Dźensa židowscy wěriwi a mnozy dalši na to spominaja, zo bu w ...
Wiki budu zdźěla wobmjezowane
Zhorjelc (AK/SN). Tradicionalne mjezu přesahowace Šleske božodźěsćowe wiki wotměja so wot 3. do 19. decembra w Zhorjelcu. „Wiki maja so zakonskim postajenjam přiměrjene na wjetšej płoninje wotměć. Wulki dźěl zwučenych poskitkow budu wopytowarjo w běhu 17 dnjow wot Delnjeho torhošća hač do nutřkowneho města dožiwić móc“, informuje nowinska rěčnica města Juliane Zachmann. „Wšitke prašenja wothłosujemy ze strowotniskim zarjadom Zhorjelskeho wokrjesa. Wězo tež aktualne wuwića do swojeho planowanja zapřijamy. Zhorjelske adwentne wiki wuhotuje tamniša kulturna serwisowa towaršnosć. Wobdźěleni wikowarjo přińdu z Němskeje, Pólskeje a Čěskeje.
Razniše chłostanja smalakam
Berlin (dpa/SN). Po dlěšej politiskej ćahańcy płaći wot dźensnišeho nowy katalog pokutow. Zaměr je wěstotu we wobchadźe polěpšić. Tak maja předewšěm kolesowarjo a pěšcy lěpje škitani być.
Cyle nowe je, zo dyrbi šofer, kiž parkowanišćo za elektroawta a jězdźidła za tak mjenowany „carsharing“ njewoprawnjenje wužiwa, pokutu 55 eurow płaćić. Njedowolene wužiwanje wuchowanskeje hasy je wotnětka po informacijach wobchadneho ministerstwa runje tak chłostajomne kaž njewutworjenje tajkeje. Winicy dyrbja 200 do 320 eurow chłostanja płaćić a měsac jězbnu dowolnosć wotedać. Tež přespěšni šoferojo maja přichodnje wjetšu pokutu płaćić. Město dotal 35 eurow za 16 do 20 km/h wjac we wsy wučinja wona dwójce telko.
Woprašowanje instituta Yougov pak wujewja, zo jeno 30 procentow ludźi měni, zo razniše chłostanja tež wjac wěstoty we wobchadźe wuskutkuja. 63 procentow do toho njewěri.
To a tamne (09.11.21)
Dohromady 113 e-scooterow su w Kölnje z Ryna wućahnyli. To zdźěli wčera zwjazk Plattform Shared Mobility (PSM) po dołho trajacych dźěłach. Zas a zaso běchu nurjerjo tajke transportne srědki z wody ćahali. Někotre e-scootery su wotpowědni wobhospodarjerjo mjeztym wotewzali a za znowawužiwanje přihotowali. Podnurjeć e-scootery we wodźiznach mjenuje rěčnik PSM „wosebje ćežku formu wandalizma“.
Drogi w hódnoće 11,5 milionow eurow pokradnychu njeznaći skućićeljo policiji w južnoafriskim Kapstadće. Minjeny kónc tydźenja zalězechu woni z woknom do běrowa specialneje jednotki Hawks a spakosćichu tam 541 kilogramow kokaina z trezorow. Z Kapstadta transportuja wikowarjo łaćonskoameriske drogi dale do Awstralskeje, do Europy a Hongkonga.
Politiska wola pobrachuje
Vatikan (B/SN). Kardinalny statny sekretar Vatikana Pietro Parolin, kotryž nawjeduje delegaciju swjateho stoła, napominaše na swětowej klimowej konferency w šotiskim Glasgowje wobdźělnikow zetkanja z nimale 200 krajow, zo drje su srědki za škit klimy tu, ale kulturu brojenja měli nuznje přewinyć. „Měr, přiměrjenosć a wobchowanje stwórby Božeje su tři hromadźe słušace temy, kotrež nimamy rozdźělnje a jednotliwje wobjednawać“, Parolin potwjerdźi.
Ćěmnu zańdźenosć wobdźěłać
Horca faza konferency
Glasgow (dpa/SN). Po demonstracijach z wjacorymi dźesaćtysacami wobdźělnikow kónc tydźenja započa so dźensa druhi wažny tydźeń swětoweje klimoweje konferency w šotiskim Glasgowje. 30 000 delegatow z cyłeho swěta diskutuje přichodne dny hłownje wo tym, štó ma naprawy za škit klimy zapłaćić. Kónc tydźenja přidruži so wobdźělnikam němska wobswětowa ministerka Svenja Schulze (SPD), kotraž je tučasnje hišće do koaliciskich jednanjow zawjazana.
