Wotewrjeni za měšćansku stražu
Podstupim. Delnjołužiska metropola Choćebuz móhła jako reakciju na namócne rozestajenja mjez domoródnymi a ćěkancami nowu měšćansku stražu dóstać. Frakcije w Krajnym sejmje Braniborskeje maja to za móžne. Pruwować nětko chcedźa, hač hodźi so prezenca policije a porjadniskeho zarjada w nutřkownym měsće we „wěstotnym centrumje“ zesylnić. Wo tym z městom rěča.
Nowa iniciatiwa
Brüssel. Europska komisija je wutoru wjacore iniciatiwy za mobilitu wuknjenja, za sylniše wobdźělenje młodych ludźi, zažnodźěsćowske kubłanje, nawuknjenje cuzych rěčow a kulturu předstajiła. Tak chce wona móžnosće kubłanja w Europskej uniji polěpšić a młodych ludźi wšěch worštow towaršnosće sylnić, zo bychu aktiwnišo do demokratiskeho žiwjenja zapřimnyli.
Modelowy program rozšěrić
Sakski zakoń wo přizwolenju wysokošulskeho studija (Hochschulzulassungsgesetz) ma wliw na studentow wučerstwa. Milenka Rječcyna je so z předsydku Serbskeho šulskeho towarstwa Ludmilu Budarjowej rozmołwjała.
Do nowelěrowaneho zakonja zakótwjeny je bonus za tych, kotřiž chcedźa wučerstwo studować a maja hłubše serbskorěčne znajomosće? Što bonus woznamjenja?
L. Budarjowa: Maturant z maćernorěčnymi znajomosćemi serbšćiny, kiž chce wučerstwo studować, móže sej je wot lěta 2017 po paragrafje 6 mjenowaneho zakonja při požadanju za studij nětko we wšitkich fachowych kombinacijach, nic jenož w kombinaciji ze serbšćinu, přiličić dać.
Kotru rólu hraje při tym SŠT?
L. Budarjowa: Maturanća dadźa sej pola nas swoje hłubše znajomosće serbšćiny wobkrućić. Tež hdyž njebu loni na uniwersitach bonus hišće oficialnje nałožowany, su zajimcy poskitk wužiwali a so z posudkom SŠT wuspěšnje požadali.
Kak postupujeće to z maturantami z Wojerec abo Kamjenca?
Budyšin (SN/BŠe). Politiska přirada Zwjazkoweho zjednoćenstwa srjedźostawskeho hospodarstwa (BVMW) chce komunikaciju z hłownymi zamołwitymi města Budyšina polěpšić. To bě a wostanje dale zaměr. Hižo we wólbnym boju wo zastojnstwo Budyskeho wyšeho měšćanosty bě dialog jedne z hłownych žadanjow. Kaž pak nawoda wokrjesneho zwjazka BVMW Wilfried Rosenberg podšmórnje, njeje so połoženje polěpšiło. Tuž so akterojo rozsudźichu za to komunalne forumy přewjesć, zo bychu w intensiwnych diskusijach z Budyskim wyšim měšćanostu Alexanderom Ahrensom (SPD) kedźbnosć zbudźili. Wšako podarmo njerěka, zo su wukony srjedźneho stawa hłowny stołp hospodarstwa. Minjeny tydźeń přewjedźe BVMW druhi tajki forum, hdźež su wo temach rěčeli, kotrež předewzaćelow sprjewineho města zaběraja. Na přikład bě to směrodajny program města, na kotrymž tuchwilu dźěłaja. Proces jeho nastaća firmownikow scyła njespokoja. Budyske towarstwa dóstachu namołwu, swoje ideje zapodać.
Drježdźany (SN/MiR). Starši kaž tež kubłarjo a nawodźa dźěćacych dnjowych přebywanišćow přeja sej wjace personala w dźěćacych dnjowych přebywanišćach. To wuchadźa z wuslědka naprašowanja sakskeho ministerstwa za kultus. Starši su zwoprědka za wjace personala za swoje dźěći hłosowali. Nawodźa a kubłarjo stajichu wjetšu ličbu personala nimale na samsnu runinu z tym, měć wjace chwile za přihot a wuhódnoćenje dźěła z dźěćimi. To woznamjenja, zo přeja sej wšitcy lěpšu kwalitu kubłanja w zažnym dźěćatstwje. Tak maja žłobiki, pěstowarnje a horty wjace personala měć. Fachowa přirada za naprašowanje poruča wobłuk přihot a wuhódnoćenje pedagogiskeho dźěła z najmjeńšimi zakótwić do zakonja wo dźěćacych dnjowych přebywanišćach.
