Drježdźany (SN). Zwjazk sakskich městow a gmejnow je spočatk tydźenja hłowne dypki swojeje noweje poziciskeje papjery k skrućenju komunalneho samozarjadnistwa w swobodnym staće předstajił. Ministerski prezident Michael Kretschmer (CDU) iniciatiwu wuraznje witaše, rěčo wo wažnych nastorkach. „Wobydlerjam bliske komuny a derje fungowace komualne samozarjadnistwo su wažne za dobru zhromadnosć a sylnu Saksku. Chcemy zhromadnje z komunami zmužiće a z dobrymi idejemi na tym dźěłać, zo je Sakska w městach a we wjesnych kónčinach z dobrej domiznu.“

Michael Kretschmer potwjerdźi, zo so rozmyslowanja na papjerje z tym kryja, štož swobodny stat runje k skrućenju mjeńšich gmejnow we wjesnych kónčinach planuje abo štož je hižo zwoprawdźił. W tym zwisku wón na to pokaza, zo su komuny loni prěni króć inwesticisku pawšalu 70 000 eurow přidatnje dóstali. Wo wužiwanju pjenjez móža měšćanske a gmejnske rady samostatnje rozsudźić. Instrument pawšalneho spěchowanja je wažny, zo móhli předewzaća njekom­plikowanišo zwoprawdźić.

Paris (dpa/SN). Francoski prezident Emmanuel Macron chce ćežko wobškodźenu katedralu Notre-Dame w Parisu w běhu pjeć lět zaso natwarić dać. Swětosławny symbol francoskeje stolicy ma potom rjeńši być hač do toho, wuzběhny Macron wčera wječor w telewizijnej narěči. „Budźemy jednać a změjemy wuspěch.“ Hižo póndźelu po wudyrjenju wohenja bě wón přilubił, gotisku cyrkej zaso natwarić. Poprawom chcyše wčera swoje připowědźene reformowe plany we wobłuku „narodneje debaty“ předstajić, kotrež bě po masiwnych protestach „žołtych lacow“ zdźěłał. To pak je najprjedy raz přestorčene, dokelž njeje za to nětko prawy čas, kaž prezident rjekny.

Fachowcy dwěluja, zo je natwar katedrale w běhu pjeć lět zwoprawdźomny. Wuměłstwowy stawiznar Stefan Albrecht z Bamberga na to skedźbnja, zo pochadźa drjewjana třěšna konstrukcija z 13. lětstotka. Twarske plany hižo njeeksistuja. Fachowcy maja jenož hrube rysowanki. Albrecht z tym liči, zo wostanje Notre-Dame wjelelětne twarnišćo.

Krajne knježerstwo naćiskej ratarskeho ministra přihłosowało

Drježdźany (SN). Jako prěni zwjazkowy kraj scyła je Sakska wčera swójske po­stajenje wobzamknyła, kotrež třělenje wosebje napadnych wjelkow nadrobnje rjaduje. Postajenje, kotremuž je krajne knježerstwo na swojim wčerawšim po­sedźenju přihłosowało, ma po słowach wobswětoweho a ratarskeho ministra Thomasa Schmidta (CDU) kónc meje płaćiwosće nabyć.

Tak je móžno kruće škitaneho wjelka třěleć, je-li so čłowjekej na mjenje hač 30 metrow bližił a su-li wšitke pospyty k jeho wućěrjenju zwrěšćili. Zaměrnje wućěrić so wjelki maja, su-li w bliskosći wobydlenych twarjenjow abo hdyž so ludźom na mjenje hač sto metrow bliža, bjeztoho zo ćeknu. Zo by so hospodarskim škodam zadźěwało, smědźa wjelka morić, je-li tón dwójce w běhu 14 dnjow škitny płót na pastwje přewinył.

Župa „Handrij Zejler“ nětko tak prawje „płun dawa“. Nowy načolnik Marcel Brauman regionalnemu zwjazkej jara tyje. Wón njeměri so jenož na serbskorěčne rumy, ale tež direktnje młodźinu narěči, zo by z podpěru Wojerowskeje župy přewje­dła, štož so jej lubi. Prěni tajki wjele lubjacy započatk bě wčerawše prěnje zetkanje „Kluba młodych serbskich swobodnych myslerjow“. A to hišće na historiskim městnje, w domje, w kotrymž bu před wjac hač sto lětami Domowina dozałožena. To mam za pozitiwne znamjo do přichoda a wjeselu so, zo nimaja tam nětko jenož nowy rěčny rum, ale zo serbšćina w zjawnosći města dale přiběra. Dalewjedźenje tohole noweho formata jako stajne blido jara podpěruju. A, kaž smy słyšeli, wšak su młodostni tež hižo dalše temy wulahnyli, wo kotrychž chcyli rěčeć. Přijomna atmosfera we Wojerecach znajmjeńša dobrym rozmołwam polěkuje. Tuž dale tak! Janek Wowčer