu, kotryž redakciji Serbskich Nowin předleži, kritizuja zapó­słancy – mjez nimi tež prezident Federalistiskeje unije europskich narodnych mjeńšin Loránt Vincze – spjećowanje komisije EU, škit narodnych a rěčnych mjeńšin lěpje rjadować.

Spisarjo lista maja rozsud komisije za „wopačne poselstwo milionam Europjanow, byrnjež wjetšina Europskeho parlamenta iniciatiwu wuraznje podpěrała“. Rozsud komisije „škodźi demokratiskemu žiwjenju w našim zhromadźenstwje, dowěrje narodnych mjeńšin do našich institucijow a nic naposledk nutřkownej a mjezynarodnej wěrjomnosći EU“, zapósłancy komisiji EU w spisu wumjetuja. Zdobom zwuraznjeja nadźiju, zo komisija „tónle zmylk skoriguje a narodnym mjeńšinam Europy kedźbnosć wěnuje, kotruž sej zasłužeja“.