To a tamne (07.09.22)
Studenća Berlinskeje swobodneje uniwersity wot dźensnišeho zaso wjedrowych kmótrow za wyšiny a nižiny pytaja. Tak su zaso mjena muži a žonow prašane. Přewzaće kmótřistwa za wyšinu płaći 390 eurow, za nižinu jenož 260 eurow. Z pjenjezami podpěruje uniwersita praktiske dalekubłanje studentow. Nimo toho hodźi so 110lětny klimowy rjad Swobodneje uniwersity Berlin dale wjesć, za kotryž wobšěrne daty wo wjedrje hromadźa.
Wowčer ze sewjera Delnjeje Sakskeje njesmě swoje wowcy z brónju před wjelčimi nadpadami škitać. Lüneburgske zarjadniske sudnistwo je wčera skóržbu wowčerja přećiwo městu Winsen wotpokazało. Wowčer Wendelin Schmücker žadaše sej wot města dowolnosć, brónju wobsedźeć a wužiwać směć, štož město wotpokaza. Wowčer chcyše z tutej so bližace wjelki wottrašić a k nuzy tež morić.
Myto za rjekowsku zmužitosć
Podstupim (dpa/SN). Myto medijoweje konferency M100 Sanssouci Colloquiuma dóstanje lětsa ukrainski lud. „Z rjekowskej zmužitosću a wulkej wolu zakituje so ukrainski lud hižo měsacy dołho přećiwo brutalnej inwaziji Ruskeje“, zarjadowarjo dźensa zdźělichu. „To je wójna přećiwo demokratiji, swobodźe a našemu systemej hódnotow.“ Wladimir Klitschko ma M100 Media Award 15. septembra w hrodźe Sanssouci přijimać.
Woheń je pod kontrolu
Wernigerode (dpa/SN). Wohnjowi wobornicy mjeztym wulki woheń w Smolinach kontroluja. Wot soboty su so tam płomjenja rozpřestrěwali. Wohnjowe wobory su dale w potrjechenej kónčinje zasadźene. Helikoptery su dźensa rano z hašenskimi dźěłami pokročowali. Tež hašenskej lětadle w kónčinje zasadźa. Wodu za hašenje chcedźa z Concordia jězora brać. Wodźizna wostanje tohodla kaž hižo dźeń do toho za wopytowarjow zawrjena.
Nowy poskitk pilotam
Nowa naslědnica
Ma rozsud za prawy
Haseloffa Kretschmer staj sej přezjednaj
Sprjewiny Doł (dpa/SN). Ministerskaj prezidentaj Sakskeje a Saksko-Anhaltskeje, Michael Kretschmer a Reiner Haseloff (wobaj CDU), wobstejitaj na kónc wudobywanja brunicy w lěće 2038. Na zetkanju z braniborskim kolegu w zastojnstwje Dietmarom Woidku (SPD) a zwjazkowym kanclerom Olafom Scholzom (wobaj SPD) minjeny pjatk w Sprjewinym Dole wobaj politikarjej CDU eksplicitnje tutón datum mjenowaštaj. Zamołwići ample w Berlinje běchu w swojim koaliciskim zrěčenju formulowali, zo ma so skónčenje wudobywanja brunicy „w idealnym padźe“ hižo w lěće 2030 realizować.
Je wažne wobstejace kapacity runje nětko w syći zachować, zo njeby hišće k dalšim njedostatkam dóšło, Haseloff wuwjedźe. „Tónle časowy wotběh je za nas wažny, dokelž mnohe naprawy zakonja k strukturnemu spěchowanju pola nas w kraju k tomu słuža, chemiju za přichod kmanu přihotować.“ Za to je wěste zastaranje z energiju a wubědźowanjakmanymi płaćiznami trěbne. Kretschmer dźakowaše so Scholzej, zo je so tutón jasnje k strukturnej změnje wuprajił. „Myslu sej, zo smy dźensa zaso trochu dale“, Kretschmer rozłoži.
Warnuja embarga dla
Schwedt (dpa/SN). Zakaz dowožowanja ruskeho wolija budźe hospodarstwo we wuchodnej Němskej po měnjenju tam bydlacych předewzaćelow wosebje poćežować. Zjednoćenstwo předewzaćelskich zwjazkow wuchodneje Němskeje a Berlina warnowaše wčera před chutnymi sćěhami planowaneho wolijoweho embarga dla. „Embargo nam bóle škodźi hač Ruskej“, zjednoćenstwo wozjewi.
