Sulšecy. Druhi raz přewjedu njedźelu, 24. měrca, wot 14 hodź. wiki za dźěćacu drastu a hrajki, a to w kulturnym domje delnich Sulšec. Dale w poskitku budu tam najwšelakoriše wěcy, kotrež móhli starši małych dźěći derje trjebać. Štóž chce sam něšto poskićeć, njech přizjewi so hač do pjatka, 22. měrca, za darmotne stejnišćo pod telefonowym čisłom 0171 / 2 11 42 79.
Drustwo přeproša
Chrósćicy. Na swoju hłownu zhromadźiznu přeproša Chróšćanske hońtwjerske drustwo wšitkich wobsedźerjow ležownosćow wutoru, 26. měrca, w 19 hodź. do Chróšćanskeho Krawčikec hosćenca. Organizatoriskich přičin dla proša zamołwići wo to, so hač do zajutřišeho, 22. měrca, přizjewić.
Štó chce sobu hrać?
Budyšin. NSLDź pyta tójšto žonow a muži w starobje 16 do 25 lět, kotřiž chcyli w lětušim lětnim dźiwadłowym kruchu „Słónčna aleja“ sobu hrać, mjez druhim jako čłonojo SNM (FDJ) abo namjezni wojacy. Casting budźe 6. apryla wot 11 hodź. Zajimcy njech přizjewja so pod mejlowej adresu .
Pytaja kubłarku abo kubłarja
Pančicy-Kukow (SN/MWj). Hač do kónca tohole měsaca měł naćisk plana za energetiske saněrowanje a přetwar běrowoweho twarjenja zarjadniskeho zwjazka Při Klóšterskej wodźe doskónčnje předležeć. Potom bjeru sej dwaj tydźenjej chwile wo naćisku diskutować. To předwidźi časowy plan, kotryž je architekt Stanisław Statnik na wčerawšim posedźenju zarjadniskeho zwjazka předstajił.
Njebjelčicy (JK/SN). Technologisce je swět bjez pjenjez přichodnje móžny, budźe pak hišće dołho trać. Ludźo a hospodarstwo pak dyrbitej so na to nastajić. W jara zajimawym přednošku wodźeše Drježdźanski fachowc na polu financow Friedbert Damm zawčerawšim dwaceći zajimcow na Njebjelčanskim gmejnskim zarjedźe po swěće pjenjez a jich stawiznow a poda wuhlad do jich přichoda.
Přednošk wotmě so we wobłuku zarjadowanjow pod hesłom „Kontrowersnje na městnje“, kotrež organizuje sakska centrala za politiske kubłanje zhromadnje z Budyskej ludowej uniwersitu a Njebjelčanskej gmejnu. Kaž zastupjer sakskeje centrale za politiske kubłanje Andreas Heinrich rjekny, je wažne, zo so wobydlerjo dale kubłaja a so z načasnymi problemami rozestajeja. Wosebje pjenjezy a financy su tak wažne kaž hišće ženje do toho. Nimo starosće wo zastaranju w starobje je trjeba, wosebje młodostnych a dźěći na wobchad z pjenjezami derje přihotować. Moderne medije a čas digitalizacije wužaduja sej prawy poměr k pjenjezam a wobchad z nimi.
Z pokradnjenej kokošu zahinył
Weigsdorf-Köblitz. Wodźer Hyundaija je zawčerawšim rano we Weigsdorfje-Köblitzu w Kumwałdskej gmejnje ze swojim awtom do wjelka zajěł. Štyrinohaty rubježnik bě krótko do toho kokoš popadnył a měješe ju hišće w klamje, jako awto na Hłownej dróze přijědźe a hižo borzdźić njemóžeše. Wjelk při zražce zahiny. Popadnjenej kokoši tohorunja hižo pomhać njemóžachu. Na awće nasta 2 500 eurow škody.
Budyšin (WL/SN). Ze swjedźenskim zarjadowanjom woswjećichu zahrodkarjo stareho Budyskeho wokrjesa minjenu njedźelu w Němsko-Serbskim ludowym dźiwadle stote narodniny swojeho teritorialneho zwjazka zahrodowych přećelow Budyskeho wokrjesa (TGLB). Nimo mnohich dalšich oficialnych hosći wuzběhnyštaj tež zapósłancaj Sakskeho krajneho sejma Marko Šiman (CDU) a Hajko Kozel (Lěwica) wuznam zahrodkarjow za towaršnosć. Šiman dopomni so w tym zwisku na rjane dźěćatstwo w zahrodnišću „Wječorne słónco“.
