Na hudźbnym festiwalu „Musica Lípa“ zaklinča najwšelakoriše zynki w sewjeročěskim a hornjołužiskim regionje. Prěni z dweju serbskeju přinoškow je publikum w Českej Lípje wobkuzłał.
Česká Lípa (SN/bn). Serbska wuměłča Carolina Eyckec na tereminje a Lipšćanski pianist Christopher Tarnow staj minjeny pjatk pod hesłom „Hraju bjez dótknjenja ...“ wosebity koncert we wobłuku lětušeho hudźbneho festiwala „Musica Lípa“ wuhotowałoj. W Českolipskej bazilice Wšěch swjatych předstajištaj twórby mjez druhim Heinricha Isaaca, Gabriela Fauréja, Sergeja Rachmaninowa a Oliviera Messiaena. Tež dwě kompoziciji – „Intermeco čo. 1“ a „Sonata za teremin a klawěr čo. 1“, kotrejž bě Tarnow spisał – běštej z wobstatkom programa. „Smój so přez naprašowanje jara wjeseliłoj. Čuju so w Čěskej skoro kaž doma, dokelž je rěč serbšćinje tak bliska“, Carolina Eyckec rozłoži a zjima: „Publikum bě jara zajimowany. Smój program cyle cyrkwinskemu ramikej přiměriłoj, přewažnje měrnu hudźbu wuzwoliłoj a so dlěšich přestawkow wzdałoj. Zo su ludźo wćipni na teremin, je so po koncerće tež tónraz zaso wopokazało.“
Budyšin (SN/MiR). Serbske šulske towarstwo zhladuje na wuspěšne lěto dźěła. To zwurazni jeho předsydka Ludmila Budarjowa sobotu na fachowej konferency. Na nju běchu kubłarki a kubłarjo z Hornjeje a Delnjeje Łužicy do Budyskeho Serbskeho domu přichwatali, kotřiž skutkuja w dźěćacych dnjowych přebywanišćach w nošerstwje SŠT. Zarjadowanje słužeše wotličenju dźěławosće a běše słužbny termin za dalekubłanje. Stephan Anders-Krummnacker a Susann Seyfarth zaběraštaj so w přednošku z prašenjom, što trjebaja dźěći a kubłarki/kubłarjo dźensa a w lěće 2025.
Dalekubłanje kubłarkow w Delnjej Łužicy je projekt, kotryž Choćebuski wotrjad Rěčneho centruma WITAJ přewjeduje. Prěni tajki lětuši kurs bě minjeny tydźeń, dalšej matej slědować.
Choćebuz (SN/MiR). Cyłkownje 30 zajimcow je so za tři kursy přizjewiło, mjez nimi jedyn kubłar. Kurs měri so na fachowcow, skutkowacych w hortach a dźěćacych dnjowych přebywanišćach, w kotrychž dźěćom delnjoserbšćinu posrědkuja. „Tež hdyž mamy dalšich zajimcow, kursy njejsu zjawnosći nažel přistupne“, rozjasnja nawoda Choćebuskeho RCW dr. Viktor Zakar, „wšako je projekt wot nas spěchowany a orientuje so na mjenowanu klientel.“ Wobdźělenju přihłosować maja jednotliwi nošerjo kubłanišćow.
Róžant (SN/bn). Lětuša čitanska turneja Ludoweho nakładnistwa Domowina wuspěšnje pokročuje. Minjeny pjatk předstajichu awtorki a awtorojo Róžeńčanskeho kružka pisacych w tamnišim, kopaće połnym towarstwowym domje swoju druhu antologiju „Zornjatka na puću“. Wjesne towarstwo a LND běštej zarjadowanje, kotrež bě zdobom knižna premjera, zhromadnje z kružkom wuhotowałoj.
Wudawaćel Beno Budar, kotryž kružk nawjeduje, a lektor Pětr Thiemann witaštaj něhdźe 40 zajimcow. Budar wuzběhny wjace hač poł lětstotka skutkowanja w lěće 1963 załoženeho literarneho cyłka a spomina na njeboh basnicu Marju Krawcec. Antologija wopřijima cyłkownje dwanaće jeje basnjow – dwě z nich dotal njewozjewjenej, kotrejž Thiemann recitowaše.
Berlin (dpa/SN). Po 13 lětach w zastojnstwje ma so šef frakcije CDU w zwjazkowym sejmje Volker Kauder (CDU) dźensa na wólbach w Berlinje přećiwnikej stajić. Wuspěch jeho naměstnika a kandidata wo zastojnstwo Ralpha Brinkhausa (CDU) móhła překwapjenka być, ale zdobom na krizu w kruhach CDU pokazać. Zwjazkowa kanclerka Angela Merkel (CDU) Kauderej jara dowěrja. 69lětny je hižo tak dołho předsyda frakcije, kaž wona kanclerka.