Staty EU su w meji ruskeje wójny w Ukrainje dla embargo přećiwo Ruskej postajili, kotryž ma wot noweho lěta płaćić. Ćišća ze stron Madźarskeje dla pak ma tutón jenož za tankowcow z Ruskeje płaćić. W protokolowym wozjewjenju so Němska a Pólska dobrowólnje pipeline-wolija wzdaštej. Tuž stej rafinerija PCK w Schwedće a rafinerija w Leunje potrjechenej. Zamołwići Leuny su so za alternatiwami rozhladowali, za Schwedt pytaja hišće rozrisanje. Připrawa wulki dźěl wuchodneje Němskeje z ćěriwom zastaruje. „Zastaranska wěstota z produktami PCK njeje potom hižo zaručena“, zwjazk předewzaćow w Schwedće zdźěli. Zwjazkowe wobswětowe ministerstwo kónc awgusta dalewobstaće rafinerije garantowaše.
To a tamne (06.09.22)
Po zawlečenju Jack Russell Terriera Oskara před lětom w Berlinje njejsu wobsedźerjo swojeho psa přeco hišće namakali. Minjene měsacy drje su ludźo Oskara hdys a hdys wuhladali, tola pytanje za nim bě stajnje njewuspěšne. Loni bě hólc před drogeriju w Pankowje psa pokradnył a w Kreuzbergu zaso pušćił. Powěsć je so spěšnje po socialnych syćach rozšěriła a z tym kedźbnosć zbudźiła.
Po dwójnej přestawce korony dla so někotři ratarjo w bayerskim Allgäuju tradicijow wzdadźa. W septembrje wšak swoje kruwy z pastwow na horach do dołow wjedu, štož su rady woswjećili. Mjeztym skót na wšelake blaki wodźa, zwotkelž jón dale na statoki transportuja. Někotři burja swójski skót samo hnydom z nakładnymi awtami z pastwy na horje wotewzaja. Najebać to, pak ratarjo kónc lěća swjeća a domizniski swjedźeń přewjedu.
Emeritowaneho bamža wopytali
Vatikan (B/SN). 27. awgusta je bamž Franciskus w Pětrowej cyrkwi w Romje dwaceći dalšich měšnikow ze štyrjoch kontinentow jako kardinalow postajił. Nowi kardinalojo wopytachu po tym emeritowaneho bamža Benedikta XVI. (2005–2013) w klóštrje „Mater Ecclesiae“ a modlachu so z 95lětnym zhromadnje „Salve Regina“. Pozběhnjenje wuzwolenych do stawa kardinala w purpurowej drasće bě zazběh zhromadźizny wšěch kardinalow, na kotrejž chcedźa wo přetwarje centralneho zarjada katolskeje swětoweje cyrkwje wuradźować.
Wosebite pišćele
Inflacija w Turkowskej wysoka
Ankara (dpa/SN). Inflacija w Turkowskej dale stupa. Lětne podróšenje wučinješe w awgusće něhdźe 80,21 procentow, narodny statistiski zarjad dźensa w Ankarje zdźěli. Płaćizny žiwidłow stupachu porno lońšemu přerěznje wo wjace hač 90 procentow. W juliju běchu přetrjebowarske płaćizny porno junijej wo 79,6 procentow wyše. Přičiny inflacije su wšelakore. Jedna z toho je słaba krajna měna lira.
Woheń pod kontrolu njeje
Wernigerode (dpa/SN). Wulkowoheń w Smolinach tež třeći dźeń hišće pod kontrolu njeje, zdźěli dźensa rěčnik wokrjesa we Wernigerodźe. Na někotrych blakach je so woheń dale rozpřestrěwał. Zarjady wuchadźeja z potrjecheneje přestrjenje něhdźe 150 hektarow. Dźensa dopołdnja chcychu tam hašenske lětadła a helikoptery zasadźić štož ma so wotpowědnje po časach koordinować. Tole přewozmje techniske zasadźenske wjednistwo z Goslara.
Surowy nadpad w Kanadźe