Budyska twarska měšćanostka Juliane Naumann měješe małozahrodkarstwo samo za „jenički konstantny cyłk, kotryž je žołmy minjenych sto lět nimale bjez stratow přetrał“. Dźensa přisłuša Budyskemu teritorialnemu zwjazkej 78 małozahrodkarskich towarstwow z dohromady 3 914 parcelemi.
Měrćinej Völkelej
Na łuce při klóštrje w Róžeńće
hrymzatej šumjelej zamjerznjenu wotawu,
zejhrawatej sej při zažnym ćmičkanju,
hwězdy chowaja so jimaj w hustych hriwach.
Wobkedźbuju jej z chłódka, ze stupaceje hórki,
ze starych wrotow serbskeho swjatnišća,
dołhož wokrjepuju so z wodu ze studnički,
sudźny napoju so z dłónje wěčnosće
a zasłyšu slubny hłós, šepot z hłubiny,
rozkaty w modlitwje, bójskich trunow zwuk.
Zejhrawachu sej šumjele, při měsačku so złote rjapy
błyskaja z wohnjom, z płomjenjemi z nózdrow a kopytow,
jich česa wóčko hospodarja, nana młodych křižerjow;
njebudu je sedłować na kwasach abo za wójnu,
ale zo bychu wotnowa wozjewjeli poselstwo: Horje stanył je Syn.
Jutry přinjesu křižerjo radosć do domow,
potom pojěchaja po Łužicy, pozběhnu so do mróčelow,
słyšeć budźe klepot pódkowow, hłosy njebjeskich jěcharjow,
za sobu zawostajejo samu swětłosć a běły slěd.
Mićo Cvijetić 28.11.1999
přełožk Dorothea Šołćina
Wot 21. do 24. měrca wotměja so w Lipsku lětuše knižne wiki, na kotrychž nakładnistwa z kraja a wukraja swoje najnowše edicije předstaja. Tež Ludwigsburgske nakładnistwo Pop, kotrež je hižo twórby serbskich literatow wozjewiło, budźe tam mjez druhim ze zběrku do serbšćiny a němčiny přełoženych basnjow serbiskeho poeta Mića Cvijetića zastupjene. Spisowaćelka Dorothea Šołćina je zběrku „Donjebjesspěće“ zestajała a basnje do serbšćiny přenjesła. Alfons Wićaz je so z njej rozmołwjał.
Čehodla je zběrka serbskim a němskim lubowarjam poezije tak wažna?
Tabulce blidotenisa
1. wobwodna liga
1. Wocl Krušwica 12 22:2
2. ST Kubšicy 14 21:7
3. MSV Budyšin 04 II 13 20:6
4. TSV Wóspork/Hrodźišćo 14 16:12
5. Viktoria Worklecy 13 12:14
6. SZ Wětnica/Hola 13 12:14
7. Wocl Krušwica II 14 7:21
8. Horken Ketlicy 13 5:21
9. TTV Neugersdorf 90 12 3:21
2. wobwodna liga, stafla I
1. TTC Wojerecy 15 26:4
2. TTSV Korzym/Załom 13 24:2
3. TuS Gersdorf-Möhrsdorf 13 20:6
4. TTC Połčnica 69 II 13 16:10
5. ST Łužnica 13 12:14
6. SG Lückersdorf-Gelenau II 11 10:12
7. TTC Wjazońca 13 6:20
8. TTV Hózk/Kulow 12 2:22
9. SG Großnaundorf 13 0:26
Lětuši Mužakowski parkowy běh jubilejny 25. był
Jenož dźeń po 20. crossu w Połčnicy pod jara špatnymi wjedrowymi poměrami wubědźowachu so lubowarjo běhanja spočatk nalětnika tež na 25. jubilejnym wurisanju w hrodowym parku w Mužakowje, a to při wjele přijomnišim wjedrje. Wubědźowanje běše prěnje woblubowaneje rjadneje lisćiny Wopačanskeho cupa, kotraž skići za lětušu sezonu cyłkownje 14 wurisanjow w Hornjej Łužicy mjez Žitawu a Mužakowom, Wopakej a Połčnicu.
Lětuši tradicionalny parkowy běh přiwabi 485 sportowcow, mjez kotrymiž běše tež 27 lubowarjow walkinga a dźesatk serbskich atletow. Aktiwni běchu hłownje ze Sakskeje, z Braniborskeje, Berlina a wjacori tež ze susodneje Pólskeje. Woni wubědźowachu so na distancach 0,8 km, 2,5 km, 5,0 a 10,0 km. Běhi hódnoćachu so za Drježdźansku wobwodnu lisćinu, Wopačanski cup, Delnjołužiski cup a za Wjercha Pücklerowy pokal.