Sakski kultusowy minister Christian Piwarz (CDU) připraji wčera na předstajenju wuslědkow naprašowanja w Drježdźanach, zo měli wuslědk do dwójneho etata 2019/2020 zapřijeć. Na naprašowanju bě so 36 523 wosobow, starši, kubłarjo a kubłarki a nawodźa dźěćacych dnjowych zarjadnišćow wobdźěliło.
Marka Błóta zjednoća pod jednej třěchu najwšelakoriše aktiwity. Jedne z ćežišćow je předewzaćelskeho razu. 1 500 certifikowanych błótowskich wudźěłkow marku wužiwa.
Lubin (SN/BŠe). Třěšna marka Błóta je přewšo wukonliwa a wšelakora. Wo tym zhonichu zajimcy njedawno na hłownej zhromadźiznje Błótowskeho towarstwa w Lubinje. Něhdźe 1 500 certifikowanych wudźěłkow a posłužbow cyłkownje 125 předewzaćow marku mjeztym wužiwa a docpě loni wobrot 33 milionow eurow. K wjerškam prezentacijow produktow słušachu mjez druhim Mjezynarodny zeleny tydźeń w Berlinje, jědnaće přewjedźenych Błótowskich wikow a Błótowski kórkowy swjedźeń. Wo tym informowaše nětko Błótowske towarstwo, kotrež je minjene lěto bilancowało. K najwažnišim aktiwitam přiličeja zamołwići zhromadne nowinarske terminy z předewzaćemi, kotrež zeleninu plahuja abo předźěłuja, k čemuž słušatej na přikład len a lany wolij.
Washington (dpa/SN). Zwjazkowy wonkowny minister Heiko Maas (SPD) zetka so dźensa we Washingtonje ze swojim ameriskim kolegu Mikeom Pompejom. W rozmołwje staj wonaj hłownje połoženje wobjednałoj, po tym zo běchu USA atomowe zrěčenje z Iranom jednostronsce wupowědźili. Maas bě wčera hišće raz potwjerdźił, zo chce Němska zhromadnje ze wšitkimi druhimi krajemi EU zrěčenje dodźeržeć. W běhu dnja wočakowaše ministra Maasa tež wěstotny poradźowar prezidenta Donalda Trumpa John Bolton w Běłym domje.
Merkel po puću do Chiny
Berlin (dpa/SN). Prěni króć po wutworjenju noweho zwjazkoweho knježerstwa je so zwjazkowa kanclerka Angela Merkel (CDU) dźensa do chinskeje stolicy Pekinga podała. Wopyt je zasćinjeny noweho rozestajenja wokoło atomoweho zrěčenja z Iranom a napjatosćow wokoło atomoweho a raketoweho programa Sewjerneje Koreje dla. Jutře wočakuje ju statny prezident Xi Jinping. Merkel Chinu mjeztym jědnaty raz wopyta.
Komisija dźěłać započała
Přewjele samodruhich babow dla su porodowu staciju chorownje w badensko-württembergskim Überlingenje zawrěć dyrbjeli. Tomu nětko chwilu tak wostanje, rěčnica chorownje zdźěli. Wot cyłkownje wosom babow su tři samodruhe a jim je zakazane dale dźěłać. Stacija njeje tuž hižo wodnjo a w nocy wobsadźena. Tam za porod přizjewjene žony sćelu do druhich chorownjow.
Pisany dom w badensko-württembergskim Hayingenje smě pisany wostać. To je knježerstwowy prezidij w Tübingenje rozsudźił a tak połtřeća lěta trajacu zwadu mjez gmejnu a wobsedźerjom chěže skónčił. Muž bě bydlenski a přemysłowy dom w septembru 2016 ze žołtej a oranžowej barbu pomolować dał. Na to běchu sej na gmejnskim zarjedźe wot njeho žadali dom přebarbić. Muž bě so tomu wobarał a so nětko wjeseli, zo je dobył.