Wšelaka zasłužba
Bärbel Bas mjeńšiny wopytała
Atrapy Rusku za nós wodźa
Washington (dpa/SN). Ukrainske wójsko zasadźuje w zakitowanskim boju přećiwo ruskim nadpadnikam po informacijach nowiny Washington Post tež atrapy bróni, zo by inwazorow zamyliło. Při tym jedna so zwjetša wo drjewjane napodobnjenja modernych rakety mjetacych systemow USA, piše nowina, powołujo so na zamołwitych zastojnikow USA a Ukrainy. Na tute wašnje su ruske wójsko pohnuli, dosć drohe wokřidlene rakety typa Kalibr na njestrašne replikaty přepraskać. Nowiny wozjewjeja k tomu fota tajkich pozdatnych wojerskich objektow.
„Ruske truty, kotrychž pozicije pozdatnych raketowych systemow wójnskim łódźam w Čornym morju posrědkuja, njemóža atrapy wot woprawdźitych raketowych baterijow rozeznawać“, cituje nowina ukrainskeho oficěra. Po někotrych tydźenjach su atrapy znajmjeńša dźesać raketow typa Kalibr za nós wjedli. Hladajo na wuspěch su produkciju replikatow dale rozšěrili. Napodobnjenja móhli tež přičina toho być, zo su ličby wot Ruskeje pječa zničenych ameriskich systemow takle wysoke, wosebje hladajo na raketowy system Himars.
To a tamne (31.08.22)
Chory pinguin w zwěrjencu w San Diegu w USA ma wotnětka ortopediske gumijowe črije. Štyri lět stary Lucas, zastupnik južnoafriskich pinguinow, ćerpi hižo dlěši čas zahorjenych nohow dla, zwěrjenc w južnej Kaliforniskej zdźěla. Prěnje wuslědki su wjele lubjace: Lucas móže zaso lěpje běhać a wo wjele lěpje stejo runowahu dźeržeć. Črije su wosebje polstrowane a maja bolosćam zadźěwać.
Młodostnej płuwarce w Sprjewi stej w Berlinje zasadźenje policije a wohnjoweje wobory zawiniłoj. Swědcy běchu holcy wokoło 21 hodź. w Friedrichshainje wuhladali a policiju informowali. Policisća płuwarce po někotrych diskusijach z wody wućahnychu. Płuwanje w Sprjewi w centrumje Berlina je zakazane. Jedna so wo zwjazkowu wodowu dróhu z tójšto nakładnymi a sportowymi łódźemi. Nimo toho je kwalita wody špatna.
Merz: Ampla zawinuje njeměr
Berlin (dpa/SN). Předsyda frakcije CDU/CSU w zwjazkowym sejmje Friedrich Merz je njepřezjednosć amploweje koalicije nastupajo plany płunoweho popłatka na dobro wulkich importerow energije kritizował. „Surowa wójna w Europje, stupace płaćizny energije a strach hospodarskeje krizy w Němskej: Runje nětko by kraj rozsudne knježerstwo za jasnosć w njewěstych časach trjebało“, rjekny Merz powěsćerni dpa. „Zwada ample ludźi zamyla a zawinuje njeměr.“
Mortwi při namócnosćach
Bagdad (dpa/SN). Při nadběhu přiwisnikow wliwapołneho nawody šiitow Muktady al-Sadreho na knježerstwowy palast w irakskej stolicy Bagdadźe su wěstotne mocy znajmjeńša jědnaće ludźi zatřělili. Wjace hač 160 demonstrantow je so zraniło. Krótko do nadběha bě al-Sadr připowědźił, zo so z politiki wróćo sćehnje. Wobkedźbowarjo rěča wo „strašnej eskalaciji politiskeho połoženja“. Napjatosće běchu minjene tydźenje přiběrali.
Žada sej čujomne wolóženja
Aktiwisća organizacije Campact su sej dźensa před Zwjazkowym ...
General namjet Scholza wita
Znowa klawsura knježerstwa
Ukrainske wójsko ofensiwu zahajiło
Kijew (dpa/SN). Poł lěta po nadpadźe ruskich wojerskich jednotkow na juh Ukrainy je ukrainska armeja přećiwnu ofensiwu zahajiła. Při tym móžachu prědnje zakitowanske linije ruskeje armeje na wjacorych městnach přełamać, ukrainske wójsko zdźěla. Prezident Wolodymyr Zelenskyj w swojej narěči ofensiwu jenož naspomni, dokelž nochcyše nadrobnosće přeradźić. „Tola okupanća měli wědźeć, zo jich přez mjezu ćěrimy, kotraž přeco hišće wobsteji.“ Ruscy wojacy, kotřiž chcedźa přežiwić, „měli nětko domoj hić“, Zelenskyj rjekny. Při wšěm njeje wjele faktow ofensiwy znate. Po informacijach južneje skupiny ukrainskeje armeje su separatistow a rusku marinowu infanteriju nuzowali, so wróćo sćahnyć. Po informacijach sćelaka CNN w USA su ukrainske jednotki štyri wsy wuswobodźili.
Ruske zakitowanske ministerstwo je ukrainski nadpad wobkrućiło. Zdobom w Moskwje twjerdźa, zo je wona „žałostnje zwrěšćiła“. Pozdatna ofensiwa je „kaž přeco fake ukrainskeje propagandy“.
Połoženje so přiwótřiło
W Němskej pobrachuje po trochowanju něhdźe 40 000 wučerjow
Berlin (dpa/SN). K zahajenju noweho šulskeho lěta pobrachuje na šulach Němskeje po posudku Zwjazka wučerjow Němskeje hač do 40 000 wučerkow a wučerjow. Wučbne zastaranje je so we wšitkich zwjazkowych krajach dale pohubjeńšiło, rjekny prezident zwjazka Heinz-Peter Meidinger powěsćerni dpa. „Po wšej Němskej wuchadźamy wot woprawdźiteho njedostatka 30 000, snano samo 40 000 njewobsadźenych městnow.“
Połoženje, městna z derje wukubłanymi wučerjemi wobsadźić, je so přirunujo z lońšim lětom hišće raz přiwótřiło“, rjekny předsydka dźěłarnistwa kubłanje a wědomosć (GEW) Maike Finnen. „Wupad wučby hnydom na spočatku šulskeho lěta je hižo woprawdźitosć, wjetše wučbne skupiny, šmórnjenje spěchowanskich poskitkow a skrótšenja hodźinskich taflow su na dnjowym porjedźe“, rjekny Udo Beckmann, předsyda Zwjazka zdźěłowanje a kubłanje.
