Z wudaća: póndźela, 20 nowembera 2017

Zdobyć sej fachowy dorost za zamołwite a žiwjenje wupjelnjace dźěło njeje dźensa ćežko, płaći-li so za to dobra mzda abo honorar a je-li dosć zajimcow za wotpowědne powołanje. Što pak je z čestnohamtskim, njepłaćenym skutkowanjom? Tam skerje klaca. Tych ludźi je bohužel dźeń a mjenje. Přičin je dosć. Přetož zwonka swojeho wšědneho dźěła so angažować rěka: čas, kotryž móhł za hobbyje wužiwać, na dobro zhromadnosće zasadźić. A to dźensa husto na prěnim městnje žiwjenskich planow njesteji. Tež Serbske šulske towarstwo je minjene lěta wojować měło, dokelž nochcychu narěčani nadawk přewzać a w předsydstwje sobu skutkować. Nětko pak je so nowy, młody zajimc za to wuprajił, sobu dźěłać chcyć. Derje tak! Za njeho to woznamjenja swoje zaměry sćěhować a zwoprawdźić. Za to přejemy mustwu­ wokoło dotalneje a noweje předsydki dołhi dych. Milenka Rječcyna

Drježdźany (ML/SN). „Sym so hižo wobhonił, kotra tramwajka w kotrym času ke krajnemu sejmej jězdźi.“ Takle wotmołwi sakski ministerski prezident Stanisław Tilich (CDU) na prašenje wo swojich planach po 13. decembru, hdyž swoje statne a stronske zastojnstwje złoži. Nowina Dresdner Neueste Nachrichten wozjewi­ njedawno pod nadpismom „Njeńdu w hněwje“ wobšěrny interview z Tilichom wo jeho wotchadźe. Wón praji: „Wěm, zo so wjetšina ludźi na mnje njehněwa. Woteńdu tuž, bjez toho zo so sam hněwam. Kraj ma najlěpše wuměnjenja, swój puć dale hić – nětko bjeze mnje na čole. Po nimale 30 lětach w politice mam to za cyle normalne, zo nochcu na stólcu lěpić.“

Z Běłeje Wody pochadźacy Lipšćanski fotograf Marcel Noack rozkładuje Marce Maćijowej a Elce Lorencowej (wotlěwa) swój fotodokumentariski dołhodobny projekt „Struga – na wšón gwałt“, z kotrehož předstaji wurězk na minjeny pjatk w Zhorjelskim Kaisertrutzu wotewrjenej wustajeńcy „We wokomiku – Fotografije ze Sakskeje a Łužicy“. Prěni raz prezentuje tam Matthias Rietschel dźěł swojeho diplomoweho dźěła z lěta 1985, reportaža to wo žiwjenju na wsach wokoło Chrósćic. Tež Jürgen Maćij je z wobrazami ze serije „Ratarske krajiny“ zastupjeny. Přehladka je hač do 15. apryla 2018 přistupna. Foto: Thomas Kläber

Thomas Scholze je princ 312. sezony Kulowskeho karnewala. Hromadźe ze swojej mandźelskej Sandru a dwórskim maršalom Simonom Michaukom steji 30lětny na čole Kulowskeho norskeho ludu. Wšitkich třoch předstajichu sobotu na lětušim prěnim kapičkowym wječoru w Kulowskej sportowni. Foto: Philipp Metzner

Z delanskej kermušu skónči so wčera lětuši cyklus kermušow, zahajeny 27. awgusta we Wósporku. Tomu slědowaše dalšich dźesać njedźelow kermušneho swjedźenjowanja w nimale 400 wsach a městach Hornjeje Łužicy.

Ralbicy (aha/SN). Najwjace wosadow swjećeše 5. nowembra z Njebjelčanskej a Baćonskej, hdyž zhladowachu tež ewangelscy wěriwi w Poršicach, Male­šecach, Minakale, Rakecach a Delnim Wujězdźe kaž tohorunja Budyska Michałska wosada na poswjećenje swojeje cyrkwje.

Na Božej mši wčera w Ralbičanskej wosadnej cyrkwi, kotruž stej cyrkwinski chór Lilija z dirigentku Bernadet Šołćinej a Ralbičanski pozawnowy orchester pod nawodom Joachima Dučmana dostojnje wobrubiłoj, witaše farar Šćěpan Delan tež bywšich wosadnych, kotřiž mjeztym za mjezami Łužicy bydla. Dawno je w Konjecach z tradiciju, zo přewjeduja tam kermušne reje. Tomu bě lětsa druhi raz tež w Smjerdźacej tak, hdźež běchu so wohnjowa wobora zhromadnje z wjesnej radu a z kapału Privileg wo lóštnu zabawu postarali. Tež w Ralbicach bě młodźina reje wuhotowała.