„Wuslědk wažniši hač datum“
Berlin (dpa/SN). Předsydka frakcije Zelenych Katrin Göring-Eckardt njewuzamknje, zo traja koaliciske jednanja ze stronomaj SPD a FDP dlěje, hač bě planowane. W rańšim magacinje telewizije ARD politikarka zawěsći, zo so wšitcy jara napinaja. „Přiwšěm je wuslědk wažniši hač datum“, wona rozłoži. „Runje tak kaž na klimowej konferency w Glasgowje trjebamy tež na koaliciskich jednanjach w Němskej dobre rezultaty.“
Musk chce akcije předać
Znowa woleny
Maaß předsydka
Döbeln (dpa/SN). FDP w Sakskej ma nowu předsydku. Na krajnym stronskim zjězdźe sobotu w Döbelnje wuzwolichu liberalni měšćanostku Lommatzscha Anitu Maaß za swoju předsydku. 45lětna dósta 70,4 procenty hłosow.
Dotalny předsyda Frank Müller-Rosentritt njebě hižo k wólbam nastupił. 39lětny chce so po swójskich wuprajenjach na dźěło w zwjazkowym sejmje kaž tež na swój mandat w Kamjeničanskej měšćanskej radźe koncentrować.
Z Hornjeje Łužicy buchu Matthias Schniebel a Benjamin Lange z Budyskeho wokrjesneho zwjazka kaž tež Toralf Einsle ze Zhorjelskeho wokrjesneho zwjazka do krajneho předsydstwa FDP woleni. Wot lěta 2014 njeje strona hižo w sakskim sejmje zastupjena. FDP ma w swobodnym staće něhdźe 2 300 čłonow.
Najwyši staw wot spočatka pandemije
Berlin (dpa/SN). Hódnotu incidency za cyłu Němsku je Roberta Kochowy institut dźensa rano z 201,1 wozjewił. To je dotal najwyši staw we wobłuku koronapandemije. W běhu jednoho dnja zliči institut 15 513 nowych natyknjenjow. Dotal najwyšu hódnotu zwěsćichu za čas druheje žołmy 22. decembra 2020 ze 197,6, kaž powěsćernja dpa informuje.
Aktualneho połoženja korony dla warnuje amtěrowacy hospodarski minister Peter Altmaier (CDU) před tym, epidemiske połoženje zběhnyć, kaž to SPD, Zeleni a FDP wotpohladuja. „Tuchwilu by to wulki zmylk a dospołnje wopačny signal był“, Altmeier potwjerdźi.
Sakska je mjeztym swoje postajenja wo škiće před koronu přiwótřiła. Tu płaći wot dźensnišeho 2G-prawidło. Tuž nimaja wotnětka nješćěpjeni žadyn přistup k nutřkownej gastronomiji kaž tež do kulturnych a wólnočasnych zarjadnišćow. Wuwzaća płaća jeničce za dźěći a młodostnych a wosoby, kotrež njemóža so šćěpić dać. 2G-prawidło płaći tež za wulkozarjadowanja kaž kopańcu w stadionach.
Spěchowanje rewěrow zaběžało
Zwjazk nałožuje 40 miliardow eurow za wuspěšnu strukturnu změnu
Berlin (dpa/SN). Zwjazk přewostaja brunicowym rewěram w Porynskej a wuchodnej Němskej něhdźe 40 miliardow eurow, zo bychu strukturnu změnu w zwisku z kóncom wudobywanja a zmilinjenja brunicy zmištrowali. Za Łužicu je dotal něhdźe 1,6 miliardow eurow kruće zaplanowanych. Z wida někotrych ekspertow pak njeje dźěl tychle srědkow zmysłapołnje zasadźeny.
Spěchowanje je mjeztym zaběžało. Dotal wuzwolichu sydom projektow – wšitke w Sakskej –, za kotrež nałožuja 80,5 milionow eurow. To wuchadźa z rozprawy amtěrowaceho zwjazkoweho ministra za hospodarstwo a energiju Petera Altmaiera (CDU). „Smy po dobrym puću, tójšto cilow je wottyknjenych“, wón zjima. Ze spěchowanjom chce Zwjazk hač do lěta 2028 něhdźe 5 000 nowych dźěłowych městnow wutworić, z kotrychž je hižo wjace hač 2 000 wobsadźenych.