Bamž dźensa w Estiskej pobył
Talinn (dpa/SN). Na kóncu jězby po Baltikumje wopyta bamž Franziskus dźensa Estisku. Tam zetkaše so z prezidentku Kersti Kaljulaid, młodostnymi a sobudźěłaćerjemi dobroćelstwowych organizacijow. Prjedy hač chcyše so wón dźensa wječor do Roma nawróćić, swjećeše na Naměsće swobody Božu mšu. Po informacijach Vatikana bydla w Estiskej něhdźe 5 000 katolskich wěriwych, štož wotpowěduje něhdźe 0,5 procentow ludnosće.
Wuskutki hižo čujomne
Łaz (AK/SN). Zaměrowy zwjazk Łužiska jězorina Sakska chce w časowej dobje mjez lětom 2018 do 2022 cyłkownje 18 zakładnych projektow zwoprawdźić. Tole podšmórny jednaćel Daniel Just na njedawnym posedźenju zwjazka we Łazu. Radźićeljo jednohłósnje projektnej lisćinje a prioritnym jednanjam přihłosowachu. Kóžde lěto ma so lisćina přepruwować a aktualizować. Za kóždy projekt pak je hišće swójske wothłosowanje radźićelow trěbne.
„Spočatnje smy sej 160 móžnych projektow wobhladali“, Daniel Just rozkładźe. „Kónc meje z radźićelemi wo tym wuradźowachmy. Předewšěm chcemy ideje wěstotneje potrjeby a wjetšim spěchowanjom zwoprawdźić.“ Po šestym zarjadniskim zrěčenju mjez Zwjazkom a krajemi su mjenujcy dosć financielnych spěchowanskich móžnosćow.
Halle/Kerpen (dpa/SN). Socialnje znjesliwe zakónčenje wudobywanja brunicy trjeba wosebje na wuchodźe Němskeje bjezmało wulkich prócowanjow. Industrija a zjawna ruka měłoj znajmjeńša 60 miliardow eurow nałožić, zdźěli Saksko-Anhaltski ministerski prezident Reiner Haseloff (CDU) w Halle, hdźež je so wčera wuhlowa komisija schadźowała. Pjenjezy su předewšěm za wutwar narunanskich dźěłowych městnow a za polěpšenje infrastruktury trěbne. Zwjazkowe knježerstwo je dotal 1,5 miliardow eurow pomocy wšitkim třom němskim brunicowym rewěram připowědźiło, ke kotrymž tež Łužica słuša.
W Halle mějachu potrjechene přede- wzaća, iniciatiwy a zwjazki srjedźoněmskeho rewěra składnosć swój wid na zakónčenje wudobywanja wuhla brunicowej komisiji předstajić. Zastupjerjo pokazachu na to, zo dožiwichu hižo spočatk 90tych lět sćěhi strukturneje změny, štož njeměło so wospjetować. Hižo 11. oktobra chce so komisija we Łužicy zeńć a so starosćam potrjechenych wěnować.
Budyšin (SN/MiR). We wobłuku cyłozwjazkoweje iniciatiwy „Openion – kubłanje za sylnu demokratiju“ pytaja po cyłej Sakskej 16 tandemow ze šulow a zwonkašulskich partnerow za pućemi sobuskutkowanja. Elke Büdenbender, mandźelska zwjazkoweho prezidenta Němskeje Franka-Waltera Steinmeiera, ma to dalšim zwjazkowym krajam za přikład. Patronka Němskeje załožby za dźěći a młodźinu (DKJS) je wčera w Budyšinje zhromadnje z Annett Hofmann, partnerku sakskeho ministerskeho prezidenta Michaela Kretschmera (CDU) kaž tež do toho hižo we Wopakej zastupjerjow angažowanych iniciatiwow za demokratiju w Sakskej zetkała. Wone přewjedźechu swoje 2. sakske zetkanje projektowych zwjazkow. We Wopakej předstajichu šulerjo zakładneje šule „Willi Hennig“ plany za nowowuhotowanje šulskeho dwora, kotrež su we wobłuku projekta „Demokratija do rukow dźěći“ w dźěłarničce ze sobušulerjemi wuwili. Potom přebywaše „First lady“ Němskeje w Budyskim Serbskim muzeju.