Dróhi hładke byli

Wóslink. Na wjacorych městnach su so sobotu rano na hładkich pućach wobchadne njezboža stali. Pola Wóslinka bě 53lětny wodźer Renaulta krótko po wosmich na statnej dróze S 95 kontrolu nad swojim wozydłom zhubił. Renault zajědźe na lěwy bok jězdnje a so wjacore razy zwróći. Muž so při tym ćežko zrani, tak zo dyrbjachu jeho z helikopterom do chorownje dowjezć. Awto so dospołnje skóncowa. Wobdźěłanja njezboža a rumowanja dla je na statnej dróze k poćežowanjam wobchada dóšło.

Pančicy-Kukow. Posledni w lětušim rjedźe nazymskich koncertow wotměje so tradicionalnje wječor do pokutneho dnja w Pančicach-Kukowje. W tamnišej Starej hospodźe zaspěwa jutře, wutoru, w 19.30 hodź. delnjoserbski chór Łužyca. Wšitcy lubowarjo serbskeho chóroweho spěwa su na pisany a zabawny program wutrobnje přeprošeni.

Porěči wo dźiwich pčołkach

Rěčicy. We wobłuku swojich zjawnych zarjadowanjow poskići Rěčičanski Erlichtec dwór jutře, wutoru, w 17 hodź. ­přednošk wo dźiwich pčołkach. Dr. ­Andreas Scholz poda dohlad do mnohotnosće tychle insektow a da pokiwy, kak ­móža zahrodkarjo jim přijomne ži­wjenske wuměnjenja wutworić. Zastup je ­darmotny.

Zjawny přednošk

Směrodajny program za město w brošurce předstajeny

Wojerecy (AK/SN). Ze 74 naprawami chce město Wojerecy swój program přichoda zwoprawdźić. Jeho hesło rěka „Směrodajny program Wojerecy 2030 – za solidarne, sebjewědome, swětej wotewrjene ródne město“. „Trjebamy społnomócnjeneho, kiž wšitke hospodarske, pjenježne a čestnohamtske iniciatiwy zwjazuje“, pominaše předsyda susod­skeho pomocneho towarstwa Reinhard Mäding tele dny na předstajenju bro­šurki, w kotrejž je program zapisany.

Jednotliwe naprawy měrja so na wobłuki socialne, strowotnistwo, seniorojo, klima a wobswět. Mjez druhim chcedźa analyzować městnosće pěstowarnjow w měsće a wokolinje. Za to je 22 000 eurow předwidźanych. Zaměr je wšitke zarjadnišća zachować, zo bychu starši po móžnosći krótke puće k nim měli.

Zawěrno wobkuzłace popołdnjo dožiwichu mali wopytowarjo sobotu popołdnju w Budyskim Serbskim muzeju. We wobłuku wustajeńcy wo Krabaće běchu tam na kuzłarsku hodźinku ze Smjerdźečanom Geratom Róblom přeprosyli. Ze swojimi trikami wuwabi wón mjez dźěćimi błyšćate woči, kaž tule pola Arveda z Ruppersdorfa. Nimo toho su sej dźěći film „Sedmy rapak“ wobhladali. Foto: Carmen Schumann

Róžant (JK/SN). Hižo dlěši čas sej starši pěstowarskich dźěći kaž tež mnohe młode swójby z Ralbic žadaja, natwarić nowe abo znajmjeńša ponowić a rozšěrić dotalne hrajkanišćo tamnišeje pěstowarnje. Te dźě nimo pěstowarskich tež dalše dźěći jako zjawne hrajkanišćo wužiwaja, štož je mjeztym slědy zawostajiło. Ralbičanske hrajkanišćo tuž w formje, poskitku a wuhotowanju dźensnišim narokam hižo­ njewotpowěduje. Starši kaž tež staršiska přirada su so tuž na gmejnu wo­broćili a ju wo pomoc prosyli. Serbske šulske towasrtwo jako nošer ze swójskeje mocy tak wobšěrny nadawk zmištrować njemóže. Ma-li pak so hrajkanišćo dale zjawnje wužiwać, je gmejna wužadana. Tež wona pak srědki nima, hrajkanišćo w načasnej formje natwarić. Tohodla zrodźichu ideju, zo starši w swójskej re­žiji trěbne zakładne kaž tež přihotowanske dźěła sami wukonjeja. Wo tym su so staršiska přirada, starši kaž tež nošer a gmejna nětko dojednali. Gmejnje jeničce zbywa so wo to starać, zo namaka wotpowědnu firmu, kotraž hrajkanišćo z načasnymi nastrojemi wuhotuje.­