Z wudaća: srjeda, 20 junija 2018

Hłupeho žorta dla so zranił

Budyšin. Před Budyskim NSLDź je za­wčerawšim njeznaty silwesterski praskotak do šachta při tamnišej studni ćisnył. W tym wokomiku pak bě runje dźěłaćer w něhdźe tři metry hłubokim šachće. Při rozbuchnjenju praskotaka poćerpje 53- lětny šok a so we wuchu zrani. Kaž policija pozdźišo zwěsći, jednaše so wo čěski praskotak z mjenom „La bomba“. Nětko spytaja zwěsćić, štó je sej tajki hłupy žort dowolił.

Kamjenc (SN/MWj). Jedyn z najwoblubowanišich šlagrowych spěwarjow Němskeje přijědźe lětsa dwójce do Kamjenca. Kónc přichodneho tydźenja steji Roland Kaiser na jewišću na Pastwinej horje, a to před połnje wobsadźenej přihladowarskej tribunu. Přetož koncert 30. junija bě hižo bórze po zahajenju předpředanje wupředaty. Přiwisnicy tak mjenowaneje małeje „Kaisermanije“ pak smědźa so na přidatny koncert wjeselić. Tón wotměje so pjatk, 31. awgusta, w 20 hodź. na samsnym městnje. Za njón dóstanu ­zajimcy zastupne lisćiki w Kamjenskej informaciji na Šulskim naměsće 5 (tel. 03578/ 379 205), internetnje pod www.eventim.de a we wšěch znatych předpředawanišćach. Čitarjo Serbskich Nowin změja šansu, koncert 31. awgusta, darmotnje wopytać. Přichodne dny wozjewimy swoju dowolowu křižowku. A jedne myto budźetej zastupnej lisćikaj za njón.

Budyšin. Jutře, 21. junija, přeprosy zapósłanc krajneho sejma a wokrjesneho sejmika Lěwicy, prawiznik Hajko Kozel, na darmotne socialne poradźowanje w Budyšinje. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomhać problemy nastupajo socialne prašenja rozrisać. Poradźowanje wotměje so wot 14 do 16 hodź. we wobydlerskim běrowje Lěwicy na Šulerskej 10. ­Zajimcy njech dojednaja sej termin pod telefonowym čisłom 0 3591/ 490 976.

Koncertuja pod lipu

Choćebuz. Mjeztym hižo 23. raz wotměje so zajutřišim, pjatk, w 17.30 hodź. w Choćebuzu komorny koncert pod lipu. Dokelž w Serbskim muzeju saněrowanske dźěła hišće traja, budźe koncert w Serbskim domje na Bebelowej 82. Wječor wuhotuja šulerki a šulerjo Choćebuskeho konserwatorija. Wšitcy zajimcy su wutrobnje witani.

25 lět zwjazk Carity

Wojerowski Lessingowy gymnazij je konsultaciske kubłanišćo za spěchowanje wukonliwosće wšitkich šulerjow

Wojerowski Lessingowy gymnazij so profiluje, wukonosylnych a potencielnje wosebje zamóžliwych šulerjow spěcho­wać. Milenka Rječcyna je so z nawod­nicu kubłanišća Katharinu Michel­feit rozmołwjała.

Wukonosylni šulerjo pokazuja swoje zamóžnosće w mnohich předmjetach. Kak pak pokazuja to šulerjo, kotrychž maće za wosebje zamóžliwych?

SZ Drježdźany-Strěžin

– SJ Chrósćicy 1:1 (0:0)

Zestawa hosći: Králíček – Hrdlitschka, Teichmann, Šiman, L. Zahrodnik, M. Zahrodnik, Henčl, Dórnik, G. Zahrodnik (62. J. Bogusz), Młynk, Němec

Na poslednju hru sezony 2017/2018 podachu so koparjo Chróšćanskeje SJ do kraj­neje stolicy. Tam wočakowaše jich pjaty krajneje klasy-wuchod. Wězo chcychu woni po wjacorych poražkach hrajnu dobu znajmjeńša z dypkom zakónčić. Přerěznje 24 lět młode mustwo tež sebjewědomje wustupowaše, prócujo so wo ofensiwnu kopańcu. A přihladowarjo dožiwichu wurunanu partiju. Na woběmaj stronomaj pak falowaše w poslednjej štwórćinje koncentracija. Tak njeběchu móžnosće při tužnym wje­drje přewulke. Tež sudnik běše při wy­sokich temperaturach tróšku lěni a no­chcyše so tak prawje hibać. Nimale cyłu hru agěrowaše wón ze srjedźneho kruha. Tak tež tu abo tamnu situaciju tróšku přewidźa – na woběmaj stronomaj. W defensiwje stejachu domjacy jara wěsće­, ale tež Chróšćenjo. Zmylki dźě běchu jich w škiće w zašłych hrach někotre dypki płaćili. K přestawce steješe tuž dospoł­nje zasłužbnje 0:0.