Drježdźany (SN). Sakski hospodarski minister Martin Dulig (SPD) je tuchwilu z politikarjemi a zastupjerjemi towaršnosćow w Nižozemskej. Ćežišćo jězby je, wobstejace zwiski skrućeć a nowe wutworić. Tole potrjechi wobłuki turizm, mobilita a inowacija. Tak poda so sakska delegacija mjez druhim do Amsterdama, ’s-Hertogenbosch, Eindhovena a Helmonda. Nimo wopytow předewzaćow a wědomostnych institucijow su tež rozmołwy z oficialnymi zastupjerjemi a partnerami towaršnosćow předwidźane, zdźěli sakske hospodarske ministerstwo.
„Jězba je přiležnosć, swobodny stat jako turistiske, hospodarske a wědomostne stejnišćo prezentować. Sakska a Nižozemska matej tójšto zhromadnosćow. Wotewrjenosć nowemu napřećo – hač mobilitu, industriju abo towaršnosć nastupajo – je w Nižozemskej wulka. Tohodla sym na rozmołwy chětro wćipny“, Martin Dulig w předpolu jězby wuswětli.
Barcelona (dpa/SN). Dźesaćitysacy ludźi protestowachu wčera w Barcelonje přećiwo zajeću dweju wodźaceju aktiwistow katalanskeho hibanja wo njewotwisnosć. Z parolemi „Wy njejsće sami“, „Španiska justica won“ abo „Europa pomhajće nam“ ludźo swój protest zwuraznichu. Policija města trochowaše wobdźělnikow na něhdźe 200 000.
K protestam namołwjałoj staj wobydlerska iniciatiwa katalanskeje narodneje zhromadźizny a kulturne towarstwo Omnium Cultural. Prezidentaj organizacijow Jordija Sàncheza a Jordija Ciuxarta bě policija póndźelu na přikaz sudnicy zajało. Jimaj wumjetuja „zběžkarske zadźerženje“. Z tym hrozy mužomaj 15 lět jastwa.
Berlin (dpa/SN). Zwjazkowa kanclerka Angela Merkel (CDU) a předsyda CSU Horst Seehofer maja ju za wažnu. Tež Zwjazk 90/Zeleni a FDP chcetej so temje wěnować: socialnym problemam Němskeje. Jamaika chce najebać wulke rozdźěle to tematizować, štož ludźi woprawdźe zaběra.
Dźensa zahaja w Berlinje skónčnje sonděrowanske rozmołwy k Jamaika-koaliciji, a zwjazkowa kanclerka připowědźi, zo je najwažniši wobłuk koaliciskeho zrěčenja socialna a towaršnostna politika. Tola zaměry přichodnych partnerow Unije, FDP a Zelenych so stajnje njekryja a budu tójšto diskusijow wuwabić.
Problemy w Němskej su wulke. 15,7 procentam ludźi hrozy chudoba. Rentowy niwow ma so wot tuchwilu 47,8 procentow na 41,6 procentow znižić. Tohorunja pobrachuja tysacy hladarjo chorych a starych. Podruže w městach so eksploziwnje wuwiwaja. Ličba ludźi, kotřiž maja wjacore dźěłowe městna, přiběra.
Před něšto dnjemi roznjese so powěsć, zo je Erich Plack 9. oktobra zemrěł. Wón bě wot lěta 1959 čłon Rownjanskeje Domowinskeje skupiny.
Plack narodźi so 20. januara 1934 w Rownom. Čas žiwjenja wón na wšelakich runinach a w rozdźělnych zamołwitosćach za serbsku kulturu skutkowaše. Mjez druhim słuša wón k załožićelam Slepjanskeje swaŕby, Serbskeho kulturneho centruma w Slepom a Njepilic dwora w Rownom. Wjele lět bě sam z čłonom předsydstwa tychle cyłkow kaž tež župneho předsydstwa. Wosebite zasłužby bě sej ze swojim akribiskim přeslědźowanjom wjesnych stawiznow zdobył. Tež knihu wo wokrjesu Delnjošleska-Hornja Łužica bě sobu spisał a hišće naposledk dźěłaše jako wjesny chronist sobu na Rownjanskej chronice. Tuchwilu ju ćišća, tuž ju hotowu hižo widźeć njemóže.
W pomjatku nam wostanje, kak je Erich Plack jako Slepjanski družba-braška skutkował, wopytowarjow po Rownjanskej domizniskej stwě wodźił a so wo nju starał. Wobdźiwajomne bě, kak je hosćom zajimawosće posrědkował. Za swój angažement dósta lěta 2005 Myto Domowiny.
Njeswačidło (JK/SN). K horcej, ale přiwšěm wěcownej diskusiji dóńdźe na wčerawšim posedźenju Njeswačanskeje gmejnskeje rady. Hižo třeći króć běše delegacija Koslowčanow na posedźenje přichwatała, zo by žadanja wjesnjanow, wobnowić a zawěsćić wjesne wobswětlenje kaž tež zaručić wěsty a rjadowany wobchad přez wjes, potwjerdźiła.
Hižo wot apryla wočakuja, haj žadaja sej Koslowčenjo wotpowědne naprawy, kotrež gmejna dotal zwoprawdźić njemóžeše. Po słowach wjesnjanosty Gerda Schustera (CDU) su móžnosće gmejny tuchwilu wobmjezowane. Wjesne wobswětlenje hodźało so jenož přechodnje zaručić. Nastupajo wobchad přez wjes a hubjeny staw dróhi chcedźa tak spěšnje kaž móžno z wokrjesnym zarjadom za wobchad a dróhotwar na městnje wo tym rěčeć, kak móhła so naležnosć na dobro Koslowčanow rozrisać.
Křesćanska lubosć k blišemu je w Hodźiju nětko na zornowcowej tafli dokumentowana, a z tym tohorunja wotrězk serbskich stawiznow wokoliny.
Hodźij (CK/SN). Wopomnjensku taflu za 140lětne skutkowanje spomóžerskeho domu su minjenu sobotu na Darinskej dróze 3 w Hodźiju wotkryli. Wot 1877 hač do 1941 namakachu tam wosyroćeni a wohroženi hólcy nowe doma. „Zo je tónle dom ze srjedźizny křesćanskeho wobydlerstwa nastał, na to směmy hišće dźensa hordźi być“, rjekny Hodźijski farar Christoph Rummel. Wo druhich so starać je po jeho słowach jedna z najwjetšich hódnotow křesćanskeje etiki.
Ideju za taflu měješe čłon Hodźijskeho domizniskeho towarstwa Klaus Kanzler, kiž so wo zwoprawdźenje projekta zaměrnje prócowaše. Stawizny spomóžerskeho domu su ze 150lětnym diakoniskim dźěłom w Hornjej Łužicy wusko zwjazane. W zwisku z jubilejomaj chce Hodźijske domizniske towarstwo klětu dokumentaciju wudać.