Magdeburg (dpa/SN). Do dźensnišich wuradźowanjow wuchodoněmskich ministerskich prezidentow je saksko-anhaltski ministerski prezident Reiner Haseloff (CDU) potwjerdźił, zo nima temu přiměrić žiwjenske wuměnjenja na wuchodźe a zapadźe Němskeje, „dawno hišće“ za wotbytu. To je runje tak kaž do přichoda hladaca strukturna politika přewšo wažne, rjekny politikar CDU nowinarjam. Wuchodni ministerscy prezidenća dźensa internetnje wuradźuja.

Reforma budźe financowana

Berlin (dpa/SN). Zwjazkowy dźěłowy minister Hubertus Heil (SPD) kritiku na financowanju reformy hladanskich powołanjow dla wotpokazuje. Wyše mzdy chcył wón ze srědkow hladanskeho zawěsćenja a z dawkami financować, rjekny Heil dźensa rozhłosej NDR. Knježerstwo je dźensa wotpowědnu reformu na dobro wyšich mzdow schwaliło. Za nju ma přinošk ludźi bjez dźěći k hladanskemu zawěsćenju wo 0,1 procent rozrosć, štož je hižo wulku kritiku zbudźiło.

Wjace seruma produkować

Drježdźany (dpa/SN). Wuprajenja społnomócnjeneho zwjazkoweho knježerstwa za wuchodnu Němsku Marca Wanderwitza (CDU) njedemokratiske nastajenje wobydlerjow wuchodnych zwjazkowych krajow nastupajo zbudźeja dale kritiku. „Wuchod njetrjeba wyšeho wučerja, kiž wšitko lěpje wě, ale někoho, kotryž móže ludźi integrować a mjez wšelakimi měnjenjemi posrědkować. Štóž pak kaž Marco Wanderwitz populistiske hry hraje a towaršnosć pači, njeje po mojim měnjenju jako społnomócnjeny za wuchod a načolny kandidat CDU kmany“, zwuraznja krajny předsyda sakskeje FDP a Kamjeničanski zapósłanc zwjazkoweho sejma Frank Müller-Rosentritt w nowinskej zdźělence. „Jako wuchodny Němc nochcu wot nikoho zastupowany być, kiž wulkemu dźělej wobydlerjow wuchodnych krajow wumjetuje, zo njejsu k demokratiskemu diskursej kmani.“

Rostock (dpa/SN). Předsyda Němsko-ruskeho foruma Matthias Platzeck njewidźi najebać napjate poćahi k Ruskej žanu alternatiwu k dialogej. „Runje, hdyž napjatosće přiběraja, je wopak dialog přetorhnyć a mosty spotorhać“, rjekny by­wši ministerski prezident Braniborskeje dźensa w rańšim magacinje ZDF. „To njeje hišće nihdy k lěpšim wuslědkam wje­dło.“ Platzeck wobdźěla so wot dźensnišeho na Němsko-ruskim forumje w Rostocku. Krajne knježerstwo Mecklenburgsko-Předpomorskeje z ministerskej prezidentku Manuelu Schwesig (SPD) bě na tym wobstawało, forum najebać problemy přewjesć.

Drježdźany (dpa/SN). Sakska chce energijowu změnu dale pospěšić. Za to je krajne knježerstwo wčera energijowy a klimowy program schwaliło. Wobswětowy minister Wolfram Günther (Zeleni) rěčeše wo „mězniku“ a sobu najwažnišim přede­wzaću koalicije CDU, SPD a Zelenych. Nowy program rjaduje strategiske wusměrjenje energijoweje a klimoweje politiki swobodneho stata hač do lěta 2030.

Centralnu rólu hraje wětřikowa a solarna energija. Po tym puću chce Sakska hač do lěta 2030 něhdźe 65 procentow wočakowaneje přetrjeby miliny z wobnowjomnych energijow zdobyć. Kelko nowych wětrnikow a solarnych připrawow dyrbja za to twarić, njeje dotal jasne. Wětrniki dyrbja znajmjeńša tysac metrow wot sydlišćow zdalene być.

Torsten Herbst, zapósłanc FDP w zwjazkowym sejmje, koncept kritizuje. Wón skedźbni wčera na to, zo wutwar wětroweje a solarneje energije problem běžneho zastaranja z milinu njerozrisa. AfD warnowaše před „hoberskimi importami miliny“ po kóncu brunicy.