Z wudaća: srjeda, 18 oktobera 2017

Róžant/Chrósćicy/Njebjelčicy. We wobłuku gmejnow zarjadniskeho zwjazka Při Klóšterskej wodźe wotměja so jutře, štwórtk, tři posedźenja gmejnskich parlamentow. Tak zetkaja so čłonojo gmejnskeje rady Ralbicy-Róžant we 18.30 hodź. w Róžeńčanskej sydarni. Na jich dnjowym porjedźe mjez druhim steji, zo chce wjesnjanosta wopodstatnić nuzowy rozsud nastupajo Ralbičansku kormjernju swini. Dale chcedźa radźićeljo wjesnjanostu społnomócnić, zo smě přepo­dać nadawk za instalaciju elektroniskeho zwonjenja při Konječanskej kapałce.

W 19.30 hodź. zetkaja so jutře čło­nojo Chróšćanskeje gmejnskeje rady, a to w sydarni „Łužica“. Tam chcedźa na přikład diskutować wo přetwarje a znowawužiwanju Chróšćanskeje stareje šule na gmejnski a kulturny centrum. Nimo toho wobjednawaja wustawki wo čisłowanju domow. Zjawnemu dźělej přizamknje so njezjawny.

Klětno (JoS/SN). Jenički rybarski swjedźeń Hamorskeje gmejny je so minjenu sobotu w Klětnom wotměł. Tam je jón swójba hatarskeho mištra Dietmara Bergmanna znowa z wjele lubosću přihotowała a móžeše při Maksimilianowym haće něšto stow zajimcow witać. W běhu dopołdnja rybarjo trójce do wody stupichu a dohromady dwě tonje rybow wućahnychu. „To bě dobre rybarske lěto, w kotrymž njemějachmy žane wulke starosće. Tuž móžemy z wunoškom spokojom być“, hódnoćeše Dietmar Bergmann. Hamorski wjesnjanosta Achim Junker (CDU) wuzběhny angažement Bergmannec swójby za wjes, kotraž je rybarski swjedźeń na rjanu tradiciju wuwiła. Wulke wiki z wobšěrnym poskitkom ryby wobrubichu Rychwałdscy muzikanća.

Njeswačidło. Na ekskursiju cyle w znamjenju najwšelakorišich družin ptačkow přeprošuje Kamjenski Muzej zapadneje Łužicy njedźelu, 22. oktobra, we 8 hodź. Marko Zischewski z Njeswačanskeje ptačernje powjedźe wobdźělnikow podłu tamnišich hatow. Te su nětko rybjacych žnjow dla wotpušćene a přiwabjeja ptački po stach a tysacach, dokelž nadeńdu wone tam wulke mnóstwo insektow, jich larwow a małych rybičkow jako picu. Wobdźělenje płaći štyri eura, potuńšene 2,50 eurow. Při přizjewjenju pod telefonowym čisłom 03578/ 788 30 zajimcy zhonja, hdźe so ekskursija započnje.

Dyrbi měsac nóžkować

Budyšin. Na awtodróze A 4 mjez wotbóčkomaj Budyšin-wuchod a Budyšin-zapad je spěšnosć na 120 km/h wobmjezowana. Hač so tole dodźerži, je policija za­wčerawšim dopołdnja kontrolowała. Wjace hač 3 600 jězdźidłow je wot 7 hač do 12.30 hodź. nimo měrjenskeje stacije jěło. 159 šoferow bě spěšnišo hač dowolene po puću. W 110 padach wostanje při poroku. 49 wodźerjow pak měješe wosebje nuznje a dóstanje nětko list, zo dyrbja pokutu płaćić. Najspěšniši bě wodźer wosoboweho awta, kotrehož měrichu ze 174 km/h. Za to změje wón 240 eurow płaćić, dóstanje dwaj dypkaj w Flensburgu a dyrbi měsac nóžkować.

Rozmołwa do koncerta w Budyskej Michałskej cyrkwi

21. oktobra zaklinči w Budyskej Michałskej cyrkwi na koncerće z twórbami serbskich komponistow prěni króć tež nowy hudźbny kruch Choćebuskeho komponista Ulricha Pogody. Alfons Wićaz je so z nim rozmołwjał.

Knjez Pogoda, předstajće prošu skrótka Wašu nowu twórbu!

Serbska kulturna informacija LODKA w Choćebuzu je mjeztym za to znata, zo přeco zaso zajimawe wustajeńcy organizuje. 29. septembra bu znowa tajka přehladka w klubowni Choćebuskeho Serbskeho domu wotewrjena, tónraz z ilustracijemi Lubnjowskeje tworjaceje wuměłče-grafikarki Ingrid Groschke.

Při kejžorskim nazymskim wjedrje wotmě so minjenu sobotu w Biskopicach štwórty raz wosebity běh ze zadźěwkami pod hesłom „Schiebock běha extrem“ po tamnišim sportowym arealu a hłownje w měšćanskim lěsu při rěce Wjazeńca (Wesenitz). Na kołokursu z mnohimi zadźěwkami dyrbjachu běharjo swoju spěšnosć, wutrajnosć a wosebje tež wušiknosć na štyrjoch abo wosom kilometrach dopokazać. Na tymaj distancomaj wobdźěli so 648 atletow. Mjez nimi je tež lětsa zaso horstka Serbow wuspěšnje wojowała.

Cyłkownaj dobyćerjej na 8 km běštaj Jakub Čórlich z Němcow z 34:01 min a Franziska Kranich z Niskeje z 43:42 min. Jakub Čórlich běše hižo 2015 cyłkowny dobyćer a loni cyłkownje druhi. Maik Petz­old z Budyšina docpě 3. městno (35:41 min). Z brawuru wojowali su tež tamni serbscy starterojo. Richard Paš­ka z Kanec wobsadźi jara dobre 6. městno (37:55 min), Roman Měrćink z Baćonja wubědźi sej prima 13. městno (40:51 min) a 16lětny Leo Čórlich z Budyšina wobsadźi mjez 185 muskimi njewočakowane 97. městno (50:50 min).

Jurij Nuk

Wokrjesna koparska liga, stafla II

1. ST Lubuš 8 27  :  7 22

2. HZ Łaz/Běły Chołmc 8 25  :  11 19

3. Natwar Němske Pazlicy 8 32  :  8 18

4. SV Haselbachtal 8 29  :  12 18

5. FSV Łuty 8 14  :  9 16

6. SJ Njebjelčicy 8 12  :  15 14

7. ST Marijina hwězda 8 18  :  11 12

8. Nowe Město II 8 14  :  19 12

HZ Kubšicy/Bukecy

– ST Marijina hwězda 3:1 (1:1) 

Zestawa hosći: Matik – Czapik, Pakoßnick, Jurš, R. Hawš, Peschmann (9. Kuring), Rab, O. Hawš, Eldor, Prasse (67. O. Schmidt), Čornak (85. Hübner)