Wodźace gremije unije wólbny manifest schwalili – Söder: Kónčny spurt

Berlin (dpa/SN). Jednohłósnje su wodźace gremije CDU a CSU swój program k wólbam zwjazkoweho sejma schwalili. Předsydaj wobeju stronow, Armin Laschet (CDU) a Markus Söder (CSU) staj jón wčera popołdnju na nowinarskej konferency předstajiłoj. 140 stron wopřijacy manifest steji pod hesłom „Program stability a ponowjenja – zhromadnje za modernu Němsku“.

Nimale sto dnjow do wólbow pokazaštaj so Laschet a Söder optimistiskaj. „Nětko je runje hišće 98 dnjow a nětko dźemy do kónčneho spurta“, rjekny Laschet, kiž je hladajo na wobzamknjeny program „widźomnje wolóženy“. Po jeho słowach jedna so wo dosć konkretny program. Wón je socialnje wuwaženy a pokazuje puć, kak móhła so Němska na lěpšu klimu wusměrjeny industrijny kraj wuwić, bjez toho zo by to dźěłowe městna pła­ćiło, Söder rjekny. Z nim chcyła unija ­stabilitu a runočasne ponowjenje zwjazać. Ludźo móhli so na to spušćeć, zo unija tež přichodnje na nowe wužadanja reaguje. Z ludźimi pak nochcyła při tym jako mudry wyši wučer wobchadźeć, předsyda CSU přilubi.

Zaćišć, zo matej stronje CDU a CSU z lětušimi wólbami zwjazkoweho sejma tak swoje ćeže, je so wčera znowa potwjerdźił. Předsyda CDU a kanclerski kandidat unije Armin Laschet a předsyda CSU Markus Söder prezentowaštaj wólbny program, kotremuž wosebje jedne faluje: serio­znosć nastupajo financowanje njeličenych wólbnych přilubjenjow. To zda so być wućek doprědka: wosebje, hdyž Söder připowědźi hakle po wólbach pruwować chcyć, što z dołheho kataloga powabkow za wolerjow so scyła zeskutkownić hodźi. Z hinašimi słowami: Wólbny program unije runa so tónkróć znatej „kóčce w měše“, hdźež spočatnje njewěš, što pozdźišo dóstanješ. Reakcije politiskich kontrahentow njejsu na so čakać dali. Njesocialnje a bjez plana, kritizuja Zeleni a SPD. Wězo, to je ropot wólbneho boja. Ale runje to, štož je unija do mnohich dotalnych wólbow na programach druhich njesměrnje šwikała, wona nětko za sebje reklamuje. Kajki to zawjerćany swět! Axel Arlt

Drježdźany (dpa/SN). Sakska strowotniska ministerka Petra Köpping (SPD) je zmylki při dotalnej organizaciji za čas pandemije přiznała. W diskusijnym kole na dnju sakskich lěkarjow naspomni wona problematiku zetkanjow mjez zwjazkowymi krajemi wot lońšeje nazymy. „To je z mojeho wida jasny zmylk, dokelž měli kraje same rozsudźić.“

Hižo w prěnim lockdownje běchu po słowach politikarki CDU kraje w dalokej měrje samostatnje jednali. Tež rozdźělne regionalne naprawy w zwjazkowym kraju w druhej žołmje pandemije njeby wona dźensa wjace dowoliła. „Trjebamy cyłokrajne naprawy.“

Nimo toho bychu mjezu k Čěskej wulkeje ličby infekcijow dla nazymu prjedy zawrěć dyrbjeli. Tak móhli natyknjenjam lěpje zadźěwać. Köpping připowědźi lěpše personalne, financielne a digitalne zastaranje strowotniskich zarjadow. Měšćanske a krajne zarjadnistwa njeběchu hač do spočatka pandemije žanu wulku wažnosć na wuhotowanje tychle zarjadow kładli. Ministerka Petra Köpping wupraji so w tym zwisku za to, zarjadować krajny strowotniski zarjad.

Pjany muž je so w horcej nocy do cuzeho domu zabłudźił a so tam nahi wuslěkał. Wobydlerjo wuhladachu 33lětneho wosrjedź nocy w kuchni jednoswójbneho domu w hornjopfalcskim Eschenbachu. Jako jeho narěčachu, so wón zwoblěka a so zminy. Kaž so wukopa, bě 33lětny w susodstwje swjećił a bě skónčnje chětro natutkany a bjez orientacije.

Lětacy omlet je zwadu mjez hosćimi hotela w Brandenburgu nad Habolu přiwótřił. Zwada bě nastała, jako so někotre wosoby na skupinu dalšich hosći na nutřkownym dworje hotela hary dla hóršachu. Při tym z hotelowym woknom wěcy na dwór mjetachu. Jako skónčnje omlet přileća, poda so 33lětny z dalšimi wosobami k hotelowej stwě. Tam so wón namócnje zadoby, storkaše do 17lětneho a jeho snadnje zrani. Policija namócnosće nětko přepytuje.