Z wudaća: pjatk, 18 januara 2019

W Dešnjanskim domizniskim muzeju je zajimcam wotnětka nowa wustajeńca „Ćišćane,­ šite, torhnjene“ přistupna. Choćebuska molerka Angelika Jaunich pokazuje w małej wuměłskej zběrce wurězki swojeho tworjenja. Wustajene su jeje kolaže a grafiki. Nastork do dźěła běchu jej twórby Choćebuskich a łužiskich wuměłcow kaž Gerharda Knaby, Bettiny Winkler a druhich wuměłcow. Angelika Jaunich narodźi so 1952 w Stendalu a wotrosće w Berlinje, hdźež je matematiku studowała. Wot lěta 1975 bydli­ w Choćebuzu. Po studiju wuměłstwa nawjedowaše kružk Choćebuskeho kulturneho zwjazka a angažuje so dźensa w Choćebuskim artprojekće. Foto: Michael Helbig

Nopawy Wojerowskeho zwěrjenca su wčera do swojeho ponowjeneho domicila přećahnyli. W domje hnydom při zachodźe zatwarichu­­ nowu přewětrjensku připrawu a někotre nowe wokna. Dohromady inwestowachu něhdźe 40 000 eurow. Zo maja nopawy nětko lěpše wuměnjenja, wo tym přeswědčištaj so šef zwěrjenca Eugène Bruins a Carolin Adler. Foto: Stefanie Jürß

Poprawom su Wadecy w Kubšiskej gmejnje wuchodnje Budyšina měrna wjes. Idylka pak je zdźěla mylena, dokelž­ su tam po zdaću wjackróć we wjesnym­ haće wopłóčki wuhladali.

Wadecy (UM/SN). Zanjerodźenja we Wadečanskim wjesnym haće wostawaja dale mysteriozne. Kaž z wotmołwy sakskeho wobswětoweho ministra Thomasa Schmidta (CDU) na naprašowanje zapósłanca Sakskeho krajneho sejma Wolframa Günthera (Zeleni) wuchadźa, nje­móžachu za to dotal žanu jasnu přičinu zwěsćić.

Gmejna Ralbicy-Róžant w přihotach noweje pěstowarnje přežadana

Róžant (JK/SN). Nowu Ralbičansku pěstowarnju njebudu tak bórze twarić započeć móc. Kaž wjesnjanosta Hubertus Ryćer (CDU) na wčerawšim posedźenju gmejnskeje rady zdźěli, ma gmejna sama z twarskim zarjadom zarjadniskeho zwjazka Při Klóšterskej wodźe přihotować cyłoeuropske wupisanje projekta. To zhoni wjesnjanosta wčera z krajnoradneho zarjada. Z přihotami na tajke wupi­sanje je komuna přežadana. Nima ani facho­wu ani personalnu kompetencu, wužadacy nadawk w poměrnje krótkim času zwoprawdźić. Radźićelow je wčera­wša informacija wulce znjeměrniła. Loni poskićena pomoc krajneho rady Michaela Hariga a jeho přirjadnika Uda Wićaza (wobaj CDU), gmejnu w přihotach twara pěstowarnje podpěrać, wopokazuje so dotal jako hołe słowo. Tež přilubjena podpěra ministerskeho prezidenta Michaela Kretschmera (CDU) njebě dotal pytnyć. Chceli gmejna w přewidnym času pěstowarnju zwoprawdźić, je pomoc politikarjow nuznje trěbna.

Při awtomaće pjenjezy zabył

Biskopicy. Třicyfrowu sumu pjenjez je muž zawčerawšim při pjenježnym awtomaće w Biskopicach wotzběhnył, zaby pak bankowki wućahnyć. Poprawom so fašk po wěstym času wotsamo začini. Njeznata wosoba bě po wšěm zdaću spěšniša a je pjenjezy sobu wzała.

Miłoćicy. Mjezynarodny dźeń wuměłstwa přewjedźe towarstwo Kamjenjak jutře wot 17 hodź. a njedźelu wot 10 hodź. při Miłočanskej skale. Z hosćom budu tam Krabatowy wuměłc Jörg Tausch, Krabatowy slědźer Hans-Jürgen Schröter, wuměłcy rězbarskeje dźěłarnički a čłonojo towarstwa. Při wohenju, zapyrjenej pjecy a w tepjenych rumnosćach změja zajimcy składnosć k bjesadźe. Wo ćělne derjeměće budźe postarane.

„Ćěkancy a my“

Chrósćicy. Propst Clemens Hrjehor ma wotewrjenu wutrobu za nuzu ćerpjacych. Tak je jako Radworski farar přiwzał swójbu ćěkancow z Bosniskeje, jako wona před wójnu na Balkanje wućek pytaše. Na swojim nowym skutkowanišću w Kamjenicy je farski dom swójbje muslimskich migrantow wotewrěł. Čehodla je to činił? Što je při tym dožiwił a hišće dožiwja, runje w měsće, hdźež je po smjertnej nožowej atace na wobydlerja k protestam přećiwo migrantam dóšło? Wo tym porěči propst Clemens Hrjehor njedźelu, 20. januara, w Chróšćanskej putniskej hospodźe. Wječor na temu „Ćěkancy a my – nazhonjenja fararja“ započnje so w 19 hodź. Wšitcy zajimcy su wutrobnje přeprošeni.